ﺋﻪﻗﯩﻞ ﻣﯧﯟﯨﺴﻰ ﯞﻩ ﺷﻪﻳﺘﺎﻥ

ﺋﻪﻗﯩﻞ ﻣﯧﯟﯨﺴﻰ ﯞﻩ ﺷﻪﻳﺘﺎﻥ

 يوللىغان ۋاقتى 2006-7-14

ﻳﻮﻟﻠﯩﻐﯘﭼﻰ:ﺯﯗﻻﻝ

ﭘﻪﻥ ﺑﯩﻠﻪﻥ ﺳﻪﻧﻪﺕ ﻳﯜﺗﻜﯜﻝ ﺩﯗﻧﻴﺎﻏﺎ ﻣﻪﻧﺴﯘﭖ ، ﺋﯘﻻﺭﻧﯩﯔ ﭼﯧﮕﺮﯨﺴﻰ ﻳﻮﻕ . _____ ﮔﯧﻴﻮﺗﻰ

ﺧﺮﯨﺴﺘﯩﺌﺎﻧﻼﺭ ﺧﯘﺩﺍﻧﻰ ﺋﻪﻗﯩﻞ ﺑﯩﻠﻪﻥ ، ﺷﻪﻳﺘﺎﻧﻨﻰ ﻫﯧﺴﺴﯩﻴﺎﺕ ﺑﯩﻠﻪﻥ ﺳﯜﭘﻪﺗﻠﻪﻳﺪﯗ . ﺩﻩﺭﯞﻩﻗﻪ ، ﺋﻪﻗﯩﻠﻐﯘ ﺋﯚﺯﯨﻨﯩﯔ ﻳﯜﻛﺴﻪﻛﻠﯩﻜﻰ ﺑﯩﻠﻪﻥ ﻫﻪﻳﯟﻩﺕ ، ﻫﯧﺴﺴﯩﻴﺎﺗﻤﯘ ﺋﯚﺯﯨﻨﯩﯔ ﻧﺎﺯﺍﻛﯩﺘﻰ ﺑﯩﻠﻪﻥ ﺳﯧﻬﯩﺮﻟﯩﻚ .

ﺋﻪﻣﻤﺎ ، ﺷﯘﻧﻰ ﻧﻪﺯﻩﺭﺩﯨﻦ ﺳﺎﻗﯩﺖ ﻗﯩﻠﻤﺎﺳﻠﯩﻖ ﻛﯧﺮﻩﻛﻜﻰ ، ﺋﻪﻗﯩﻞ ﺑﯩﻠﻪﻥ ﻫﯧﺴﺴﯩﻴﺎﺕ ﺗﺎﻣﺎﻣﻪﻥ ﺋﺎﻳﺮﯨﻢ ﻧﻪﺭﺳﯩﻠﻪﺭ ﺋﻪﻣﻪﺱ ، ﺑﻪﻟﻜﻰ ﺑﯩﺮ - ﺑﯩﺮﯨﻨﯩﯔ ﺳﯜﭘﯩﺘﯩﻨﻰ ﯞﻩ ﻣﺎﻫﯩﻴﯩﺘﯩﻨﻰ ﺋﺎﺳﺘﯩﺮﺗﺘﯩﻦ ﺋﯚﺯ ﺋﺎﺭﺍ ﺑﻪﻟﮕﯩﻠﯩﺸﯩﺪﯨﻐﺎﻥ ﻣﯘﻧﺎﺳﯩﯟﻩﺗﻠﯩﻚ ﺗﻪﺭﻩﭘﻠﻪﺭﺩﯗﺭ . ﺋﻪﻗﯩﻞ ﺑﯩﻠﻪﻥ ﻫﯧﺴﺴﯩﻴﺎﺗﻨﯩﯔ ﺑﯩﺮ ﺗﯘﺗﺎﺷﻠﯩﻘﻰ ﺋﺎﺩﻩﻡ ﺋﺎﺭﻗﯩﻠﯩﻖ ﻛﻮﻧﻜﺮﯦﺘﻼﺷﻘﺎﻥ . ﻣﻪﻟﯘﻣﻜﻰ ، ﺋﺎﺩﻩﻡ ﺋﺎﯕﻠﯩﻖ ﻫﺎﻳﯟﺍﻥ . ﺋﺎﯓ ﺩﻩﻝ ﺋﺎﺷﯘ ﺋﻪﻗﯩﻞ ﺑﯩﻠﻪﻥ ﻫﯧﺴﺴﯩﻴﺎﺗﻨﯩﯔ ﺑﯩﺮ ﭘﯜﺗﯜﻧﻠﯜﻛﯩﺪﯨﻦ ﺋﯩﺒﺎﺭﻩﺕ . ﺋﻪﻗﯩﻞ ﺋﯜﺳﺘﯜﻧﻠﯜﻛﻰ ﺋﺎﺩﻩﻣﻨﯩﯔ ﭘﻪﻧﻨﯩﻲ ﻣﺎﻫﯩﻠﻠﯩﻘﯩﻨﻰ ، ﺑﯘﻻﺭﻧﯩﯔ ﻗﺎﻳﺴﻰ ﺑﯩﺮﻯ ﻛﻮﻧﻜﺮﯦﺘﻠﯩﻖ ﺳﻪﻫﻨﯩﺴﯩﺪﻩ ﺭﻭﻝ ﺋﺎﻟﺴﯘﻥ ، ﺑﯩﺮﻯ ﻳﻪﻧﻪ ﺑﯩﺮﯨﻨﯩﯔ ﺋﺎﺭﻗﺎ ﻛﯚﺭﯛﻧﯜﺷﻰ ﺑﻮﻟﯩﺪﯗ . ﺷﯘﯕﻼﺷﻘﺎ ، ﺋﺎﺩﻩﻣﺪﻩ ﺋﻪﻗﯩﻞ ﺑﯩﻠﻪﻥ ﻫﯧﺴﺴﯩﻴﺎﺗﻨﯩﯔ ﺯﯨﺪﺩﯨﻴﯩﺘﻰ ﺩﺍﺋﯩﻢ ﻳﯜﺯ ﺑﯧﺮﯨﭗ ﺗﯘﺭﯨﺪﯗ . ﻛﯚﭖ ﭼﺎﻏﻼﺭﺩﺍ ﺷﻪﻳﺘﺎﻥ ( ﻫﯧﺴﺴﯩﻴﺎﺕ )ﻧﯩﯔ ﯞﻩﺳﯟﻩﺳﯩﺴﻰ ﺋﺎﺩﻩﻣﻨﻰ ﺋﻪﻗﯩﻠﯩﻲ ﺋﺎﺳﯩﻴﻠﯩﻘﻘﺎ ﮔﯩﺮﯨﭙﺘﺎﺭ ﻗﯩﻠﯩﺪﯗ . "" ﺑﻪﻧﺪﻩ "" ﺩﯦﮕﻪﻥ ﺋﯩﺒﺎﺭﯨﻨﯩﯔ ﻣﻪﻧﺘﯩﻘﯩﻲ ﻣﻪﺯﻣﯘﻧﻰ ﺩﻩﻝ ﻣﯘﺷﯘ ﻳﻪﺭﺩﻩ . ﺋﺎﺩﻩﻡ ﺋﺎﺗﺎ ﯞﻩ ﻫﻪﯞﯞﺍ ﺋﺎﻧﯩﻨﯩﯔ ﺑﺎﻟﯩﻠﯩﺮﻯ ﺗﺎ ﻫﺎﺯﯨﺮﻏﯩﭽﻪ ﺋﻪﻗﻠﯩﻲ ﯞﻩ ﻫﯧﺴﺴﯩﻲ ﻳﻮﻝ ﺑﯩﻠﻪﻥ ﺗﯩﻨﭽﻠﯩﻖ ، ﭘﺎﺭﺍﻏﻪﺕ ﺋﯩﺰﺩﻩﭖ ﻛﻪﻟﮕﻪﻥ ، ﻫﻪﺗﺘﺎ ﺋﻪﻗﯩﻠﻨﯩﯔ ﺑﯜﮔﯜﻧﻜﯩﺪﻩﻙ ﻳﯜﻛﺴﻪﻙ ﭘﻪﻟﻠﯩﺴﯩﮕﻪ ﭼﯩﻘﻘﺎﻥ ﺑﻮﻟﺴﯩﻤﯘ ، ﻟﯧﻜﯩﻦ ﻏﻪﻳﺮﯨﻲ ﺋﻪﻗﯩﻠﻨﯩﯔ ( ﻫﯧﺴﺴﯩﻴﺎﺕ ) ﺋﯚﺯﯨﻨﯩﯔ ﺭﻭﻫﯩﻴﻪﺕ ﺋﺎﻟﯩﻤﯩﺪﯨﻜﻰ ﺋﻮﺭﻧﯩﻨﻰ ﻫﯧﭽﻘﺎﭼﺎﻥ ﻳﻮﻗﯩﺘﯩﭗ ﻗﻮﻳﻤﯩﺪﻯ . ﺋﺎﺩﻩﻣﻨﯩﯔ ﺟﻪﯕﮕﯩﯟﺍﺭﻟﯩﻘﻰ ﺋﻪﻧﻪ ﺷﯘ ﺋﻪﻗﯩﻞ ﺑﯩﻠﻪﻥ ﻫﯧﺴﺴﯩﻴﺎﺗﻨﯩﯔ ﺗﻮﻗﯘﻧﯘﺷﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺪﯨﻐﺎﻥ ﺗﺮﺍﮔﯧﺪﯨﻴﻪ ﺋﯩﭽﯩﺪﻩ ﺗﯘﺯ ﺳﯜﻳﯩﮕﻪ ﻏﻪﺭﻕ ﭼﯩﻠﯩﻨﯩﭗ ﻳﺎﺷﺎﻳﺪﯗ . ﺑﯩﺮ ﺋﺎﺩﻩﻣﻨﯩﯔ ﺭﻭﻫﯩﺪﯨﻜﻰ ﺑﯘ ﺳﯩﺮﻟﯩﻖ ﻣﻪﻧﺰﯨﻨﻰ ﻧﯧﻤﯩﺲ ﺷﺎﺋﯩﺮﻯ ﮔﯧﻴﯘﺗﯩﻨﯩﯔ "" ﻓﺎﺋﯘﺳﺖ "" ﻧﺎﻣﻠﯩﻖ ﺋﻪﺳﯩﺮﯨﺪﯨﻜﻰ ﻣﯧﻔﯩﺴﺘﺎﻓﯩﻞ ﺑﯩﻠﻪﻥ ﻓﺎﺋﯘﺳﺖ ﺋﻮﺗﺘﯘﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺕ ﺟﻪﺭﻳﺎﻧﯩﺪﯨﻦ ﺗﻪﭘﺴﯩﻠﯩﻲ ﻛﯚﺭﻩﻟﻪﻳﻤﯩﺰ . ﻣﯧﻔﯩﺴﺘﺎﻓﯩﻞ ﻓﺎﺋﯘﺳﺘﻨﻰ ﺋﯚﺯﯨﻨﯩﯔ ﺷﻪﻳﺘﺎﻧﻠﯩﻖ ﻫﯜﻧﯩﺮﯨﻨﯩﯔ ﺋﯩﺠﺮﺍﭼﯩﺴﻰ ﻗﯩﻠﯩﺸﻘﺎ ﺋﯘﺭﯗﻧﻐﺎﻥ ﺑﻮﻟﺴﯩﻤﯘ ، ﻓﺎﺋﯘﺳﺖ ﺋﯚﺯﯨﻨﯩﯔ ﺋﻪﻗﯩﻞ - ﭘﺎﺭﺍﺳﯩﺘﻰ ﺑﯩﻠﻪﻥ ﻏﺎﻳﯩﺐ ﺋﻮﺭﯗﻧﻐﺎ ﭼﯩﻘﺘﻰ .

ﻗﺎﻧﺪﺍﻗﻼ ﺑﻮﻟﺴﯘﻥ ، ﺋﯩﻨﺴﺎﻥ ﺋﻪﻗﯩﻠﺪﯨﻦ ﺋﯩﺒﺎﺭﻩﺕ ﻣﻪﺯﻣﯘﻧﻨﯩﯔ ﺑﯧﺸﺎﺭﻩﺗﭽﯩﺴﻰ ، ﺷﯘﯕﻼﺷﻘﺎ ، ﺋﯩﻨﺴﺎﻧﻐﺎ ﺋﻪﻗﯩﻞ ﻛﯧﺮﻩﻙ . ﻫﯧﺴﺴﯩﻴﺎﺗﺘﯩﻦ ﺗﯘﻏﯘﻟﻐﺎﻥ ﺋﺎﺭﺯﯗ ﻫﻪﺭ ﺩﺍﺋﯩﻢ ﺋﻪﻗﯩﻠﻨﯩﯔ ﯞﺍﺳﯩﺘﯩﺴﻰ ﺑﯩﻠﻪﻥ ﺋﻪﻣﻪﻟﮕﻪ ﺋﺎﺷﻘﺎﻥ ﯞﻩ ﺋﺎﺷﯩﺪﯗ . "" ﺋﯩﻨﺠﯩﻞ "" ﺭﯨﯟﺍﻳﻪﺗﻠﯩﺮﯨﺪﻩ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ ، ﺋﺎﺩﻩﻡ ﺷﻪﻳﺘﺎﻧﻨﯩﯔ ﯞﻩﺳﯟﻩﺳﯩﺴﯩﮕﻪ ﻛﯩﺮﯨﭗ ، ﺋﻪﻗﯩﻞ ﻣﯧﯟﯨﺴﯩﻨﻰ ﻳﻪﭖ ﻗﻮﻳﻐﺎﻥ . ﺷﯘﻧﯩﯔ ﺑﯩﻠﻪﻥ ﺑﯩﺮ ﺧﯩﻞ ﺋﯘﻳﺎﺗﻠﯩﻖ ﺗﯘﻳﻐﯘﺳﻰ ﭘﻪﻳﺪﺍ ﺑﻮﻟﯘﭖ ، ﺋﯚﺯﯨﻨﯩﯔ ﻳﺎﻟﯩﯖﺎﭺ ﺑﻪﺩﯨﻨﯩﻨﻰ ﻧﯩﻘﺎﺑﻼﺷﻘﺎ ﺋﯘﺭﯗﻧﻐﺎﻥ ، ﻧﻮﻣﯘﺳﻠﯘﻕ ﻳﯧﺮﯨﻨﻰ ﻳﺎﭘﻘﺎﻥ . ﺧﯘﺩﺍ ﺋﺎﺩﻩﻣﻨﯩﯔ ﻳﯘﻗﯩﺮﯨﻘﻰ ﺋﺎﺳﯩﻴﻠﯩﻘﻰ ﺋﯜﭼﯜﻥ ﺋﯘﻧﻰ ﺟﺎﺯﺍﻻﭖ ، ﺟﻪﻧﻨﻪﺗﺘﯩﻦ ﻫﻪﻳﺪﯨﯟﻩﺗﻜﻪﻥ . ﺷﯘ ﺳﻪﯞﻩﺑﺘﯩﻦ ، ﺋﺎﺧﯩﺮﻯ ﺑﯩﺰ ﻳﺎﺷﺎﯞﺍﺗﻘﺎﻥ ﺑﯘ ﻫﺎﻳﺎﺗﻠﯩﻖ ﺩﯗﻧﻴﺎﺳﻰ ﺋﺎﭘﯩﺮﯨﺪﻩ ﺑﻮﻟﻐﺎﻥ . ﺑﯘﻧﯩﯖﺪﯨﻦ ﺷﯘﻧﺪﺍﻕ ﻳﻪﻛﯜﻧﮕﻪ ﻛﯧﻠﯩﻤﯩﺰﻛﻰ ، ﺋﻪﻗﯩﻠﻤﯘ ﺋﺎﺩﻩﻣﻨﯩﯔ ﻧﯧﺴﯩﯟﯨﺴﻰ ﺑﻮﻟﯘﭖ ﺋﯘ ﭘﺎﻧﯩﻲ ﻫﺎﻳﺎﺗﺘﯩﻜﻰ ﺯﯙﺭﯛﺭ ﻧﻪﺭﺳﻪ .

ﺋﻪﻗﯩﻞ ﺑﯩﺮ ﺧﯩﻞ ﻣﯘﻛﻪﻣﻤﻪﻟﻠﯩﻚ . ﺑﯩﺮﺍﻕ ، ﺑﯩﺰ ﺋﯘﻧﯩﯔ ﻗﻪﻳﻪﺭﺩﯨﻠﯩﻜﯩﻨﻰ ﺑﯩﻠﻤﻪﻳﻤﯩﺰ . ﺋﯘ ﺋﯩﻨﺴﺎﻧﻨﯩﯔ ﻫﻪﺭ ﺧﯩﻞ ﺳﻪﺯﮔﯜﻟﯩﺮﻯ ، ﻫﺎﻳﯟﺍﻧﯩﻲ ﯞﻩ ﻣﻪﻧﯩﯟﻯ ﻫﻪﺭﯨﻜﻪﺗﻠﯩﺮﻯ ، ﺋﺎﻟﻪﻡ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﻠﯩﺮﯨﻨﯩﯔ ﮔﺎﺭﻣﻮﻧﯩﻴﯩﺴﻰ ، ﺋﯘﻧﻰ ﻗﺎﻧﺪﺍﻗﺘﯘﺭ ﺑﯩﺮﻩﺭ ﺋﯧﻨﯩﻘﻠﯩﻤﺎ ﻳﺎﻛﻰ ﻛﯚﺭﺳﻪﺗﻤﻪ ﺑﯩﻠﻪﻥ ﭼﯜﺷﻪﻧﺪﯛﺭﯛﭖ ﺑﻪﺭﮔﯩﻠﻰ ﺑﻮﻟﻤﺎﻳﺪﯗ .

ﺋﻪﻗﯩﻠﻨﯩﯔ ﺋﻪﺭﻛﯩﻨﻠﯩﻚ ﺋﺎﻟﯩﻤﯩﮕﻪ ﺑﻮﻟﻐﺎﻥ ﻳﯜﺭﯛﺷﻰ ﯞﺍﺳﯩﺘﯩﻠﯩﻚ ﺑﻮﻟﯩﺪﯗ . ﻫﯧﺴﺴﯩﻴﺎﺗﻨﯩﯔ ﺋﻪﺭﻛﯩﻨﻠﯩﻚ ﺋﺎﻟﯩﻤﯩﮕﻪ ﺑﻮﻟﻐﺎﻥ ﻳﯜﺭﯛﺷﻰ ﺑﯩﯟﺍﺳﯩﺘﻪ ﺑﻮﻟﯩﺪﯗ . ﺑﯩﺮﺍﻕ ، ﻫﻪﺭ ﺋﯩﻜﻜﯩﺴﻰ ﭼﯩﻨﻠﯩﻘﻨﻰ ﺋﻮﻛﺴﯩﮕﯧﻦ ﻗﯩﻠﯩﺪﯗ .

ﺑﯩﺰﻧﯩﯔ ﺑﺎﺭﻟﯩﻖ ﻣﻪﺩﻩﻧﯩﻲ ﻣﻪﺷﻐﯘﻻﺗﯩﻤﯩﺰﻧﯩﯔ ﻫﻪﻣﻤﯩﺴﻰ ﮔﯜﺯﻩﻝ ، ﭘﺎﻙ ﺟﻪﻣﯩﻴﻪﺕ ﻗﯘﺭﯗﺵ ﺋﯜﭼﯜﻥ ﺧﯩﺰﻣﻪﺕ ﻗﯩﻠﯩﺪﯗ . ﻣﺎﺋﺎﺭﯨﭙﺘﯩﻦ ﺋﯩﺒﺎﺭﻩﺕ ﺑﯘ ﺋﺎﻗﺎﺭﺗﯩﺶ ﻫﻪﺭﯨﻜﯩﺘﯩﻤﯘ ﺷﯘﻧﺪﺍﻕ ، ﺋﻪﻟﯟﻩﺗﺘﻪ . ﺷﯘﯕﻼﺷﻘﺎ ، ﻣﺎﺋﺎﺭﯨﭙﻨﯩﯔ ﺗﻪﺭﻛﯩﺒﯩﺪﻩ ﺋﻪﻗﯩﻞ ﯞﻩ ﻫﯧﺴﺴﯩﻴﺎﺗﻨﯩﯔ ﺋﺎﻣﯩﻠﻠﯩﺮﯨﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﻫﻪﺭ ﺧﯩﻞ ﺋﯩﻠﯩﻤﻠﻪﺭ ﺑﻮﻟﻐﺎﻥ ( ﻣﻪﺳﯩﻠﻪﻥ ، ﺗﻪﺑﯩﺌﯩﻲ ﭘﻪﻥ ، ﺋﯩﺠﺘﯩﻤﺎﺋﯩﻲ ﭘﻪﻥ ﺩﯦﮕﻪﻧﻠﻪﺭﺩﻩﻙ ) . ﻧﺎﯞﺍﺩﺍ ﺑﯘﻻﺭ ﺗﻪﯓ ﺋﯧﻠﯩﭗ ﺑﯧﺮﯨﻠﻤﺎﻳﺪﯨﻜﻪﻥ ، ﺗﻪﭘﻪﻛﻜﯘﺭﺩﯨﻜﻰ ﻣﯘﯞﺍﺯﯨﻨﻪﺕ ﺑﯘﺯﯗﻟﯘﭖ ﭘﯩﻜﯩﺮ ﻳﯜﺯﻩ ﺑﻮﻟﯩﺪﯗ ، ﻫﻪﻗﯩﻘﻪﺕ ﺋﯜﺳﺘﯩﺪﯨﻜﻰ ﺋﯩﺰﺩﯨﻨﯩﺶ ﺳﺎﻏﻼﻡ ﺑﻮﻻﻟﻤﺎﻳﺪﯗ ، ﻣﯘﻛﻪﻣﻤﻪﻟﻠﯩﻜﻜﻪ ﻗﺎﺭﺍﭖ ﺋﺎﻟﻐﺎﻥ ﻗﻪﺩﯨﻤﯩﻤﯩﺰ ﺋﺎﺳﺘﺎ ﺑﻮﻟﯩﺪﯗ . ﺋﯘﻳﻐﯘﺭ ﻣﺎﺋﺎﺭﯨﭗ ﺗﺎﺭﯨﺨﻰ ﯞﻩ ﺑﺎﺷﻘﺎ ﻣﻪﺩﻩﻧﯩﻴﻪﺗﻠﯩﻚ ﺋﻪﻟﻠﻪﺭﻧﯩﯔ ﻗﻪﺩﯨﻤﻜﻰ ﺩﻩﯞﺭﻟﯩﺮﯨﺪﯨﻦ ﻣﻪﻟﯘﻣﻜﻰ ، ﻫﺎﺯﯨﺮﻗﯩﻐﺎ ﻧﯩﺴﺒﻪﺗﻪﻥ ﺳﺎﺩﺩﺍ ﺩﻩﯞﺭﻟﻪﺭﺩﯨﻤﯘ ﻟﻮﮔﯩﻜﺎ ( ﺋﯩﻠﻤﯩﻲ ﻣﻪﻧﺘﯩﻖ ) ، ﺋﺎﺳﺘﺮﻭﻧﻮﻣﯩﻴﻪ ( ﺋﯩﻠﻤﯩﻲ ﻧﯘﺟﯘﻡ ) ، ﺋﯩﺴﺘﯩﻠﯩﺴﺘﯩﻜﺎ ( ﺋﯩﻠﻤﯩﻲ ﻓﺎﺳﺎﻫﻪﺕ ) ، ﻣﺎﺗﯧﻤﺎﺗﯩﻜﺎ ( ﺋﯩﻠﻤﯩﻲ ﻫﯧﺴﺎﺏ ) ، ﺷﯧﺌﯩﺮﯨﻴﻪﺕ ، ﺗﺎﺭﯨﺦ ، ﺟﯘﻏﺮﺍﭘﯩﻴﻪ ﻗﺎﺗﺎﺭﻟﯩﻖ ﭘﻪﻧﻠﻪﺭ ﺩﻩﺭﺳﻠﯩﻚ ﻗﯩﻠﯩﻨﯩﭗ ﺗﻪﯓ ﺋﯚﺗﯜﻟﮕﻪﻥ . ﺑﯩﺰﺩﻩ ﻳﯘﻗﯩﺮﯨﻘﻰ ﭘﻪﻧﻠﻪﺭﻧﯩﯔ ﺟﻪﯞﻫﻪﺭﻟﯩﺮﯨﻨﻰ ﺋﯚﺯ ﺋﻪﻗﻠﯩﻲ ﻛﺎﻣﺎﻟﯩﺘﯩﺪﻩ ﻣﯘﺟﻪﺳﺴﻪﻣﻠﻪﭖ ﺳﯩﺴﺘﯧﻤﯩﻠﯩﻖ ﭘﻪﻟﺴﻪﭘﯩﯟﻯ ﭘﯩﻜﯩﺮ ﻳﯜﺭﮔﯜﺯﮔﻪﻥ ﺋﯧﻨﺴﯩﻜﻠﻮﭘﯧﺪﯨﻚ ﺷﻪﺧﺴﻠﻪﺭ ﺑﯘﺭﯗﻥ ﺑﻮﻟﻐﺎﻥ ﺋﯩﺪﻯ . ﻓﺎﺭﺍﺑﻰ ﺩﻩﯞﺭﻯ ﻳﺎﻛﻰ ﻳﯜﺳﯜﭖ ﺧﺎﺱ ﻫﺎﺟﯩﭗ ﺩﻩﯞﺭﯨﻨﻰ ﺋﻪﺳﻠﻪﭖ ﺑﺎﻗﯩﺪﯨﻐﺎﻥ ﺑﻮﻟﺴﺎﻕ ، ﺑﯘ ﺩﻩﯞﺭﻟﻪﺭﺩﯨﻦ ﭘﻪﻟﺴﻪﭘﻪ ﯞﻩ ﺷﯧﺌﯩﺮﯨﻴﻪﺗﻨﯩﯔ ﻳﯜﻛﺴﻪﻙ ﻛﺎﻣﺎﻟﯩﺘﯩﻨﻰ ﺗﺎﭘﺎﻻﻳﻤﯩﺰ .

ﺋﻪﻣﺪﻯ ﺳﻪﻛﻜﺎﻛﻰ ، ﻟﯘﺗﻔﻰ ، ﻧﺎﯞﺍﺋﯩﻲ ﻗﺎﺗﺎﺭﻟﯩﻖ ﻧﻪﯞﺍﺗﻮﺭ ﺷﺎﺋﯩﺮﻻﺭ ﺑﺎﺷﻼﭖ ﺑﻪﺭﮔﻪﻥ ﺷﯧﺌﯩﺮﯨﻴﻪﺗﻨﯩﯔ ﻫﺎﺯﯨﺮﻗﻰ ﺩﻩﯞﺭﯨﻤﯩﺰﮔﯩﭽﻪ ﺑﻮﻟﻐﺎﻥ ﺟﻪﺭﻳﺎﻧﯩﻨﻰ ﺋﻪﺳﻠﻪﭖ ﺑﺎﻗﯩﺪﯨﻐﺎﻥ ﺑﻮﻟﺴﺎﻕ ، ﺑﯘ ﺑﯩﺮ ﻗﺎﻧﭽﻪ ﺋﻪﺳﯩﺮ ﻣﺎﺑﻪﻳﻨﯩﺪﻩ ﻣﻪﻳﻠﻰ ﺷﻪﻛﯩﻞ ﻧﯘﻗﺘﯩﺴﯩﺪﺍ ، ﻣﻪﻳﻠﻰ ﺋﯩﺪﯦﺌﻮﻟﻮﮔﯩﻴﻪ ﻧﯘﻗﺘﯩﺴﯩﺪﺍ ﺑﻮﻟﺴﯘﻥ ، ﺑﯩﺮ ﺧﯩﻞ ﺭﻩﯞﯨﺸﺘﯩﻜﻰ ﺗﻪﻛﺮﺍﺭﻟﯩﻨﯩﺸﻨﯩﯔ ﺑﻮﻟﻐﺎﻧﻠﯩﻘﯩﻨﻰ ﺳﯧﺰﯨﻤﯩﺰ . ﻣﯘﺷﯘ ﺩﻩﯞﺭﻟﻪﺭﺩﯨﻜﻰ ﺷﯧﺌﯩﺮﯨﻴﻪﺕ ﺗﺎﺭﯨﺨﯩﻤﯩﺰ ﺋﺎﺳﺎﺳﻪﻥ ﺋﺎﺷﯩﻘﻠﯩﻖ ﺩﺍﺳﺘﺎﻧﯩﻨﯩﯔ ﻗﺎﻳﺘﯩﺪﯨﻦ ﻳﯧﺰﯨﻠﯩﺸﻰ ، ﮔﯜﻝ ﯞﻩ ﺑﯘﻟﺒﯘﻝ ﻗﺎﺗﺎﺭﻟﯩﻖ ﺳﯩﻤﯟﻭﻟﯩﺴﺘﯩﻚ ﯞﺍﺳﯩﺘﯩﻠﻪﺭﻧﯩﯔ ﺯﯨﻜﺮﻯ ﻗﯩﻠﯩﻨﯩﺸﯩﺪﯨﻦ ﺋﯩﺒﺎﺭﻩﺕ ﺑﻮﻟﺪﻯ . ﺭﻭﺷﻪﻧﻜﻰ ، ﻧﺎﯞﺍﺋﯩﻲ ﺋﻪﻧﻪﻧﯩﺴﻰ ﺑﯩﺰ ﺋﯜﭼﯜﻥ ﺋﯧﻴﺘﻘﺎﻧﺪﺍ ، ﺭﺍﯞﺍﺟﻼﻧﺪﯗﺭﯨﺪﯨﻐﺎﻥ ﻧﯘﻗﺘﺎ ﺋﻪﻣﻪﺱ ، ﺋﯘﻧﯩﯔ ﺋﻪﻛﺴﯩﭽﻪ ﭼﻮﻗﯘﻧﯩﺪﯨﻐﺎﻥ ﻧﯘﻗﺘﯩﻐﺎ ﺋﺎﻳﻠﯩﻨﯩﭗ ﻗﺎﻟﺪﻯ . ﻧﺎﯞﺍﺋﯩﻲ ﻧﯧﻤﻪ ﺋﯜﭼﯜﻥ ﺋﯚﺯﯨﺪﯨﻦ ﺑﯘﺭﯗﻧﻘﻰ ﯞﻩ ﻛﯧﻴﯩﻨﻜﻰ ﺑﯩﺮ ﻗﺎﻧﭽﻪ ﺋﻪﺳﯩﺮﻧﯩﯔ ﺋﯧﺴﺘﯧﺘﯩﻚ ﺋﺎﻟﯩﻤﯩﻨﻰ ﻳﻮﺭﯗﺗﺎﻟﯩﺪﻯ ؟ ﭼﯜﻧﻜﻰ ، ﻧﺎﯞﺍﺋﯩﻲ ﺋﻪﻗﯩﻞ ﯞﻩ ﻫﯧﺴﺴﯩﻴﺎﺗﻨﯩﯔ ﺧﻪﺯﯨﻨﯩﺴﯩﮕﻪ ﺋﺎﻳﻼﻧﻐﺎﻥ ﺋﯩﺪﻯ . ﺑﯘ ﺧﻪﺯﯨﻨﻪ ﺋﺎﻟﺪﻯ ﺑﯩﻠﻪﻥ ﺋﯚﺯ ﺧﻪﻟﻘﯩﻨﯩﯔ ﻣﯩﺮﺍﺳﻠﯩﺮﻯ ، ﺋﺎﻧﺪﯨﻦ ﻫﯩﻨﺪﯨﻼﺭ ، ﭘﺎﺭﯨﺴﻼﺭ ، ﮔﺮﯦﻜﻼﺭ ﺩﯗﻧﻴﺎﺳﻨﯩﯔ ﮔﯩﺮﯞﻩﻛﻠﯩﺮﻯ ﺑﯩﻠﻪﻥ ﺗﯘﺗﺎﺷﻘﺎﻥ ﺋﯩﺪﻯ . ﺷﯘﯕﺎ ، ﻧﺎﯞﺍﺋﯩﻲ ﺷﯧﺌﯩﺮﯨﻴﯩﺘﻰ ﻳﯜﻛﺴﻪﻙ ﭘﻪﻟﺴﻪﭘﯩﯟﻯ ﻗﺎﺗﻼﻣﻨﻰ ﺋﯚﺯﯨﮕﻪ ﺳﯩﯖﺪﯛﺭﯛﭖ ، ﺷﯚﻫﺮﻩﺕ ﺳﺎﻳﯩﺴﯩﻨﻰ ﻣﯩﺴﻠﻰ ﻛﯚﺭﯛﻟﻤﯩﮕﻪﻥ ﻛﻪﯓ ﺩﺍﺋﯩﺮﯨﮕﻪ ﻳﺎﻳﺎﻟﯩﺪﻯ . ﺋﯘﻧﯩﺪﯨﻦ ﻛﯧﻴﯩﻨﻤﯘ ﻧﯘﺭﻏﯘﻥ ﻧﺎﯞﺍﺋﯩﻴﻼﺭ ﺋﻮﺗﺘﯘﺭﯨﻐﺎ ﭼﯩﻘﺘﻰ ، ﻟﯧﻜﯩﻦ ، ﺑﯘ ﻧﺎﯞﺍﺋﯩﻴﻼﺭ ﻧﺎﯞﺍﺋﯩﻴﻨﯩﯔ ﺗﯘﻏﻰ ﺋﺎﺳﺘﯩﺪﯨﻜﻰ ﻧﺎﯞﺍﺋﯩﻴﻼﺭ ﺋﯩﺪﻯ .

ﺩﯦﻤﻪﻙ ، ﺋﻪﻗﯩﻞ ﯞﻩ ﻫﯧﺴﺴﯩﻴﺎﺕ ﺑﯩﺮ - ﺑﯩﺮﯨﻨﻰ ﺷﻪﺭﺕ ﻗﯩﻠﯩﺪﯗ . ﻣﻪﺩﻩﻧﯩﻴﻪﺗﻨﯩﯔ ﺑﯩﺮ ﭘﯜﺗﯜﻥ ﻗﯘﺭﯗﻟﻤﯩﺴﯩﺪﺍ ﻫﻪﺭ ﺋﯩﻜﻜﯩﺴﯩﻨﯩﯔ ﺋﯧﻠﯧﻤﯧﻨﺘﻠﯩﺮﻯ ﺗﻪﯓ ﻣﻪﯞﺟﯘﺕ ﺑﻮﻟﯘﭖ ﺗﯘﺭﯨﺪﯗ . ﺋﻪﻗﯩﻞ ﺗﻪﺭﻩﻗﻘﯩﻲ ﻗﯩﻠﺴﺎ ، ﻫﯧﺴﺴﯩﻴﺎﺗﻨﯩﯔ ﺋﻪﯞﺟﯩﻤﯘ ﺷﯘﻧﭽﻪ ﺑﺎﻻﻏﻪﺗﻠﯩﻚ ﺑﻮﻟﯩﺪﯗ . ﭘﻪﻥ ﺗﻪﺭﻩﻗﻘﯩﻲ ﻗﯩﻠﺴﺎ ، ﺳﻪﻧﻪﺗﻤﯘ ﺗﻪﺭﻩﻗﻘﯩﻲ ﻗﯩﻠﯩﺪﯗ . ﺳﻪﻧﻪﺕ ﺗﻪﺭﻩﻗﻘﯩﻲ ﻗﯩﻠﺴﺎ ، ﭘﻪﻧﻨﯩﯖﻤﯘ ﺗﻪﺭﻩﻗﻘﯩﻴﺎﺕ ﻣﻪﻧﺰﯨﺮﯨﺴﻰ ﻛﻪﻳﭙﯩﻴﺎﺕ ﺗﻪﺭﯨﻘﯩﺴﯩﺪﻩ ﺋﻪﻛﺲ ﺋﯧﺘﯩﺪﯗ .

ﻫﺎﺯﯨﺮﭼﻪ ﺳﻪﻧﯩﺘﯩﻤﯩﺰﻧﯩﯔ ﺭﯦﺌﺎﻝ ﺳﻪﯞﯨﻴﯩﺴﻰ ﺋﯜﺳﺘﯩﺪﻩ ﮔﻪﭖ ﺋﺎﭼﻤﺎﻗﭽﻰ ﺋﻪﻣﻪﺳﻤﯩﺰ . ﻟﯧﻜﯩﻦ ، ﺑﯜﮔﯜﻧﻜﻰ ﺳﻪﯞﯨﻴﯩﻤﯩﺰﺩﯨﻦ ﻗﺎﻧﺎﺋﻪﺕ ﺗﺎﭘﻤﺎﻳﺪﯨﻐﺎﻧﻠﯩﻘﯩﻤﯩﺰ ، ﺑﻪﻟﻜﻰ ﺋﻪﻫﯟﺍﻟﯩﻤﯩﺰﺩﯨﻦ ﺧﯘﺭﺳﯩﻨﯩﺶ ﺋﯩﭽﯩﺪﻩ ﻗﺎﻟﯩﺪﯨﻐﺎﻧﻠﯩﻘﯩﻤﯩﺰ ﻫﻪﻣﻤﯩﮕﻪ ﺋﺎﻳﺎﻥ . ﺳﻪﻧﯩﺘﯩﻤﯩﺰﻧﯩﯔ ﻛﯚﺯﻧﻰ ﭼﺎﻗﻨﯩﺘﯩﺪﯨﻐﺎﻥ ﻧﺎﺯ - ﻛﻪﺭﻩﺷﻤﯩﻠﯩﻚ ﭘﻪﺭﺩﯨﺴﯩﻨﻰ ﺭﻩﻫﯩﻤﮋﻟﯩﻚ ﺑﯩﻠﻪﻥ ﻗﺎﻳﺮﯨﺴﺎﻕ ، ﺋﯘﻧﯩﯖﺪﯨﻜﻰ ﭘﯩﻜﯩﺮ ﻧﺎﻣﺮﺍﺗﻠﯩﻘﻰ ﻣﺎﻧﺎ ﻣﻪﻥ ﺩﻩﭖ ﭼﯩﻘﯩﭗ ﻗﺎﻟﯩﺪﯗ . ﺋﯘﻧﯩﯖﺪﯨﻦ ﺑﺎﺷﻘﺎ ﻣﻪﺗﺒﯘﺋﺎﺕ ، ﻛﯩﻨﻮ - ﺗﯧﻠﯧﯟﯨﺰﯨﻴﯩﻠﯩﺮﯨﻤﯩﺰﺩﯨﻜﻰ ﻗﺎﻻﻗﻠﯩﻖ ( ﮔﻪﺭﭼﻪ ﻳﻮﻗﺘﯩﻦ ﺑﺎﺭ ﺑﻮﻟﻐﺎﻥ ﺑﻮﻟﺴﯩﻤﯘ ) ﭘﻪﻥ ﯞﻩ ﺗﯧﺨﻨﯩﻜﯩﻨﻰ ﻧﯧﮕﯩﺰ ﻗﯩﻠﻐﺎﻥ ﺋﻪﻗﯩﻞ ﻧﺎﻣﺮﺍﺗﻠﯩﻘﯩﻨﻰ ﺋﺎﺷﻜﺎﺭﯨﻼﻳﺪﯗ . ﺷﯘﻧﻰ ﺩﯦﻤﻪﻱ ﺑﻮﻟﻤﺎﻳﺪﯗﻛﻰ ، ﺋﻪﻗﯩﻞ ﻧﺎﻣﺮﺍﺗﻠﯩﻘﻰ ﺳﯩﻴﺎﺳﯩﻲ ، ﺋﯩﻘﺘﯩﺴﺎﺩ ، ﻣﻪﺩﻩﻧﯩﻴﻪﺕ ﺟﻪﻫﻪﺗﺘﯩﻜﻰ ﻧﺎﻣﺮﺍﺗﻠﯩﻘﻨﯩﯔ ﺳﻪﯞﻩﺑﭽﯩﺴﻰ ، ﺗﺎﺭﯨﺨﺘﯩﻜﻰ ﻫﻪﺭ ﻗﺎﻧﺪﺍﻕ ﺳﻪﯞﻩﻧﻠﯩﻚ ﻳﻪﻧﯩﻼ ﺋﺎﺷﯘ ﺋﻪﻗﯩﻠﻨﯩﯔ ﭘﻪﻟﻠﯩﺴﻰ ﺑﯩﻠﻪﻥ ﺑﺎﻏﻠﯩﻖ .

ﺋﻪﻗﯩﻞ ﻧﺎﻣﺮﺍﺗﻠﯩﻘﻰ ﯞﻩ ﺑﯘﻧﯩﯖﺪﯨﻦ ﻛﯧﻠﯩﭗ ﭼﯩﻘﻘﺎﻥ ﻛﯧﺴﻪﻟﻠﯩﻚ ﻣﺎﺋﺎﺭﯨﭙﯩﻤﯩﺰﺩﺍ ﺗﯧﺨﯩﻤﯘ ﺭﻭﺷﻪﻥ ﺋﻪﻛﺲ ﺋﻪﺗﻤﻪﻛﺘﻪ . ﺋﺎﺩﻩﺗﺘﯩﻜﻰ ﺋﺎﻟﯩﻲ ﻣﻪﻛﺘﻪﭖ ، ﻫﻪﺗﺘﺎ ﭼﻮﯕﻼﺭ ﺋﺎﻟﯩﻲ ﻣﻪﻛﺘﻪﭘﻠﯩﺮﯨﺪﯨﻜﻰ ﺋﻮﻗﯘﻏﯘﭼﯩﻼﺭﻏﺎ ﻧﻪﺯﻩﺭﯨﻴﻪ ﺩﻩﺭﺱ ﺋﯚﺗﻜﻪﻧﺪﻩ ، ﺋﻮﻗﯘﻏﯘﭼﯩﻼﺭ ﻣﯘﻧﺪﺍﻕ ﺑﯩﺮ ﺧﺎﻫﯩﺸﻨﻰ ﺋﻮﺭﺗﺎﻕ ﺋﯩﭙﺎﺩﯨﻠﯩﻤﻪﻛﺘﻪ : ﻫﯧﻜﺎﻳﻪ ، ﻗﯩﺴﺴﻪ ، ﻟﻪﺗﯩﭙﯩﻠﻪﺭ ﺳﯚﺯﻟﯩﮕﻪﻧﺪﻩ ﺋﻮﻗﯘﻏﯘﭼﯩﻼﺭ ﺧﯧﻠﻰ ﺋﻮﺑﺪﺍﻥ ﺭﻭﻫﻠﯩﻨﯩﭗ ﻗﺎﻟﯩﺪﯗ . ﺑﯩﺮﺍﻕ ، ﺩﻩﻝ ﺷﯘﻻﺭ ﺋﯜﺳﺘﯩﺪﯨﻜﻰ ﺋﻪﻗﻠﯩﻲ ﺧﯘﻻﺳﯩﻨﯩﯔ ﻣﯧﯟﯨﺴﻰ ﺑﻮﻟﻐﺎﻥ ﻧﻪﺯﻩﺭﯨﻴﻪ ﯞﻩ ﭘﻪﻟﺴﻪﭘﻪ ﺳﯚﺯﻟﻪﻧﮕﻪﻧﺪﻩ ، ﺋﯘﻻﺭﻧﯩﯔ ﺩﯨﻘﻘﯩﺘﻰ ﭼﯧﭽﯩﻠﯩﺪﯗ . ﭘﻪﻟﺴﻪﭘﻪ ، ﻟﻮﮔﯩﻜﺎ ﯞﻩ ﺋﯧﺴﺘﯧﺘﯩﻜﯩﺪﯨﻜﻰ ﺋﯘﻗﯘﻣﻼﺭ ﺷﻪﺭﻫﻠﯩﻨﯩﯟﺍﺗﻘﺎﻥ ﺟﻪﺭﻳﺎﻧﺪﺍ ، ﺋﯘﻻﺭﺩﺍ ﺑﯩﺮ ﺧﯩﻞ ﮔﺎﯕﮕﯩﺮﺍﺵ ، ﺯﯦﺮﯨﻜﯩﺶ ﺋﺎﻻﻣﻪﺗﻠﯩﺮﻯ ﻳﯜﺯ ﺑﯧﺮﯨﺪﯗ . ﻧﻪﺗﯩﺠﯩﺪﻩ ، ﻧﻪﺯﻩﺭﯨﻴﯩﯟﻯ ﺑﯩﻠﯩﻤﻠﻪﺭ ( ﺋﻪﻟﯟﻩﺗﺘﻪ ، ﺋﻪﻗﯩﻞ ﺋﯚﺭﻧﻪﻛﻠﯩﺮﻯ ) ﻗﺎﻧﭽﯩﻠﯩﻚ ﻳﯧﯖﻰ ﺑﻮﻟﯘﺷﯩﺪﯨﻦ ﻗﻪﺗﯩﻴﻨﻪﺯﻩﺭ ﻗﻮﺑﯘﻝ ﻗﯩﻼﻟﻤﺎﻳﺪﯗ . ﻣﺎﻧﺎ ﺑﯘ ﺋﯘﺯﺍﻕ ﺩﺍﯞﺍﻣﻼﺷﻘﺎﻥ ﺋﻪﻗﯩﻞ ﻧﺎﻣﺮﺍﺗﻠﯩﻘﯩﻨﯩﯔ ﺑﯜﮔﯜﻧﻜﻰ ﺋﻪﻣﻪﻟﯩﻲ ﺋﯩﭙﺎﺩﯨﺴﻰ .

ﺋﻪﺩﻩﺑﯩﻴﺎﺕ - ﺳﻪﻧﻪﺕ ﺋﻮﺑﺰﻭﺭﭼﯩﻠﯩﻘﯩﻤﯩﺰﺩﺍ ﻧﻪﺯﻩﺭﯨﻴﯩﯟﻯ ﺳﯩﺴﺘﯧﻤﯩﻨﯩﯔ ﺑﻮﻟﻤﺎﺳﻠﯩﻘﻰ ، ﺗﻪﺗﻘﯩﻘﺎﺗﻠﯩﺮﯨﻤﯩﺰﺩﺍ ﺧﺎﺱ ، ﺋﯜﻧﯜﻣﻠﯜﻙ ﻣﯧﺘﻮﺩﻧﯩﯔ ﺑﻮﻟﻤﺎﺳﻠﯩﻘﻰ ﻳﯘﻗﯩﺮﯨﻘﯩﻼﺭ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ .

ﺋﺎﻣﯧﺮﯨﻜﯩﻠﯩﻖ ﺷﺎﺋﯩﺮ ﯞﻩ ﭘﻪﻳﻼﺳﻮﭖ ﺋﯧﻤﯩﺮﺳﻮﻥ : "" ﺩﯗﻧﻴﺎﺩﯨﻜﻰ ﺋﻪﯓ ﻣﯜﺷﻜﯜﻝ ﺋﻪﻣﮕﻪﻙ _ ﭘﯩﻜﯩﺮ ﻗﯩﻠﯩﺸﺘﯘﺭ "" ﺩﯦﮕﻪﻥ ﺋﯩﺪﻯ . ﺋﻪﻣﮕﻪﻛﻨﯩﯔ ﻣﻪﺯﻣﯘﻧﻰ ﻳﺎﻟﻐﯘﺯ ﺟﯩﺴﻤﺎﻧﯩﻲ ﺋﻪﻣﮕﻪﻙ ﺑﯩﻠﻪﻧﻼ ﺋﻪﻣﻪﺱ ، ﺑﻪﻟﻜﻰ ﺟﯩﺴﻤﺎﻧﯩﻲ ﺋﻪﻣﮕﻪﻙ ﺑﯩﻠﻪﻥ ﺋﻪﻗﻠﯩﻲ ﺋﻪﻣﮕﻪﻛﻨﯩﯔ ﺑﯩﺮﻟﯩﻜﯩﺪﯨﻦ ﻫﺎﺳﯩﻞ ﺑﻮﻟﯩﺪﯗ . ﺋﺎﯓ ﻳﯜﻛﺴﻪﻙ ﺩﻩﺭﯨﺠﯩﺪﻩ ﺗﻪﺭﻩﻗﻘﯩﻲ ﻗﯩﻠﻐﺎﻥ ﺑﯜﮔﯜﻧﻜﯩﺪﻩﻙ ﺯﺍﻣﺎﻧﯩﯟﻯ ﻣﯘﻫﯩﺘﺘﺎ ، ﺋﻪﻗﻠﯩﻲ ﺋﻪﻣﮕﻪﻙ ﺋﻪﻣﮕﻪﻛﻨﯩﯔ ﻣﻪﺯﻣﯘﻧﯩﻨﻰ ﮔﯜﺯﻩﻟﻠﯩﻚ ﺩﻩﺭﯨﺠﯩﺴﯩﮕﻪ ﻛﯚﺗﯜﺭﯨﺪﯨﻐﺎﻥ ﺋﺎﺳﺎﺳﻠﯩﻖ ﺗﻪﺭﻛﯩﺒﻜﻪ ﺋﺎﻳﻼﻧﺪﻯ . ﺷﯘﯕﻼﺷﻘﺎ ، ﺋﻪﻗﻠﯩﻲ ﺋﻪﻣﮕﻪﻙ ﻗﯩﻼﻟﻤﯩﻐﺎﻧﻼﺭ ﻣﻪﻧﯩﯟﯨﻴﯩﺘﻰ ﭘﺎﺟﯩﺌﻪﻟﯩﻚ ﻛﯧﺴﻪﻟﻠﯩﻜﻜﻪ ﮔﯩﺮﯨﭙﺘﺎﺭ ﺑﻮﻟﻐﺎﻥ ﻫﯘﺭﯗﻧﻼﺭ ﻫﯧﺴﺎﺑﻠﯩﻨﯩﺪﯗ . ﺋﻪﭘﺴﯘﺱ ، ﺑﯩﺰ ﺋﻪﻗﯩﻞ ﺟﻪﻫﻪﺗﺘﻪ ﺗﻮﻟﯩﻤﯘ ﻗﺎﺷﺸﺎﻕ .

ﻧﯧﻤﯩﺴﻼﺭﻧﯩﯔ ﻣﻪﺩﻩﻧﯩﻴﻪﺕ ﺗﺎﺭﯨﺨﻰ ﺋﯘﻻﺭﻧﯩﯔ ﺧﺎﺭﺍﻛﺘﯧﺮﯨﺪﯨﻜﻰ ﺟﻪﯕﮕﯩﯟﺍﺭﻟﯩﻘﯩﻨﻰ ، ﻗﺎﺗﺘﯩﻖ ﭘﯩﻜﯩﺮﻟﯩﻚ ﻣﯩﺠﻪﺯﯨﻨﻰ ﻧﺎﻣﺎﻳﻪﻥ ﻗﯩﻠﯩﺪﯗ . ﻛﺎﻧﯩﺖ ، ﮔﯧﮕﯩﻞ ، ﻓﯧﻴﻴﯧﺮﺑﺎﺥ ، ﻟﯩﺌﻮﺑﯩﻨﯧﺰ ، ﮔﯧﻴﻮﺗﻰ ، ﺑﯧﺘﺨﻮﯞﯨﻦ ﻗﺎﺗﺎﺭﻟﯩﻖ ﺩﯗﻧﻴﺎﯞﻯ ﻣﯚﺟﯩﺰﯨﻜﺎﺭﻻﺭ ﺋﺎﺷﯘﻻﺭﻧﯩﯔ ﻗﻮﻳﻨﯩﺪﺍ ﺗﯘﻏﯘﻟﻐﺎﻥ . ﺋﯘﻻﺭﻧﯩﯔ ﺋﯩﺪﯦﺌﻮﻟﻮﮔﯩﻴﯩﺴﻰ ﻣﺎﺭﻛﺴﯩﺰﻡ ﻣﻪﻧﺒﻪﻟﯩﺮﯨﻨﯩﯔ ﺑﯩﺮﻯ ﺑﻮﻻﻟﻤﯩﻐﺎﻥ . ﺋﯘ ﻳﻪﻧﯩﻼ ﺋﻪﻗﯩﻞ ﯞﻩ ﻫﯧﺴﺴﻴﺎﺕ ﺋﺎﻣﯩﻠﻠﯩﺮﯨﻨﯩﯔ ﺑﯩﺮ - ﺑﯩﺮﯨﻨﯩﯔ ﺭﺍﯞﺍﺟﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯨﻐﺎﻧﻠﯩﻘﯩﻐﺎ ﺩﺍﺋﯩﺮ ﺗﺎﺭﯨﺨﻰ ﭘﺎﻛﯩﺖ .

ﺷﯧﺌﯩﺮ _ ﻫﯧﺴﺴﯩﻴﺎﺗﻨﯩﯔ ﺋﻮﻳﻐﯩﻨﯩﺸﻰ ، ﭘﻪﻥ _ ﺋﻪﻗﯩﻠﻨﯩﯔ ﺋﻮﻳﻐﯩﻨﯩﺸﻰ . ﭘﻪﻟﺴﻪﭘﻪ ﺑﯘ ﺋﯩﻜﻜﻰ ﺧﯩﻞ ﺋﻮﻳﻐﯩﻨﯩﺸﻨﯩﯔ ﺑﻪﻟﮕﯩﺴﻰ . ﺋﺎﺭﺧﯧﻤﯩﺪ : "" ﻣﺎﯕﺎ ﺑﯩﺮ ﺩﺍﻧﻪ ﭼﯧﻜﯩﺖ ﺑﻪﺭﺳﻪﯓ ، ﻳﻪﺭ ﺷﺎﺭﯨﻨﻰ ﻳﯚﺗﻜﯩﯟﯦﺘﻪﻟﻪﻳﻤﻪﻥ "" ﺩﯦﮕﻪﻥ ﺋﯩﺪﻯ .

ﺋﺎﺭﺧﯧﻤﯩﺪ ﻣﺎﺗﯧﻤﺎﺗﯩﻜﺎ ﺋﺎﻟﯩﻤﻰ ﺑﻮﻟﻐﺎﭼﻘﺎ ﺋﯚﺯﯨﻨﯩﯔ ﺋﯩﻠﻬﺎﻣﯩﻨﻰ ﮔﯧﺌﻮﻣﯧﺘﯩﺮﯨﻴﯩﺪﯨﻜﻰ ﭼﯧﻜﯩﺖ ﺋﺎﺭﻗﯩﻠﯩﻖ ﺋﯩﭙﺎﺩﯨﻠﯩﮕﻪﻥ . ﻣﯧﻨﯩﯖﭽﻪ ، ﺑﯘ ﭘﯩﻜﯩﺮﺩﻩ ﻫﻪﻡ ﺷﯧﺌﯩﺮ ، ﻫﻪﻡ ﭘﻪﻥ ، ﻫﻪﻡ ﭘﻪﻟﺴﻪﭘﻪ ﺑﺎﺭ .

ﺗﻪﭘﻪﻛﻜﯘﺭ ﻳﯜﻛﺴﻪﻛﻠﯩﻜﯩﮕﻪ ﻫﻪﻗﯩﻘﯩﻲ ﺋﯧﺮﯨﺸﻪﻟﯩﮕﻪﻥ ﻛﯩﺸﻰ ﺋﯩﺪﯦﺌﻮﻟﻮﮔﯩﻴﯩﻨﻰ ﺧﯩﻠﻤﯘ ﺧﯩﻞ ﭘﺎﺳﯩﻠﻼﺭ ﺑﯩﻠﻪﻥ ﺑﯚﻟﯜﯞﻩﺗﻤﻪﻳﺪﯗ ، ﺟﯜﻣﻠﯩﺪﯨﻦ ﭘﻪﻥ ﺑﯩﻠﻪﻥ ﺳﻪﻧﻪﺗﻨﻰ ﺑﯩﺮ - ﺑﯩﺮﮔﻪ ﻳﯧﻘﯩﻦ ﻛﻪﻟﻤﻪﻳﺪﯨﻐﺎﻥ ﻗﺎﺭﯨﻤﯘ ﻗﺎﺭﺷﻰ ﻗﯘﺗﯘﭘﻼﺭﻏﺎ ﺋﺎﻳﻼﻧﺪﯗﺭﯗﭖ ﻗﻮﻳﻤﺎﻳﺪﯗ . ﺑﯩﺮ ﻗﯩﺴﯩﻢ ﺋﯧﺴﺘﯧﺘﯩﻜﻼﺭ ﺳﻪﻧﻪﺗﻨﻰ ﺑﯩﯟﺍﺳﯩﺘﻪ ﺳﯧﺰﯨﻤﻨﯩﯔ ﻣﻪﻫﺴﯘﻟﻰ ، ﺩﻩﭖ ﻗﺎﺭﺍﻳﺪﯗ ( ﻣﻪﺳﯩﻠﻪﻥ ، ﻛﺮﻭﭼﻰ ) ؛ ﺋﻮﺧﺸﺎﺷﻼ ﺑﯩﺮ ﻗﯩﺴﯩﻢ ﺋﺎﻟﯩﻤﻼﺭﻣﯘ ﭘﻪﻥ ﺳﺎﻫﻪﺳﯩﺪﯨﻜﻰ ﻳﯧﯖﻰ ﺑﺎﻳﻘﺎﺷﻼﺭﻧﻰ ﺑﯩﯟﺍﺳﯩﺘﻪ ﺳﯧﺰﯨﻢ ﺑﯩﻠﻪﻥ ﭼﯜﺷﻪﻧﺪﯛﺭﯨﺪﯗ ( ﻣﻪﺳﯩﻠﻪﻥ ، ﺋﯧﻴﻨﯩﺸﺘﯧﻴﯩﻦ ) . ﻧﯩﺴﭙﯩﻴﻠﯩﻚ ﻧﻪﺯﻩﺭﯨﻴﯩﺴﻰ ﺩﯗﻧﻴﺎﻏﺎ ﻛﯧﻠﯩﺸﺘﯩﻦ ﺑﯘﺭﯗﻥ ، ﺋﯧﻨﯩﺸﺘﯧﻴﯩﻨﺪﺍ ﻣﯘﻧﺪﺍﻕ ﺑﯩﺮ ﺋﺎﻻﻣﻪﺕ ﻛﯚﺭﯛﻟﮕﻪﻥ ﺋﯩﻜﻪﻥ : ﺑﯩﺮ ﻛﯜﻧﻰ ﺋﻪﺗﯩﮕﯩﻨﻰ ﺋﯧﻴﻨﯩﺸﺘﯧﻴﯩﻦ ﺋﯘﺧﻼﺵ ﻛﯩﻴﯩﻤﻰ ﺑﯩﻠﻪﻧﻼ ﺗﺎﻣﺎﻕ ﺷﯩﺮﻩﺳﯩﻨﯩﯔ ﺋﺎﻟﺪﯨﻐﺎ ﻛﻪﻟﮕﻪﻥ . ﻟﯧﻜﯩﻦ ، ﻫﯧﭽﻨﻪﺭﺳﻪ ﻳﯧﻤﯩﮕﻪﻥ . ﺋﯘﻧﯩﯔ ﭼﯩﺮﺍﻳﯩﺪﺍ ﺑﯩﺮ ﺧﯩﻞ ﺑﯩﺌﺎﺭﺍﻣﻠﯩﻖ ﺋﻪﻛﺲ ﺋﯧﺘﯩﭗ ﺗﯘﺭﻏﺎﻥ . ﺋﯘ ﺑﯩﺮ ﺋﯩﺴﺘﺎﻛﺎﻥ ﻗﻪﻫﯟﻩﻧﻰ ﺯﻭﺭﻻﭖ ﺋﯩﭽﻜﻪﻧﺪﯨﻦ ﻛﯧﻴﯩﻦ ﭘﯩﺌﺎﻧﯩﻨﻮﻧﯩﯔ ﺋﺎﻟﺪﯨﺪﺍ ﺑﯩﺮ ﻫﺎﺯﺍ ﺋﻮﻟﺘﯘﺭﯗﭖ ﻛﻪﺗﻜﻪﻥ ، ﺋﺎﺭﻗﯩﺪﯨﻨﻼ ﭘﯩﺌﺎﻧﯩﻨﻮﻧﻰ ﺯﻭﻕ - ﺷﻮﺥ ﺑﯩﻠﻪﻥ ﭼﺎﻟﻐﺎﻥ . ﺋﯘ ﭘﯩﺌﺎﻧﯩﻨﻮﻧﻰ ﭼﯧﻠﯩﺸﺘﯩﻦ ﺗﻮﺧﺘﺎﭖ ﺋﺎﻳﺎﻟﯩﻐﺎ : "" ﺋﺎﺟﺎﻳﯩﭗ ﺑﯩﺮ ﺋﻮﻱ ، ﻟﯧﻜﯩﻦ ﺩﻩﭖ ﺑﯧﺮﯨﺶ ﺗﻮﻟﯩﻤﯘ ﻗﯩﻴﯩﻦ "" ﺩﯦﮕﻪﻥ - ﻳﯘ ، ﻫﯧﭽﻜﯩﻤﻨﯩﯔ ﺋﯩﺸﯩﻚ ﭼﻪﻛﻤﻪﺳﻠﯩﻜﯩﻨﻰ ﺗﺎﭘﯩﻼﭖ ﻛﯘﺗﯘﺑﺨﺎﻧﯩﺴﯩﻐﺎ ﻛﯩﺮﯨﭗ ﻛﻪﺗﻜﻪﻥ . ﺷﯘﻧﺪﯨﻦ ﺑﺎﺷﻼﭖ ﺋﯩﻜﻜﻰ ﻫﻪﭘﺘﯩﺪﯨﻦ ﻛﯧﻴﯩﻨﻼ ﺩﯗﻧﻴﺎﻧﻰ ﺯﯨﻠﺰﯨﻠﯩﮕﻪ ﻛﻪﻟﺘﯜﺭﮔﻪﻥ ﻧﯩﺴﭙﯩﻴﻠﯩﻚ ﻧﻪﺯﻩﺭﯨﻴﯩﺴﯩﻨﻰ ﯞﯗﺟﯘﻗﺎ ﭼﯩﻘﺎﺭﺩﻯ .

1926 - ﻳﯩﻠﻰ ﺋﯧﻴﻨﯩﺸﺘﯧﻴﯩﻦ ﺋﺎﻣﯧﺮﯨﻜﯩﻨﯩﯔ ﻛﺎﻟﯩﻔﻮﺭﻧﯩﻴﻪ ﺷﺘﺎﺗﯩﺪﺍ ﻟﯧﻜﺴﯩﻴﻪ ﺳﯚﺯﻟﻪﯞﺍﺗﻘﺎﻧﺪﺍ ، ﭼﺎﺭﻟﯩﺰ ﭼﺎﭘﻠﯩﻦ ﺑﯩﻠﻪﻥ ﺋﯘﭼﺮﺍﺷﻘﺎﻥ ﺋﯩﺪﻯ . ﭼﺎﭘﻠﯩﻦ ﻧﯩﺴﭙﯩﻴﻠﯩﻚ ﻧﻪﺯﻩﺭﯨﻴﯩﺴﯩﻨﯩﯔ ﻗﺎﻧﺪﺍﻕ ﻣﻪﻳﺪﺍﻧﻐﺎ ﻛﻪﻟﮕﻪﻧﻠﯩﻜﯩﻨﻰ ﺳﻮﺭﯨﻐﺎﻧﺪﺍ ، ﺋﯧﻴﻨﯩﺸﺘﯧﻴﯩﻨﻨﯩﯔ ﺧﺎﻧﯩﻤﻰ ﻳﯘﻗﯩﺮﯨﻘﯩﻼﺭﻧﻰ ﺳﯚﺯﻟﻪﭖ ﺑﻪﺭﮔﻪﻥ . ﺑﯘﻧﻰ ﺋﺎﯕﻠﯩﻐﺎﻥ ﭼﺎﭘﻠﯩﻦ ﻗﺎﻳﯩﻞ ﺑﻮﻟﯘﭖ : "" ﺋﯧﻴﻨﯩﺸﺘﯧﻴﯩﻦ ﺋﻪﭘﻪﻧﺪﻯ ، ﺳﯩﺰ ﻫﻪﻗﯩﻘﻪﺗﻪﻥ ﺑﯩﺮ ﺭﻭﻣﺎﻧﺘﯩﺰﻣﭽﻰ ﺳﻪﻧﻪﺗﻜﺎﺭ ﺋﯩﻜﻪﻧﺴﯩﺰ "" ﺩﯦﮕﻪﻥ .

ﭼﺎﭘﻠﯩﻦ ﻧﺎﻫﺎﻳﯩﺘﻰ ﺗﻮﻏﺮﺍ ﺋﯧﻴﺘﻘﺎﻥ . ﺗﻪﭘﻪﻛﻜﯘﺭ ﺟﻪﻫﻪﺗﺘﯩﻦ ﻟﯩﺮﯨﻚ ﺷﯧﺌﯩﺮﻏﺎ ﺋﻮﺧﺸﺎﭖ ﻛﯧﺘﯩﺪﯨﻐﺎﻥ ﻧﯩﺴﭙﯩﻴﻠﯩﻚ ﻧﻪﺯﻩﺭﯨﻴﯩﺴﻰ ﺋﺎﻟﻪﻡ ﻓﯩﺰﯨﻜﯩﺴﯩﺪﯨﻜﻰ ﻣﯘﺗﻠﻪﻕ ، ﺭﻭﺷﻪﻥ ﺋﯘﻗﯘﻣﻼﺭﻧﯩﯔ ﺋﺎﻟﻪﻣﻨﯩﯔ ﻫﻪﺭﯨﻜﻪﺕ ﻗﯘﺭﯗﻟﻤﯩﺴﯩﺪﯨﻜﻰ ﺋﻪﻣﻪﻟﯩﻴﻪﺗﻜﻪ ﻗﻮﻳﯘﺷﻰ ﺋﺎﺭﻗﯩﻠﯩﻖ ﻣﻪﯞﺟﯘﺗﻠﯘﻕ ﯞﻩ ﺋﯘﻗﯘﻣﺪﯨﻜﻰ ﻧﯩﺴﭙﯩﻴﻠﯩﻚ ﻗﺎﻧﯘﻧﯩﻴﯩﺘﯩﻨﻰ ﭼﯜﺷﻪﻧﺪﯛﺭﯛﭖ ﺑﻪﺭﺩﻯ . ﻣﺎﻧﺎ ﺑﯘ ﻳﯜﻛﺴﻪﻙ ﺋﻪﻗﻠﯩﻴﻠﯩﻜﺘﯩﻦ ﻛﻪﻟﮕﻪﻥ ﺑﯩﯟﺍﺳﯩﺘﻪ ﺳﯧﺰﯨﻢ ﯞﻩ ﺋﺎﻻﻫﯩﺪﻩ ﺳﻪﻧﻪﺕ .

ﻧﻪﺯﻩﺭﯨﻴﻪ ﻧﯧﻤﻪ ﺋﯜﭼﯜﻥ ﻣﯘﻫﯩﻢ ؟ ﭼﯜﻧﻜﻰ ، ﺋﯘ ﺋﻪﻣﻪﻟﯩﻴﻪﺕ ﺑﯩﻠﻪﻥ ﺋﯩﺰﭼﯩﻞ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﯘﭖ ﺗﯘﺭﯨﺪﯗ . ﺋﺎﻻﻳﻠﯘﻕ ، ﻣﺎﺗﯧﻤﺎﺗﯩﻜﯩﺪﯨﻜﻰ ﺋﯘﻗﯘﻣﻼﺭ ﯞﻩ ﻓﻮﺭﻣﯘﻟﯩﻼﺭ ﻗﺎﺭﯨﻤﺎﻗﻘﺎ ﻣﯘﺗﻠﻪﻕ ﯞﻩ ﺭﻭﺷﻪﻧﺪﻩﻙ ﻛﯚﺭﯛﻧﯩﺪﯗ . ﺑﯩﺮﺍﻕ ، ﺑﯩﺰ ﺋﯘﻧﻰ ﭼﻪﻛﺴﯩﺰ ﺋﺎﻟﻪﻣﺪﯨﻦ ﺋﯩﺒﺎﺭﻩﺕ ﺋﺎﺭﻗﺎ ﻛﯚﺭﯛﻧﯘﺷﻰ ﺑﯩﻠﻪﻥ ﺑﺎﻏﻼﭖ ﻗﺎﺭﯨﺴﺎﻕ ، ﺋﯘﻧﯩﯖﺪﯨﻜﻰ ﻣﯘﺗﻠﻪﻗﻠﯩﻖ ﯞﻩ ﺭﻭﺷﻪﻧﻠﯩﻚ ﻳﻮﻗﯩﻠﯩﭗ ، ﻧﯩﺴﭙﯩﻴﻠﯩﻚ ﯞﻩ ﻏﯘﯞﺍﻟﯩﻘﻘﺎ ﺋﺎﻳﻠﯩﻨﯩﺪﯗ . ﺑﯩﺮﺍﻕ ، ﺋﻪﻣﻪﻟﯩﻴﻪﺗﻨﻰ ﭼﯜﺷﯩﻨﯩﺶ ﺋﯜﭼﯜﻥ ﺋﯘﻗﯘﻡ ، ﺋﻪﻧﺪﯨﺰﻩ (ﻣﻮﺩﯦﻞ ) ﯞﻩ ﻓﻮﺭﻣﯘﻻ ﻗﺎﺗﺎﺭﻟﯩﻖ ﺋﻪﻗﯩﻞ ﺋﺎﻻﻣﻪﺗﻠﯩﺮﻯ ﺑﯩﻠﻪﻥ ﺗﻮﻟﻐﺎﻥ ﭘﻪﯞﻗﯘﻻﺩﺩﻩ ﺗﯩﻞ ( ﻛﻪﺳﭙﯩﻲ ﺗﯩﻞ ) ﻛﯧﺮﻩﻙ . ﺑﯘ ﺗﯩﻞ ﻣﺎﻫﯩﻴﻪﺗﺘﻪ ﺑﯩﺰﻧﯩﯔ ﺋﻪﻣﻪﻟﯩﻴﻪﺕ ﺑﯩﻠﻪﻥ ﺑﻮﻟﻐﺎﻥ ﻣﻪﻧﯩﯟﻯ ﻣﯘﻧﺎﺳﯩﯟﯨﺘﯩﻤﯩﺰﻧﯩﯔ ﻫﺎﻟﻘﯩﻠﯩﺮﻯ ﺑﻮﻟﯘﭖ ، ﻣﯘﻛﻪﻣﻤﻪﻟﻠﯩﻚ ﯞﻩ ﻫﻪﻗﯩﻘﻪﺗﻜﻪ ﻳﯧﺘﯩﺸﺘﯩﻦ ﺋﯩﺒﺎﺭﻩﺕ ﻏﺎﻳﻪ ﺋﺎﺭﻗﯩﻠﯩﻖ ﮔﯜﺯﻩﻟﻠﯩﻚ ﻗﯩﻤﻤﯩﺘﯩﮕﻪ ﺋﯧﺮﯨﺸﯩﺪﯗ . ﺋﻮﻣﯘﻣﻪﻥ ، ﻣﺎﺗﯧﻤﺎﺗﯩﻜﯩﻨﯩﯔ ﺭﯦﺌﺎﻟﻠﯩﻖ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﻰ ﭼﯩﻨﻠﯩﻖ ﺋﯜﺳﺘﯩﮕﻪ ﻗﯘﺭﯗﻟﯩﺪﯗ . ﺳﻪﻧﻪﺗﻨﯩﯔ ﻏﺎﻳﻪ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﻰ ﮔﯜﺯﻩﻟﻠﯩﻚ ﺋﯜﺳﺘﯩﮕﻪ ﻗﯘﺭﯗﻟﯩﺪﯗ . ﭼﯩﻨﻠﯩﻖ _ ﮔﯜﺯﻩﻟﻠﯩﻚ ﺩﯦﻤﻪﻛﺘﯘﺭ . ﻣﺎﺗﯧﻤﺎﺗﯩﻜﺎ ﺑﯩﻠﻪﻥ ﺳﻪﻧﻪﺕ ﺗﻪﭘﻪﻛﻜﯘﺭ ﺷﻪﻛﻠﯩﺪﻩ ﺑﺎﺷﻘﺎ - ﺑﺎﺷﻘﺎ ﺑﻮﻟﺴﯩﻤﯘ ، ﻳﯘﻗﯩﺮﯨﻘﻰ ﻧﯘﻗﺘﯩﻼﺭﺩﺍ ﺑﯩﺮ ﺧﯩﻞ ﺋﻮﺭﺗﺎﻗﻠﯩﻘﻨﻰ ﺋﯩﭙﺎﺩﯨﻠﻪﻳﺪﯗ .

ﻣﺎﺗﯧﻤﺎﺗﯩﻜﺎ ﺋﯚﺯﯨﻨﯩﯔ ﺋﯩﭙﺘﯩﺪﺍﺋﯩﻲ ﺑﺎﺳﻘﯘﭼﯩﺪﺍ ﻣﻮﻝ ﺋﯧﺴﺘﯧﺘﯩﻜﯩﻠﯩﻖ ﻣﻪﺯﻣﯘﻥ ﯞﻩ ﺋﯧﺴﺘﯧﺘﯩﻚ ﺋﺎﻻﻫﯩﺪﯨﻠﯩﻜﻜﻪ ﺋﯩﮕﻪ ﺋﯩﺪﻯ . ﻟﯧﻜﯩﻦ ، ﻛﯧﻴﯩﻨﯩﻜﻰ ﺩﻩﯞﺭﻟﻪﺭﮔﻪ ﻛﻪﻟﮕﻪﻧﺪﻩ ، ﭘﻪﻧﻠﻪﺭ ﺗﻪﺭﻩﻗﻘﯩﻲ ﻗﯩﻠﯩﭗ ، ﻣﺎﺗﯧﻤﺎﺗﯩﻜﺎ ، ﺋﯧﺘﯩﻜﺎ ، ﺋﯧﺴﺘﯧﺘﯩﻜﺎ ﻗﺎﺗﺎﺭﻟﯩﻘﻼﺭ ﺋﺎﻳﺮﯨﻢ ﭘﻪﻧﻠﻪﺭ ﺳﯜﭘﯩﺘﯩﺪﻩ ﺑﯩﺮ - ﺑﯩﺮﯨﺪﯨﻦ ﻳﯩﺮﺍﻗﻼﺷﺘﯘﺭﯗﻟﯘﭖ ، ﻧﻮﻗﯘﻝ ﺋﯚﺯﻟﯩﺮﯨﻨﯩﯔ ﺩﺍﺋﯩﺮﯨﺴﯩﮕﻪ ﭼﯜﺷﯜﭖ ﻗﻮﻳﯘﻟﺪﻯ . ﻧﻪﺗﯩﺠﯩﺪﻩ ، ﻣﺎﺗﯧﻤﺎﺗﯩﻜﺎ ﺋﯩﺴﺘﯧﻤﺎﻟﺪﯨﻦ ﺋﯩﺒﺎﺭﻩﺕ ﺗﺎﺭ ﺩﺍﺋﯩﺮﯨﺪﻩ ﭼﯜﺷﯩﻨﯩﻠﺪﻯ . ﻣﺎﺗﯧﻤﺎﺗﯩﻜﺎ ﺗﻪﺭﻩﻗﻘﯩﻲ ﻗﯩﻠﯩﭗ ، ﺑﯜﮔﯜﻧﻜﻰ ﺩﻩﯞﺭﮔﻪ ﻛﻪﻟﮕﻪﻧﺪﻩ ، ﻳﯘﻗﯩﺮﯨﻘﻰ ﭘﻪﻧﻠﻪﺭ ﺑﯩﻠﻪﻥ ﺗﯘﺗﯩﺸﯩﭗ ، ﺋﯚﺯﯨﻨﯩﯔ ﺋﯩﭙﯩﺪﺍﺋﯩﻲ ﺑﺎﺳﻘﯘﭼﯩﺪﯨﻜﻰ ﻣﻪﻧﯩﺴﻰ ﺋﯜﺳﺘﯩﺪﻩ ﻗﺎﻳﺘﺎ ﺋﻮﻳﻠﯩﻨﯩﺪﯨﻐﺎﻥ ﺑﻮﻟﺪﻯ . ﻣﺎﺗﯧﻤﺎﺗﯩﻜﺎ ﭘﻼﺗﻮﻥ ، ﭘﯩﻔﺎﮔﻮﺭﻻﺭ ﺩﻩﯞﺭﯨﮕﻪ ﻗﺎﻳﺘﺘﻰ . ﺋﯘﻻﺭ ﭘﻪﻧﻨﯩﯔ ﺋﺎﺷﯘ ﺳﺎﺩﺩﺍ ﺩﻩﯞﺭﯨﺪﻩ ﺗﯘﺭﯗﭘﻤﯘ ، ﻣﺎﺗﯧﻤﺎﺗﯩﻜﯩﻨﯩﯔ ﻏﺎﻳﻪ ﯞﻩ ﮔﯜﺯﻩﻟﻠﯩﻚ ﺋﯜﺳﺘﯩﺪﯨﻜﻰ ﺋﯩﺰﺩﯨﻨﯩﺸﺘﻪ ﻣﯘﻫﯩﻢ ﺭﻭﻝ ﺋﻮﻳﻨﺎﻳﺪﯨﻐﺎﻧﻠﯩﻘﻨﻰ ﺗﻮﻧﯘﭖ ﻳﻪﺗﻜﻪﻥ . ﺑﯘﻧﻰ ﺗﻮﻧﯘﭖ ﻳﻪﺗﻤﯩﮕﻪﻧﻠﻪﺭﻧﻰ ﭘﻼﺗﻮﻥ "" ﭼﻮﺷﻘﺎ "" ﺩﻩﭖ ﺳﯜﭘﻪﺗﻠﯩﮕﻪﻥ ، ﻫﻪﺗﺘﺎ ﺋﯘ ﺋﯚﺯﻯ ﻣﯘﺩﻩﺭﺭﯨﺴﻠﯩﻚ ﻗﯩﻠﯩﺪﯨﻐﺎﻥ ﻣﻪﺩﺭﯨﺴﻨﯩﯔ ﺩﻩﺭﯞﺍﺯﯨﺴﯩﻐﺎ "" ﮔﯧﺌﻮﻣﯧﺘﯩﺮﯨﻴﻪ ﺑﯩﻠﻤﯩﮕﻪﻧﻠﻪﺭﻧﯩﯔ ﻛﯩﺮﯨﺸﯩﮕﻪ ﺭﯗﺧﺴﻪﺕ ﻳﻮﻕ "" ﺩﯦﮕﻪﻥ ﭘﻼﻛﺎﺗﻨﻰ ﺋﯧﺴﯩﭗ ﻗﻮﻳﻐﺎﻥ .

ﺑﯘ ﺑﯩﺮ ﭘﺎﺭﭼﻪ ﺷﯧﺌﯩﺮ ﻳﺎﻛﻰ ﺑﯩﺮ ﭘﺎﺭﭼﻪ ﺭﻩﺳﯩﻢ ﺋﯜﺳﺘﯩﺪﻩ ﻛﯧﻜﻪﭼﻠﻪﯞﺍﺗﯩﻤﯩﺰ . ﺋﯘﻧﺪﺍﻗﺘﺎ ، ﺗﻪﭘﻪﻛﻜﯘﺭ ﮔﯜﺯﻩﻟﻠﯩﻜﻰ ﺋﯜﺳﺘﯩﺪﯨﻜﻰ ﻣﯘﻫﺎﻛﯩﻤﯩﺪﯨﻦ ﺳﯚﺯ ﺋﺎﭼﻘﯩﻠﻰ ﺑﻮﻻﺗﺘﯩﻤﯘ ؟ !

ﻫﻪﺭ ﺧﯩﻞ ﭼﯩﮕﯩﺶ ﺋﺎﻣﯩﻠﻼﺭﻧﯩﯔ ﻣﯘﺭﻩﻛﻜﻪﭖ ﺭﻭﻟﻰ ﺗﺎﺭﯨﺨﺘﯩﻜﻰ ﺋﺎﺟﺎﻳﯩﭗ ﺯﻭﺭ ﺗﺎﺳﺎﺩﯨﭙﯩﻴﻠﯩﻘﻼﺭﻧﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯗ . ﺷﯘﯕﺎ ، ﺗﺎﺭﯨﺨﻨﻰ ﻧﻮﻗﯘﻝ ﺳﻪﻧﻪﺕ ﺑﯩﻠﻪﻧﻼ ﻳﺎﺭﺍﺗﻘﯩﻠﻰ ، ﺋﯩﺰﺍﻫﻠﯩﻐﯩﻠﻰ ﺑﻮﻟﻤﺎﻳﺪﯗ . ﻧﻮﻗﯘﻝ ﻏﻪﻳﺮﯨﻲ ﺳﻪﻧﻪﺕ ﻳﻮﻟﯩﻤﯘ ﻣﻪﯕﮕﯜﻟﯜﻙ ﺑﻮﻻﻟﻤﺎﻳﺪﯗ . ﺑﯘﻻﺭﻧﻰ ﭼﻮﻗﯘﻡ ﺑﯩﺮ- ﺑﯩﺮﯨﻨﻰ ﺋﺎﺭﻗﺎ ﻛﯚﺭﯛﻧﯘﺵ ﻗﯩﻠﯩﺶ ﻛﯧﺮﻩﻙ . ﺷﻪﻳﺘﺎﻥ ﺑﻮﻟﻤﯩﻐﺎﻥ ﺑﻮﻟﺴﺎ ﺋﻪﻗﯩﻞ ﻣﯧﯟﯨﺴﯩﻨﻰ ﻳﯧﻴﯩﺸﯩﻤﯩﺰ ﻧﺎﺗﺎﻳﯩﻦ ﺑﻮﻻﺭ ﺋﯩﺪﻯ ، ﺋﻪﻗﯩﻞ ﺑﻮﻟﻤﯩﻐﺎﻥ ﺑﻮﻟﺴﺎ ﺷﻪﻳﺘﺎﻧﻨﻰ ﻳﯧﯟﻩﺗﻜﻪﻥ ﺑﻮﻻﺗﺘﯘﻕ . ﺑﯩﺮﺍﻕ ، ﺑﯩﺰ ﻫﺎﺯﯨﺮﻗﻰ ﺷﺎﺭﺍﺋﯩﺘﺘﺎ ، ﺋﻪﻗﯩﻠﮕﻪ ﻛﯚﭘﺮﻩﻙ ﻣﻮﻫﺘﺎﺝ .

ﺑﯩﺮ ﻣﯩﻠﻠﻪﺗﺘﻪ ، ﺑﯩﺮ ﺩﻩﯞﺭﺩﻩ ﻛﯩﺸﯩﻠﻪﺭ ﻛﯜﺗﻜﻪﻥ ﺑﯩﺮ ﺳﻪﻧﻪﺗﻜﺎﺭ ، ﺑﯩﺮ ﺋﺎﻟﯩﻢ ، ﺑﯩﺮ ﭘﻪﻳﻼﺳﻮﭖ ﻣﻪﻳﺪﺍﻧﻐﺎ ﻛﯧﻠﯩﺪﯨﻐﺎﻥ ، ﺷﯘ ﻣﯩﻠﻠﻪﺕ ،ﺷﯘ ﺩﻩﯞﺭ ﺋﯜﭺ ﺩﺍﻧﻜﻮﻧﯩﯔ ﻳﯜﺭﯨﻜﯩﮕﻪ ﺋﯩﮕﻪ ﺑﻮﻟﯩﺪﯗ .

1994 - ﻳﯩﻞ

( "" ﺋﺎﺑﺪﯗﻗﺎﺩﯨﺮ ﺟﺎﻻﻟﯩﺪﯨﻦ ﻣﺎﻗﺎﻟﯩﻠﯩﺮﻯ "" ﻧﺎﻣﻠﯩﻖ ﻛﯩﺘﺎﺑﺪﯨﻦ ﺋﯧﻠﯩﻨﺪﻯ )