ﺩﻭﻻﻧﻠﯩﻘﻼﺭﻧﯩﯔ ﻗﻮﻱ ﻣﻪﺩﻩﻧﯩﻴﯩﺘﻰ

ﺋﯘﺯﺍﻕ ﯞﻩ ﭘﺎﺭﻻﻕ ﻣﻪﺩﻩﻧﯩﻴﻪﺕ ﺗﺎﺭﯨﺨﯩﻐﺎ ﺋﯩﮕﻪ ﺋﯘﻳﻐﯘﺭﻻﺭﻧﯩﯔ ﻗﻪﺩﯨﻤﯩﻲ ﻗﻪﺑﯩﻠﯩﺮﯨﻨﯩﯔ ﺑﯩﺮﻯ ﺑﻮﻟﻐﺎﻥ ﺩﻭﻻﻧﻠﯩﻘﻼﺭﻧﯩﯔ ﻗﻮﻱ ﻣﻪﺩﻩﻧﯩﻴﯩﺘﻰ ﺋﺎﭘﺘﻮﻧﯘﻡ ﺭﺍﻳﻮﻥ ﺗﻪﯞﻩﺳﯩﺪﯨﻜﻰ ﺑﺎﺷﻘﺎ ﻫﻪﺭﻗﺎﻧﺪﺍﻕ ﺋﻮﺭﯗﻧﻼﺭﻧﯩﯖﻜﯩﺪﯨﻦ ﺭﻭﺷﻪﻥ ﭘﻪﺭﻗﻠﯩﻨﯩﭗ ﺗﯘﺭﯨﺪﯨﻐﺎﻥ ﺑﻮﻟﻐﺎﭼﻘﺎ ، ﺑﯘ ﻫﻪﻗﺘﯩﻜﻰ ﺋﯩﺰﺩﯨﻨﯩﺸﻠﯩﺮﯨﻤﻨﯩﯔ ﺩﻩﺳﻠﻪﭘﻜﻰ ﻫﺎﺳﯩﻼﺗﻠﯩﺮﯨﻨﻰ ﻛﻪﯓ ﺋﻮﻗﯘﺭﻣﻪﻧﻠﻪﺭﻧﯩﯔ ﻣﯘﻻﻫﯩﺰﯨﺴﯩﮕﻪ ﺳﯘﻧﯘﺷﻨﻰ ﻻﻳﯩﻖ ﺗﺎﭘﺘﯩﻢ . ﻫﻪﻣﻤﯩﮕﻪ ﺋﺎﻳﺎﻧﻜﻰ ، ﻗﻮﻱ ﺋﯩﻨﺴﺎﻧﻼﺭ ﺗﺎﺭﯨﺨﯩﺪﯨﻜﻰ ﺋﻪﯓ ﺑﺎﻟﺪﯗﺭ ﻗﻮﻟﻐﺎ ﻛﯚﺭﻧﺪﯛﺭﯛﻟﮕﻪﻥ ﻫﺎﻳﯟﺍﻧﻼﺭﻧﯩﯔ ﺑﯩﺮﻯ . ﺑﯘﻧﯩﯖﺪﯨﻦ ﻣﯩﯔ ﻳﯩﻞ ﺑﯘﺭﯗﻥ ﻳﯧﺰﯨﻠﻐﺎﻥ ﻳﯧﺰﯨﻠﻐﺎﻥ "ﺗﯜﺭﻛﯩﻲ ﺗﯩﻠﻼﺭ ﺩﯨﯟﺍﻧﻰ" ﺩﯨﻜﻰ ﻗﻮﻳﻐﺎ ﻣﯘﻧﺎﺳﯩﯟﻩﺗﻠﯩﻚ ﺳﯚﺯ - ﺋﯩﺒﺎﺭﯨﻠﻪﺭﺩﯨﻦ ، ﻫﻪﻣﺪﻩ ﻣﯘﻧﺪﯨﻦ 6400 ﻳﯩﻞ ﺑﯘﺭﯗﻥ ﺩﻩﭖ ﻳﻪﻛﯜﻥ ﭼﯩﻘﯩﺮﯨﻠﻐﺎﻥ "ﻛﺮﻭﺭﺍﻥ ﮔﯜﺯﯨﻠﻰ" ﻧﯩﯔ ﻗﻪﺑﺮﯨﺴﯩﺪﯨﻜﻰ ﻗﻮﻱ ﻳﯘﯕﯩﺪﯨﻦ ﺗﻮﻗﯘﻟﻐﺎﻥ ﺑﻮﻳﯘﻣﻼﺭﺩﯨﻦ ﻛﯚﺭﯛﯞﯦﻠﯩﺸﻘﺎ ﺑﻮﻟﯩﺪﯗﻛﻰ ، ﻗﻮﻱ ﻗﻪﺩﯨﻤﻜﻰ ﺋﻪﺟﺪﺍﺩﻟﯩﺮﯨﻤﯩﺰﻧﯩﯔ ﻣﻪﺩﻩﻧﯩﻴﻪﺕ ﺗﺎﺭﯨﺨﯩﺪﺍ ﻣﯘﻫﯩﻢ ﺋﻮﺭﯗﻥ ﺗﯘﺗﻘﺎﻥ . ﺋﺎﺗﺎ- ﺑﻮﯞﯨﻠﯩﺮﯨﻤﯩﺰ ﻗﻮﻳﻨﯩﯔ ﮔﯚﺷﯩﺪﯨﻦ ﺋﻮﺯﯗﻗﻠﯘﻕ ﺳﯜﭘﯩﺘﯩﺪﻩ ﭘﺎﻳﺪﯨﻼﻧﻐﺎﻧﺪﯨﻦ ﺑﺎﺷﻘﺎ ، ﺗﯧﺮﯨﺴﯩﺪﯨﻦ ﺗﯘﻣﺎﻕ ، ﺟﯘﯞﺍ ﻗﺎﺗﺎﺭﻟﯩﻖ ﻛﯩﻴﯩﻤﻠﻪﺭﻧﻰ ﺗﯩﻜﯩﭗ ، ﻛﯩﮕﯩﺰ ، ﮔﯩﻠﻪﻡ ، ﺧﯘﺭﺟﯘﻥ ﻗﺎﺗﺎﺭﻟﯩﻖ ﺗﯘﺭﻣﯘﺵ ﺑﻮﻳﯘﻣﻠﯩﺮﯨﻨﻰ ﺗﻮﻗﯘﭖ ﺋﯩﺸﻠﻪﺗﻜﻪﻥ . ﻫﻪﺗﺘﺎ ﺗﯚﯞﻩﻧﺪﯨﻜﻰ ﺭﯗﺑﺎﺋﯩﻴﺪﺍ ﻗﻪﻳﺖ ﻗﯩﻠﯩﻨﻐﺎﻧﺪﻩﻙ ، ﻗﻮﻱ ﺋﯜﭼﯩﻴﯩﺪﯨﻦ ﺭﺍﯞﺍﭖ - ﺩﯗﺗﺎﺭﻻﺭﻏﺎ ﺗﺎﺭ ﺋﯧﺸﯩﭗ ﺳﯧﻠﯩﭗ ، ﺋﯩﻨﺴﺎﻥ ﺭﻭﻫﯩﺪﯨﻜﻰ ﺋﻪﯓ ﻣﯘﻗﻪﺩﺩﻩﺱ ﺗﯘﻳﻐﯘ ﺑﻮﻟﻐﺎﻥ ﺳﯚﻳﮕﯜ - ﻣﯘﻫﻪﺑﺒﻪﺗﻨﻰ ﻛﯜﻳﻠﻪﺷﻨﻰ ﺑﯩﻠﮕﻪﻥ : ﺋﯚﻱ - ﺋﯚﻳﺪﻩ ﺳﻮﺭﯗﻧﻨﯩﯔ ﺗﯚﺭﯨﺪﻩ ﺩﯗﺗﺎﺭ ، ﭼﺎﻟﯩﺪﯗ ﻗﻮﻱ ﻛﯚﺯﻟﯜﻙ ﺟﺎﻧﺎﻥ ﯞﺍﭘﺎﺩﺍﺭ . ﺩﯗﺗﺎﺭﻧﯩﯔ ﻧﻪﻗﯩﺸﻰ ﻗﻮﻳﻼﺭ ﺳﯚﯕﯩﻜﻰ ، ﺋﯜﭼﯩﻴﻰ ﻣﯘﯓ ﺗﯚﻛﻜﻪﻥ ﺋﺎﺷﯘ ﺑﯩﺮ ﺟﯜﭖ ﺗﺎﺭ . ﺋﻪﺳﻠﻰ ﺗﯧﻤﯩﻐﺎ ﻗﺎﻳﺘﺴﺎﻕ ، ﺩﻭﻻﻧﻠﯩﻘﻼﺭ ﮔﻪﺭﭼﻪ ﺋﯘﻳﻐﯘﺭ ﺧﻪﻟﻘﯩﻨﯩﯔ ﻗﻪﺩﯨﻤﯩﻲ ﻗﻪﺑﯩﻠﯩﻠﯩﺮﯨﻨﯩﯔ ﺑﯩﺮﻯ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ ، ﺋﻮﺧﺸﺎﺷﻼ ﺋﻮﯞﭼﯩﻠﯩﻖ ، ﭼﺎﺭﯞﯨﭽﯩﻠﯩﻖ ﯞﻩ ﺩﯦﻬﻘﺎﻧﭽﯩﻠﯩﻖ ﻗﺎﺗﺎﺭﻟﯩﻖ ﺗﺎﺭﯨﺨﯩﻲ ﺗﻪﺭﻩﻗﻘﯩﻴﺎﺕ ﺩﻩﯞﺭﯨﻨﻰ ﺑﺎﺷﺘﯩﻦ ﻛﻪﭼﯜﺭﮔﻪﻥ ﺑﻮﻟﺴﯩﻤﯘ ، ﻟﯧﻜﯩﻦ ﺋﯘﻻﺭ ﺋﺎﺳﺎﺳﻪﻥ ﺗﻪﻛﻠﯩﻤﺎﻛﺎﻥ ﮔﯩﺮﯞﻩﻛﻠﯩﺮﯨﺪﯨﻜﻰ ﺧﯩﻠﯟﻩﺕ ﺟﺎﻳﻼﺭﻧﻰ ﻣﺎﻛﺎﻥ ﻗﯩﻠﯩﭗ ﻳﺎﺷﺎﭖ ﻛﻪﻟﮕﻪﭼﻜﻪ ، ﭼﺎﺭﯞﯨﭽﯩﻠﯩﻘﺘﯩﻦ ﺩﯦﻬﻘﺎﻧﭽﯩﻠﯩﻘﻘﺎ ﺋﯚﺗﯜﺵ ﺩﻩﯞﺭﻯ ﻧﯩﺴﺒﻪﺗﻪﻥ ﻛﯧﻴﯩﻨﺮﻩﻙ ﺑﻮﻟﻐﺎﻥ . ﺭﻭﺷﻪﻧﻜﻰ ، ﺑﯘ ﻫﺎﻝ ﺋﯘﻻﺭﻧﯩﯔ ﺋﯚﺯﯨﮕﻪ ﺧﺎﺱ ﻗﻮﻱ ﻣﻪﺩﻩﻧﯩﻴﯩﺘﻰ ﻳﺎﺭﯨﺘﯩﺸﯩﺪﺍ ﺑﻪﻟﮕﯩﻠﯩﻚ ﺭﻭﻝ ﺋﻮﻳﻨﯩﻐﺎﻥ . ﺋﯘﻧﺪﺍﻗﺘﺎ ﺋﯘﻻﺭﻧﯩﯔ ﺋﯚﺯﯨﮕﻪ ﺧﺎﺱ ﺑﻮﻟﻐﺎﻥ ﻗﻮﻱ ﻣﻪﺩﻩﻧﯩﻴﯩﺘﻰ ﺯﺍﺩﻯ ﻧﯧﻤﻪ ؟ ﺋﯘﻧﯩﯔ ﺋﻪﺗﺮﺍﭘﯩﺪﯨﻜﻰ ﻗﯧﺮﯨﻨﺪﺍﺵ ﺋﻮﺭﯗﻧﻼﺭ ﺑﯩﻠﻪﻥ ﺑﻮﻟﻐﺎﻥ ﭘﻪﺭﻗﻰ ﻗﺎﻳﺴﯩﻼﺭ ؟ ﻧﺎﯞﺍﺩﺍ ﺑﯘ ﺳﯘﺋﺎﻟﻐﺎ ﺟﺎﯞﺍﭖ ﺑﯧﺮﯨﺸﻜﻪ ﺗﻮﻏﺮﺍ ﻛﻪﻟﺴﻪ "ﺩﻭﻻﻧﻠﯩﻘﻼﺭﻧﯩﯔ ﻗﻮﻱ ﻣﻪﺩﻩﻧﯩﻴﯩﺘﻰ ﺋﯘﻻﺭﻧﯩﯔ ﺩﻭﻻﻥ ﻗﻮﻳﯩﺪﯨﻦ ﺋﯩﺒﺎﺭﻩﺕ ﺋﻪﻻ ﺳﻮﺭﺗﻨﻰ ﻳﯧﺘﯩﺸﺘﯜﺭﯛﭘﻼ ﻗﺎﻟﻤﺎﺳﺘﯩﻦ ، ﺑﻪﻟﻜﻰ ﺋﯘﻧﻰ ﺋﻪﺭﻣﻪﻙ ﻫﺎﻳﯟﺍﻥ ﺩﻩﺭﯨﺠﯩﺴﯩﮕﻪ ﻛﯚﺗﯜﺭﮔﻪﻧﻠﯩﻜﯩﺪﻩ ﺋﯩﭙﺎﺩﯨﻠﯩﻨﯩﺪﯗ" ﺩﯦﻴﯩﺶ ﻣﯜﻣﻜﯩﻦ . ﻫﻪﻣﻤﯩﮕﻪ ﺋﺎﻳﺎﻧﻜﻰ ، ﺋﯩﻨﺴﺎﻧﻼﺭ ﻗﻮﻟﻐﺎ ﻛﯚﻧﺪﯛﺭﮔﻪﻥ ﻫﺎﻳﯟﺍﻧﻼﺭ ﺋﯩﭽﯩﺪﻩ ﺋﺎﺕ ، ﻛﻪﭘﺘﻪﺭ ، ﺋﯩﺖ ، ﻣﯜﺷﯜﻙ .... ﻗﺎﺗﺎﺭﻟﯩﻖ ﺋﺎﺯ ﺑﯩﺮ ﻗﯩﺴﯩﻢ ﻫﺎﻳﯟﺍﻧﻼﺭﻻ ﺋﻪﺭﻣﻪﻙ ﻫﺎﻳﯟﺍﻥ ﻫﯩﺴﺎﺑﻠﯩﻨﯩﺪﯗ . ﻗﻮﻱ ، ﻛﺎﻻ ، ﺋﯧﺸﻪﻙ ﻗﺎﺗﺎﺭﻟﯩﻖ ﻗﻮﻟﻐﺎ ﻛﯚﻧﺪﯛﺭﯛﻟﮕﻪﻥ ﺧﯧﻠﻰ ﻛﯚﭖ ﻫﺎﻳﯟﺍﻧﻼﺭ ﮔﻪﺭﭼﻪ ﺋﯩﻨﺴﺎﻧﻼﺭﻧﯩﯔ ﻛﯜﻧﺪﯨﻠﯩﻚ ﺗﯘﺭﻣﯘﺷﯩﺪﯨﻦ ﺋﺎﻳﺮﯨﻠﻤﯩﺴﯩﻤﯘ ، ﻟﯧﻜﯩﻦ ﺋﯘﻻﺭ ﺗﯧﺨﻰ ﺋﻪﺭﻣﻪﻙ ﻫﺎﻳﯟﺍﻥ ﻫﯩﺴﺎﺑﻼﻧﻤﺎﻳﺪﯗ . ﺋﻪﺭﻣﻪﻙ ﻫﺎﻳﯟﺍﻥ ﺩﻩﺭﯨﺠﯩﺴﯩﺴﯩﮕﻪ ﻛﯚﺗﯜﺭﯛﻟﯜﺵ ﺋﯜﭼﯜﻥ ، ﺋﻪﯓ ﺋﻪﻗﻪﻟﻠﯩﻴﺴﻰ ﺷﯘ ﻫﺎﻳﯟﺍﻥ ﮔﯚﺷﯩﺪﯨﻦ ﻳﺎﻛﻰ ﻛﯜﭼﯩﺪﯨﻦ ﭘﺎﻳﺪﯨﻠﯩﻨﯩﺶ ﻗﯩﻤﻤﯩﺘﯩﺪﯨﻦ ﻫﺎﻟﻘﯩﭗ ، ﺑﯩﺮ ﺧﯩﻞ ﻫﻮﺯﯗﺭﻟﯩﻨﯩﺶ ، ﺯﻭﻗﻠﯩﻨﯩﺶ ﻗﯩﻤﻤﯩﺘﻰ ﺑﺎﺭﻟﯩﻘﯩﻨﻰ ﻫﯩﺲ ﻗﯩﻠﺪﯗﺭﯨﺸﻰ ﻛﯧﺮﻩﻙ . ﺩﯗﻧﻴﺎﺩﯨﻜﻰ 600 ﺧﯩﻠﺪﯨﻦ ﺋﺎﺭﺗﯘﻕ ﻗﻮﻱ ﻧﻪﺳﻠﯩﻨﯩﯔ ﻗﯩﻤﻤﯩﺘﻰ ﺋﻮﺧﺸﺎﺷﻼ ﮔﯚﺵ ، ﻳﯘﯓ ، ﺗﯧﺮﻩ ﻗﺎﺗﺎﺭﻟﯩﻖ ﺋﯩﻘﺘﯩﺴﺎﺩﯨﻲ ﺋﺎﻣﯩﻠﻼﺭ ﺗﻪﺭﯨﭙﯩﺪﯨﻦ ﺑﻪﻟﮕﯩﻠﻪﻧﺴﻪ ، ﭘﻪﻗﻪﺕ ﻣﻪﻛﯩﺖ ﺩﻭﻻﻥ ﻗﻮﻳﯩﻨﯩﯔ ﻗﯩﻤﻤﯩﺘﯩﻼ ﻣﯘﺷﯘ ﻗﻮﻱ ﻧﻪﺳﻠﯩﻨﻰ ﻳﺎﺧﺸﯩﻼﺵ ﻳﻮﻟﯩﺪﺍ ﺋﺎﯞﻻﺩﻣﯘ - ﺋﻪﯞﻻﺩ ﺋﯩﺰﭼﯩﻞ ﺋﻪﺟﯩﺮ ﺳﯩﯖﺪﯛﺭﯛﭖ ﻛﻪﻟﮕﻪﻥ ﺩﻭﻻﻧﻠﯩﻘﻼﺭﻧﯩﯔ ﭘﯩﺴﺨﯩﻜﯩﺴﯩﺪﯨﻜﻰ ﻫﻮﺯﯗﺭﻟﯩﻨﯩﺶ ، ﺯﻭﻗﻠﯩﻨﯩﺶ ﺋﺎﻣﯩﻠﻠﯩﺮﻯ ﺗﻪﺭﯨﭙﯩﺪﯨﻦ ﺑﻪﻟﮕﯩﻠﯩﻨﯩﺪﯗ . ﺋﯘﻧﺪﺍﻕ ﺋﻪﻣﻪﺱ ﺩﯦﻴﯩﻠﺴﻪ ، ﺑﯩﺮ ﺗﯘﻳﺎﻕ ﻗﻮﭼﻘﺎﺭﻧﻰ 500 ﻣﯩﯔ ﻳﯜﻩﻥ ﺧﻪﻟﻖ ﭘﯘﻟﯩﻐﺎ ﺳﺎﺗﻘﯩﻠﻰ ﺋﯘﻧﯩﻤﯩﻐﺎﻧﻠﯩﻘﯩﻨﻰ ﭼﯜﺷﻪﻧﺪﯛﺭﯛﺵ ﻣﯜﻣﻜﯩﻦ ﺑﻮﻟﻤﺎﻱ ﻗﺎﻟﯩﺪﯗ . 2002 - ﻳﯩﻠﯩﺪﯨﻜﻰ ﻣﻪﻛﯩﺖ ﻗﻮﻳﯩﻨﯩﯔ ﺑﺎﻫﺎﺳﻰ ﺗﺎﺯﺍ ﺋﯚﺭﻟﯩﮕﻪﻥ ﻣﻪﺯﮔﯩﻠﯩﺪﻩ ، ﻳﻪﻛﻪﻥ ﺑﺎﻏﺌﺎﯞﺍﺕ ﻳﯧﺰﺍ ﺗﻪﯞﻩﺳﯩﺪﯨﻜﻰ ﻣﻪﻣﺘﯩﻤﯩﻦ ﺋﻮﺳﻤﺎﻥ ﺋﯚﺯﯨﻨﯩﯔ ﺋﺎﺭﺯﯗﻻﭖ ﺑﯧﻘﯩﭗ ﻛﯧﻠﯩﯟﺍﺗﻘﺎﻥ ﻧﻪﺳﯩﻠﻠﯩﻚ ﻗﻮﭼﻘﯩﺮﯨﻨﻰ ﺗﺎﻟﯩﺸﯩﭗ ﻛﻪﻟﮕﻪﻧﻠﻪﺭﮔﻪ 500 ﻣﯩﯔ ﻳﯜﻩﻥ ﺑﺎﻫﺎ ﻗﻮﻳﻐﺎﻥ . ﺋﯘﻧﯩﯔ ﻣﻪﻗﺴﯩﺘﻰ ﻗﻮﭼﻘﺎﺭﻧﻰ ﻗﯩﻤﻤﻪﺕ ﺳﯧﺘﯩﯟﯦﺘﯩﺶ ﺑﻮﻟﻤﺎﺳﺘﯩﻦ ، ﺑﻪﻟﻜﻰ " ﺑﻪﺭﻣﻪﺱ ﻗﯩﺰﻧﯩﯔ ﺗﻮﻳﻠﯘﻗﻰ ﺋﯧﻐﯩﺮ" ﺩﯦﮕﻪﻥ ﺗﻪﻣﺴﯩﻠﺪﯨﻦ ﭘﺎﻳﺪﯨﻼﻧﻤﺎﻗﭽﻰ ﺑﻮﻟﻐﺎﻥ . ﺋﻪﻣﻤﺎ ، ﺋﻮﻳﻠﯩﻤﯩﻐﺎﻥ ﻳﻪﺭﺩﯨﻦ ﺧﯧﺮﯨﺪﺍﺭ ﺑﺎﻫﺎ ﺗﺎﻻﺷﻤﺎﻳﻼ ﭘﯘﻝ ﺳﺎﻧﺎﺷﻘﺎ ﺑﺎﺷﻠﯩﻐﺎﻥ . ﺑﯘﻧﻰ ﻛﯚﺭﯛﭖ ﻣﻪﻣﺘﯩﻤﯩﻦ ﺋﻮﺳﻤﺎﻥ ﺑﺎﻳﯩﻘﻰ ﮔﯧﭙﯩﺪﯨﻦ ﻳﯧﻨﯩﯟﯦﻠﯩﭗ ، ﻗﻮﭼﻘﺎﺭﻧﻰ ﺯﺍﺩﯨﻼ ﺳﺎﺗﻘﯩﻠﻰ ﺋﯘﻧﯩﻤﯩﻐﺎﻥ . ﻧﺎﯞﺍﺩﺍ ﺋﺎﺷﯘ ﺑﯩﺮ ﺗﯘﻳﺎﻕ ﻗﻮﭼﻘﺎﺭﻧﻰ ﺋﯩﻘﺘﯩﺴﺎﺩﯨﻲ ﻗﯩﻤﻤﻪﺕ ﺑﻮﻳﯩﭽﻪ ﻫﯩﺴﺎﺑﻼﺷﻘﺎ ﺗﻮﻏﺮﺍ ﻛﻪﻟﺴﻪ ، ﺋﯘﻧﯩﯔ ﺗﯩﺮﯨﻚ ﺋﯧﻐﯩﺮﻟﯩﻘﯩﻨﻰ 200 ﻛﯩﻠﻮﮔﺮﺍﻡ ﺩﯦﮕﻪﻥ ﺗﻪﻗﺪﯨﺮﺩﯨﻤﯘ 100 ﻛﯩﻠﻮﮔﺮﺍﻡ ﮔﯚﺵ ﭼﯩﻘﻘﺎﻥ ﺑﻮﻟﯩﺪﯗ . 500 ﻣﯩﯖﻨﻰ 100 ﮔﻪ ﺑﯚﻟﺴﻪﻙ ، ﺑﯩﺮ ﻛﯩﻠﻮﮔﺮﺍﻡ ﮔﯚﺵ 500 ﻳﯜﻩﻧﺪﯨﻦ ﺗﻮﻏﺮﺍ ﻛﯧﻠﯩﺪﯗ . ﺑﯘﻧﯩﯖﻐﺎ ﺗﯧﺮﻩ ، ﻳﯘﯓ ﻗﺎﺗﺎﺭﻟﯩﻘﻼﺭﻧﻰ ﻗﻮﺷﯘﭖ ﻫﯧﺴﺎﺑﻠﯩﻐﺎﻧﺪﯨﻤﯘ ، ﻫﻪﺗﺘﺎ ﺷﯘ ﻗﻮﭼﻘﺎﺭﻧﯩﯔ ﺋﯧﺮﺳﯩﻴﻪﺗﺘﯩﻜﻰ ﺋﻪﯞﺯﻩﻟﻠﯩﻜﻠﯩﺮﯨﻨﻰ ﻛﯚﺯﺩﻩ ﺗﯘﺗﯘﭖ ، ﺋﯘﻧﯩﯖﺪﯨﻦ ﺗﯚﺭﯨﻠﯩﺪﯨﻐﺎﻥ ﻗﻮﺯﯨﻼﺭﻧﻰ ﻗﻮﺷﯘﭖ ﻫﯧﺴﺎﺑﻠﯩﻐﺎﻧﺪﯨﻤﯘ ، 500 ﻣﯩﯔ ﻳﯜﻩﻥ ﺋﯩﻘﺘﯩﺴﺎﺩﯨﻲ ﻗﯩﻤﻤﻪﺕ ﻳﺎﺭﯨﺘﺎﻟﯩﺸﻰ ﻣﯜﻣﻜﯩﻦ ﺋﻪﻣﻪﺱ . ﺋﯘﻧﺪﺍﻗﺘﺎ ، ﺧﯧﺮﯨﺪﺍﺭ ﻗﺎﻳﺴﻰ ﻗﯩﻤﻤﻪﺗﻨﻰ ﻛﯚﺯﺩﻩ ﺗﯘﺗﯘﭖ ﭘﯘﻝ ﺳﺎﻧﯩﺪﻯ ﯞﻩ ﻣﻪﻣﺘﯩﻤﯩﻦ ﺋﻮﺳﻤﺎﻥ ﻗﺎﻳﺴﻰ ﻗﯩﻤﻤﻪﺗﻨﻰ ﻛﯚﺯﺩﻩ ﺗﯘﺗﯘﭖ ﺳﺎﺗﻘﯩﻠﻰ ﺋﯘﻧﯩﻤﯩﺪﻯ ؟ ﻧﺎﻫﺎﻳﯩﺘﻰ ﺭﻭﺷﻪﻧﻜﻰ ، ﻫﻪﺭ ﺋﯩﻜﻜﻰ ﺗﻪﺭﻩﭘﻨﯩﯔ ﻛﯚﺯﺩﻩ ﺗﯘﺗﻘﯩﻨﻰ ﻧﯘﻗﯘﻝ ﻫﺎﻟﺪﯨﻜﻰ ﺋﯩﻘﺘﯩﺴﺎﺩﯨﻲ ﻗﯩﻤﻤﻪﺕ ﺑﻮﻟﯘﭘﻼ ﻗﺎﻟﻤﺎﺳﺘﯩﻦ ، ﺑﻪﻟﻜﻰ ﭘﯩﺴﺨﯩﻚ ﺋﺎﻣﯩﻠﻼﺭ ، ﺟﯜﻣﻠﯩﺪﯨﻦ ﻧﻪﺳﯩﻞ ﺋﯚﻟﭽﻪﻣﻠﯩﺮﯨﺪﻩ ﻫﻪﻣﻤﯩﻤﯩﺰﻧﯩﯔ ﺋﺎﻟﺪﯨﺪﺍ ﺗﯘﺭﻏﺎﻥ ﺋﺎﺷﯘ ﺩﺍﯕﻠﯩﻖ ﻗﻮﭼﻘﺎﺭﻏﺎ ﺑﻮﻟﻐﺎﻥ ﻫﯧﺮﯨﺴﻤﻪﻧﻠﯩﻚ ، ﺯﻭﻗﻠﯘﻧﯘﺵ ، ﻫﻮﺯﯗﺭﻟﯩﻨﯩﺶ ﺗﯘﻳﻐﯘﻟﯩﺮﻯ ﻣﯘﻫﯩﻢ ﺭﻭﻝ ﺋﻮﻳﻨﯩﻐﺎﻥ . ﺩﯦﻤﻪﻙ ، ﻧﻪﺳﻠﻰ ﺋﻪﻻ ﻣﻪﻛﯩﺖ ﻗﻮﻳﻰ ﺑﯘ ﺭﺍﻳﻮﻧﺪﺍ ﺋﻪﺭﻣﻪﻙ ﻫﺎﻳﯟﺍﻥ ﻗﺎﺗﺎﺭﯨﻐﺎ ﻗﻮﺷﯘﻟﻐﺎﻥ . ﻣﻪﻛﯩﺖ ﻧﺎﻫﯩﻴﯩﺴﯩﻨﻰ ﻣﻪﺭﻛﻪﺯ ﻗﯩﻠﻐﺎﻥ ﻫﺎﻟﺪﺍ ، ﻳﻮﭘﯘﺭﻏﺎ ﯞﻩ ﻣﺎﺭﺍﻟﺒﯧﺸﻰ ﻗﺎﺗﺎﺭﻟﯩﻖ ﻗﻮﺷﻨﺎ ﻧﺎﻫﯩﻴﯩﻠﻪﺭﻧﯩﯔ ﻣﻪﻛﯩﺘﻜﻪ ﻳﯧﻘﯩﻦ ﻛﯚﭘﻠﯩﮕﻪﻥ ﻳﯧﺰﺍ - ﻛﻪﻧﺘﻠﯩﺮﯨﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﻫﯩﻼﻝ ﺋﺎﻱ ﺷﻪﻛﯩﻠﻠﯩﻚ ﺩﻭﻻﻥ ﺭﺍﻳﻮﻧﯩﺪﺍ ، ﺋﻪﻻ ﻧﻪﺳﯩﻠﻠﯩﻚ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﻫﻪﻗﯩﻘﻪﺗﻪﻥ ﺋﻪﺭﻣﻪﻙ ﻫﺎﻳﯟﺍﻥ ﺩﻩﺭﯨﺠﯩﺴﯩﮕﻪ ﻛﯚﺗﯜﺭﯛﻟﮕﻪﻧﻠﯩﻜﯩﻨﻰ ﺗﯚﯞﻩﻧﺪﯨﻜﻰ ﻧﯘﻗﺘﯩﻼﺭﺩﯨﻨﻤﯘ ﺋﯧﻨﯩﻖ ﻛﯚﺭﯛﻟﯩﺪﯗ : (1) ﻗﻮﻳﻼﺭﻏﺎ ﺋﯩﺴﯩﻢ ﻗﻮﻳﯘﺵ . ﺋﯩﺴﯩﻢ ﺋﻪﻟﻤﯩﺴﺎﻗﺘﯩﻦ ﺑﯘﻳﺎﻥ ﭘﻪﻗﻪﺕ ﺋﺎﺩﻩﻣﻠﻪﺭﮔﯩﻼ ﻗﻮﻳﯘﻟﯘﭖ ﻛﻪﻟﮕﻪﻥ ﺑﻮﻟﯘﭖ ، ﮔﻪﺭﭼﻪ ﻳﯘﺭﺕ ، ﺟﺎﻱ ، ﻫﺎﻳﯟﺍﻧﺎﺕ ﯞﻩ ﺯﯨﺮﺍﺋﻪﺕ ﻗﺎﺗﺎﺭﻟﯩﻖ ﺑﺎﺷﻘﺎ ﺑﺎﺭﻟﯩﻖ ﻣﻪﯞﺟﯘﺩﺍﺗﻼﺭﻣﯘ ﺋﯩﺴﯩﻤﺴﯩﺰ ﺑﻮﻟﻤﯩﺴﯩﻤﯘ ، ﻟﯧﻜﯩﻦ ﺋﯘﻻﺭ ﺷﻪﻫﻪﺭ - ﻳﯧﺰﺍ ، ﺑﯘﻏﺪﺍﻱ - ﻗﻮﻧﺎﻕ ، ﺋﺎﺕ - ﻛﺎﻻ ﺩﯦﮕﻪﻧﺪﻩﻙ ﺋﻮﺭﺗﺎﻕ ﺋﯩﺴﯩﻤﻼﺭ ﺑﯩﻠﻪﻧﻼ ﺋﺎﺗﯩﻠﯩﭗ ، ﺋﺎﺩﻩﻣﻠﻪﺭﮔﻪ ﺋﻮﺧﺸﺎﺵ ﻫﻪﺭ ﺑﯩﺮ ﺟﺎﻥ ﺋﯩﮕﯩﺴﯩﮕﻪ ﺑﯩﺮﺩﯨﻦ ﺧﺎﺱ ﺋﯩﺴﯩﻢ ﻗﻮﻳﯘﻟﻤﯩﻐﺎﻥ . ﻛﯧﻴﯩﻦ ﺗﺎﺭﯨﺨﻨﯩﯔ ﺗﻪﺭﻩﻗﻘﯩﻴﺎﺗﻰ ﻣﻪﻟﯘﻡ ﺑﺎﺳﻘﯘﭼﻘﺎ ﻳﯧﺘﯩﭗ ، ﻗﻮﻟﻐﺎ ﻛﯚﻧﺪﯛﺭﯛﻟﮕﻪﻥ ﻫﺎﻳﯟﺍﻧﻼﺭﻣﯘ ﺗﻪﺑﯩﺌﯩﻲ ﻫﺎﻟﺪﺍ ﺋﻪﺭﻣﻪﻙ ﻫﺎﻳﯟﺍﻧﻼﺭ ﯞﻩ ﺋﺎﺩﻩﺗﺘﯩﻜﻰ ﻫﺎﻳﯟﺍﻧﻼﺭﺩﯨﻦ ﺋﯩﺒﺎﺭﻩﺕ ﺋﯩﻜﻜﻰ ﺗﯜﺭﮔﻪ ﺑﯚﻟﯜﻧﮕﻪﻧﺪﯨﻦ ﻛﯧﻴﯩﻨﻼ ، ﺋﻪﺭﻣﻪﻙ ﻫﺎﻳﯟﺍﻧﻼﺭﻏﯩﻤﯘ ﺋﺎﺩﻩﻣﮕﻪ ﺋﻮﺧﺸﺎﺵ ﺧﺎﺱ ﺋﯩﺴﯩﻢ ﻗﻮﻳﯘﺵ ﺋﺎﺩﯨﺘﻰ ﺑﺎﺭﻟﯩﻘﻘﺎ ﻛﻪﻟﮕﻪﻥ . ﻣﯘﺷﯘ ﻣﻪﻧﯩﺪﯨﻦ ﺋﯧﻴﺘﻘﺎﻧﺪﺍ ، ﻫﺎﻳﯟﺍﻧﻼﺭﻧﯩﯔ ﺋﯚﺯﯨﮕﻪ ﺧﺎﺱ ﺋﯩﺴﯩﻢ ﻗﻮﻳﯘﺵ ﺋﺎﺩﯨﺘﻰ ﺑﺎﺭﻟﯩﻘﻘﺎ ﻛﻪﻟﮕﻪﻥ . ﻣﯘﺷﯘ ﻣﻪﻧﯩﺪﯨﻦ ﺋﯧﻴﺘﻘﺎﻧﺪﺍ ، ﻫﺎﻳﯟﺍﻧﻼﺭﻧﯩﯔ ﺋﯚﺯﯨﮕﻪ ﺋﯩﺴﻤﯩﻨﯩﯔ ﺑﻮﻟﯘﺵ - ﺑﻮﻟﻤﺎﺳﻠﯩﻘﯩﻨﻰ ﺷﯘ ﻫﺎﻳﯟﺍﻧﻨﻰ ﺋﻪﺭﻣﻪﻙ ﻫﺎﻳﯟﺍﻥ ﻫﯧﺴﺎﺑﻼﺷﻘﺎ ﺑﻮﻟﯩﺪﯨﻐﺎﻥ - ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﯩﯔ ﻳﻪﻧﻪ ﺑﯩﺮ ﺑﻪﻟﮕﯩﺴﻰ ﺩﯦﻴﯩﺶ ﻣﯜﻣﻜﯩﻦ . ﻣﻪﻛﯩﺖ ﻗﻮﻳﯩﺪﯨﻦ ﺋﯩﺒﺎﺭﻩﺕ ﺑﯘ ﺋﻪﻻ ﻧﻪﺳﯩﻠﻨﯩﯔ ﺑﺎﺭﻟﯩﻘﻘﺎ ﻛﯧﻠﯩﺸﺘﯩﻦ ﺗﺎﺭﺗﯩﭗ ، ﺗﺎﻛﻰ ﺑﯜﮔﯜﻧﻜﻰ ﻫﺎﻟﻐﺎ ﻳﻪﺗﻜﯜﭼﻪ ﺑﻮﻟﻐﺎﻥ ﺋﺎﺭﯨﻠﯩﻘﺘﯩﻜﻰ ﺑﯧﺴﯩﭗ ﺋﯚﺗﻜﻪﻥ ﺗﻪﺑﯩﺌﯩﻲ ﺗﻪﺭﻩﻗﻘﯩﻴﺎﺕ ﺟﻪﺭﻳﺎﻧﯩﻤﯘ ﻳﯘﻗﯘﺭﻗﻰ ﺑﺎﻳﺎﻧﻼﺭﻧﯩﯔ ﻣﻪﺯﻣﯘﻧﻰ ﺑﯩﻠﻪﻥ ﺑﯩﺮﺩﻩﻙ ﺑﻮﻟﯘﭖ ، 1920 - ﻳﯩﻠﯩﻨﯩﯔ ﺋﺎﻟﺪﻯ - ﻛﻪﻳﻨﯩﺪﻩ ﺑﯘ ﻗﻮﻱ ﻧﻪﺳﻠﻰ ﺑﺎﺭﻟﯩﻘﻘﺎ ﻛﻪﻟﮕﻪﻧﺪﻩ ، ﺑﺎﺷﻘﺎ ﺋﺎﺩﻩﺗﺘﯩﻜﻰ ﻗﻮﻳﻼﺭﺩﯨﻦ ﭘﻪﺭﻗﻠﻪﻧﺪﯛﺭﯛﺵ ﺋﯜﭼﯜﻥ "ﻗﺎﯕﺸﺎﺭﻟﯩﻖ ﻗﻮﻱ" ، "ﻗﯩﺰﻏﯩﺰﻩﻙ" ﺩﯦﮕﻪﻧﺪﻩﻙ ﺋﻮﺭﺗﺎﻕ ﺋﯩﺴﯩﻤﻼﺭ ﺑﯩﻠﻪﻥ ﺋﺎﺗﺎﻟﻐﺎﻥ ﺑﻮﻟﺴﯩﻤﯘ ، ﻟﯧﻜﯩﻦ ﻛﯧﻴﯩﻨﭽﻪ ﺑﻪﺯﻯ ﺩﺍﯕﻠﯩﻖ ﻗﻮﻳﻼﺭﻏﺎ "ﺋﺎﻻ ﭘﺎﭼﺎﻕ" ، "ﻗﺎﺭﺍ ﻗﯘﻳﺮﯗﻕ" ﺩﯦﮕﻪﻧﺪﻩﻙ ﺧﺎﺱ ﺋﯩﺴﯩﻤﻼﺭ ﻗﻮﻳﯘﻟﯩﺸﻘﺎ ﺑﺎﺷﻠﯩﻐﺎﻥ . ﻫﺎﺯﯨﺮﻗﻰ ﺑﺎﺳﻘﯘﭼﻘﺎ ﻛﻪﻟﮕﻪﻧﺪﻩ ﺑﯘ ﺧﯩﻞ ﺧﺎﺱ ﺋﯩﺴﯩﻤﻼﺭ ﺗﯧﺨﯩﻤﯘ ﺗﻪﺭﻩﻗﻘﯩﻲ ﻗﯩﻠﯩﭗ ، ﻗﻮﭼﻘﺎﺭﻻﺭﻏﺎ "ﺑﻮﺯ ﺑﻪﮒ" ، "ﻗﯘﺗﺒﻪﮒ" ، " ﻗﯩﺮﺍﻧﺒﺎﻱ" ﺩﯦﮕﻪﻧﺪﻩﻙ ؛ ﺳﺎﻏﻠﯩﻘﻼﺭﻏﺎ ﺑﻮﻟﺴﺎ "ﻣﯘﯓ ﻣﻪﺭﻩﻡ" ، "ﺟﻪﻣﯩﻠﻪﻡ" ، "ﭼﺎﻻ ﻣﻪﺭﻩﻡ" ﺩﯦﮕﻪﻧﺪﻩﻙ ﺋﯩﺴﯩﻤﻼﺭ ﻗﻮﻳﯘﻟﯩﺸﻘﺎ ﺑﺎﺷﻠﯩﺪﻯ . ﮔﻪﺭﭼﻪ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﻫﻪﻣﻤﯩﺴﯩﻨﯩﯔ ﺧﺎﺱ ﺋﯩﺴﻤﻰ ﺑﺎﺭ ﺩﯦﮕﯩﻠﻰ ﺑﻮﻟﻤﯩﺴﯩﻤﯘ ، ﻟﯧﻜﯩﻦ ﺑﺎﻫﺎﺳﻰ 100 ﻣﯩﯔ ﻳﯜﻩﻧﻨﯩﯔ ﺋﺎﻟﺪﻯ - ﻛﻪﻳﻨﯩﺪﯨﻜﻰ ﻗﻮﻳﻼﺭﻧﻰ ﻫﻪﻣﻤﻪ ﺋﺎﺩﻩﻡ ﺑﯩﻠﯩﭗ ﻛﻪﺗﻤﯩﺴﯩﻤﯘ ، ﻟﯧﻜﯩﻦ ﺷﯘ ﻗﻮﻱ ﺋﯩﮕﯩﺴﻰ ﺧﺎﺱ ﺋﯩﺴﯩﻢ ﺑﯩﻠﻪﻥ ﺋﺎﺗﺎﻳﺪﯨﻐﺎﻥ ﺋﻪﻫﯟﺍﻟﻼﺭﻣﯘ ﺑﺎﺭ . ﺩﯦﻤﻪﻙ ، ﻗﻮﻳﻼﺭﻏﺎ ﺧﺎﺱ ﺋﯩﺴﯩﻢ ﻗﻮﻳﯘﺷﺘﯩﻦ ﺋﯩﺒﺎﺭﻩﺕ ﺑﺎﺷﻘﺎ ﻗﻮﻱ ﺗﯜﺭﻟﯩﺮﯨﻨﯩﯔ ﻫﯧﭽﻘﺎﻳﺴﯩﺴﯩﺴﺪﺍ ﺑﻮﻟﻤﯩﻐﺎﻥ ﺑﯘ ﺋﯚﺯﮔﯩﭽﻪ ﻫﺎﺩﯨﺴﻪ ﻗﻮﻳﻐﺎ ﻫﯧﺮﯨﺴﻤﻪﻥ ﺩﻭﻻﻥ ﺧﻪﻟﻘﻰ ﺋﺎﺭﯨﺴﯩﺪﺍ ﻣﻪﯞﺟﯘﺕ ﺑﻮﻟﯘﭘﻼ ﻗﺎﻟﻤﺎﺳﺘﯩﻦ . ﺑﻪﻟﻜﻰ ﺗﯧﺨﯩﻤﯘ ﺗﻪﺭﻩﻗﻘﯩﻲ ﻗﯩﻠﯩﺸﻘﺎ ﻗﺎﺭﺍﭖ ﻳﯜﺯﻟﻪﻧﻤﻪﻛﺘﻪ . (2) ﻗﻮﺯﯨﻼﺭﻧﻰ ﻳﻮﻗﻼﺵ . ﻗﻮﻱ ﺑﺎﻗﻘﺎﻥ ﺩﻭﻻﻧﻠﯩﻘﻼﺭ ﺋﺎﺭﯨﺴﯩﺪﺍ ﺋﯚﺯﺋﺎﺭﺍ ﺑﯧﺮﯨﺶ - ﻛﯧﻠﯩﺶ ﻗﯩﻠﯩﺸﯩﭗ ﻗﻮﻱ ﻫﻪﻗﻘﯩﺪﻩ ﭘﺎﺭﺍﯕﻠﯩﺸﯩﺶ ﺋﻮﻣﯘﻣﯩﻲ ﺋﺎﺩﻩﺗﻜﻪ ﺋﺎﻳﻼﻧﻐﺎﻧﺪﯨﻦ ﺑﺎﺷﻘﺎ ، ﻳﯧﯖﻰ ﺗﯘﻏﯘﻟﻐﺎﻥ ﻗﻮﺯﯨﻼﺭﻧﻰ ﺋﺎﻻﻫﯩﺪﻩ ﻳﻮﻗﻼﭖ ﺑﺎﺭﯨﺪﯨﻐﺎﻥ ﺑﯩﺮ ﺧﯩﻞ ﺋﺎﺩﻩﺗﻤﯘ ﺑﺎﺭ . ﺑﯘ ﺧﯩﻞ ﺋﺎﺩﻩﺕ ﻣﻪﻛﯩﺖ ﻗﻮﻳﯩﺪﯨﻦ ﺋﯩﺒﺎﺭﻩﺕ ﺗﺎﺷﻘﻰ ﻛﯚﺭﯛﻧﯩﺸﻰ ﭼﯩﺮﺍﻳﻠﯩﻖ ، ﺋﯩﻘﺘﯩﺴﺎﺩﯨﻲ ﻗﯩﻤﻤﯩﺘﻰ ﺋﺎﻻﻫﯩﺪﻩ ﻳﯘﻗﯘﺭﻯ ﺑﻮﻟﻐﺎﻥ ﺑﯘ ﺋﻪﻻ ﻧﻪﺳﯩﻠﻠﯩﻚ ﻗﻮﻱ ﺗﯜﺭﻯ ﺩﻭﻻﻥ ﺭﺍﻳﻮﻧﯩﺪﺍ ﺋﻪﺭﻣﻪﻙ ﻫﺎﻳﯟﺍﻥ ﻗﺎﺗﺎﺭﯨﻐﺎ ﻗﻮﺷﯘﻟﯘﺷﻘﺎ ﺑﺎﺷﻠﯩﻐﺎﻧﺪﯨﻦ ﻛﯧﻴﯩﻦ ﭘﻪﻳﺪﺍ ﺑﻮﻟﻐﺎﻥ ﺑﻮﻟﯘﭖ ، ﮔﻪﺭﭼﻪ ﻳﯧﯖﻰ ﺗﯘﻏﯘﻟﻐﺎﻥ ﻗﻮﺯﯨﻼﺭﻧﻰ ﻳﻮﻗﻼﭖ ﺑﺎﺭﻏﯘﭼﯩﻼﺭ ﺋﺎﻻﻫﯩﺪﻩ ﺳﻮﯞﻏﺎﺗﻼﺭﻧﻰ ﺋﯧﻠﯩﭗ ﺑﺎﺭﻣﯩﺴﯩﻤﯘ ، ﻟﯧﻜﯩﻦ ﻳﺎﺧﺸﻰ ﺗﯩﻠﻪﻛﻠﯩﺮﯨﻨﻰ ﺑﯩﻠﺪﯛﺭﯛﺵ ﺑﯩﻠﻪﻥ ﺑﯩﺮﮔﻪ ، ﺋﯚﺯﻟﯩﺮﯨﻨﯩﯔ ﻗﻮﺯﯨﻼﺭﻏﺎ ، ﺟﯜﻣﻠﯩﺪﯨﻦ ﻣﻪﻛﯩﺖ ﻗﻮﻳﻠﯩﺮﯨﻐﺎ ﺑﻮﻟﻐﺎﻥ ﻫﯧﺮﯨﺴﻤﻪﻧﻠﯩﻜﯩﻨﻰ ﺋﯩﭙﺎﺩﯨﻠﻪﻳﺪﯗ . ﺷﯘﻧﯩﯔ ﺑﯩﻠﻪﻥ ﺑﯩﺮﮔﻪ ﻗﺎﻳﺴﻰ ﺧﯩﻠﺪﯨﻜﻰ ﻗﻮﭼﻘﺎﺭﻻﺭﻧﻰ ﻗﺎﻳﺴﻰ ﺧﯩﻠﺪﯨﻜﻰ ﺳﺎﻏﻠﯩﻘﻼﺭ ﺑﯩﻠﻪﻥ ﭼﯧﺘﯩﺸﺘﯘﺭﺳﺎ ﻗﺎﻧﺪﺍﻕ ﻗﻮﺯﺍ ﭼﯜﺷﯩﺪﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﺑﯩﯟﺍﺳﺘﻪ ﺳﯧﺰﯨﻤﻐﺎ ﺋﯩﮕﻪ ﺑﻮﻟﯩﺪﯗ . ﺑﯘﻧﯩﯖﺪﯨﻦ ﺑﺎﺷﻘﺎ ، ﻗﻮﺯﯨﻼﺭﻧﻰ ﻳﻮﻗﻼﺵ ﺩﺍﯞﺍﻣﯩﺪﺍ ﻧﻪﭼﭽﻪ 10 ﻣﯩﯔ ﻳﯜﻩﻧﻠﯩﻚ ﺳﻮﺩﯨﺪﺍ ﭘﯜﺗﯩﺸﯩﭗ ﻗﺎﻟﯩﺪﯨﻐﺎﻥ ﺋﻪﻫﯟﺍﻟﻼﺭﻣﯘ ﺑﻮﻟﯩﺪﯗ . ﺑﻪﺯﯨﺪﻩ ﻫﻪﺗﺘﺎ ﻳﻮﻗﻼﭖ ﺑﯧﺮﯨﻠﻐﺎﻥ ﺋﺎﺷﯘ ﻗﻮﺯﯨﻨﯩﯔ ﺳﻮﺩﯨﺴﯩﻤﯘ ﺑﻮﻟﯘﭖ ﻗﺎﻟﯩﺪﯗ . ﺑﯘ ﺧﯩﻞ ﺳﻮﺩﺍ ﺳﻪﻝ ﺋﺎﻻﻫﯩﺪﯨﺮﻩﻙ ﺑﻮﻟﯘﭖ ، ﻳﻮﻗﻼﭖ ﺑﺎﺭﻏﯘﭼﯩﻼﺭﺩﯨﻦ ﺑﯩﺮﻯ ﻗﻮﺯﯨﻨﻰ ﻗﻮﻟﺪﯨﻦ ﭼﯩﻘﯩﺮﯨﭗ ﻗﻮﻳﯘﺷﻘﺎ ﻛﯚﺯﻯ ﻗﯩﻴﻤﯩﻐﺎﻥ ﺋﻪﻫﯟﺍﻟﺪﺍ ﻧﻪﻕ ﻣﻪﻳﺪﺍﻧﺪﯨﻼ ﺳﻮﺩﯨﻠﯩﺸﯩﭗ ، ﭘﯜﺗﯜﺷﻜﻪﻥ ﻧﻪﭼﭽﻪ ﻣﯩﯔ ﻳﯜﻩﻥ ﭘﯘﻟﻨﻰ ﻧﻪﻕ ﺑﯧﺮﯨﺪﯗ - ﺩﻩ ، ﺋﯜﭺ ﻳﺎﻛﻰ ﺗﯚﺕ ﺋﺎﻳﻠﯩﻖ ﺑﻮﻟﻐﺎﻧﺪﺍ ﺋﯧﻠﯩﭗ ﻛﯧﺘﯩﺸﻜﻪ ﯞﻩﺩﯨﻠﯩﺸﯩﭗ ﻗﺎﻳﺘﯩﭗ ﻛﯧﺘﯩﺪﯗ . ﺷﯘﻧﯩﻤﯘ ﺋﻪﺳﻜﻪﺭﺗﯩﭗ ﺋﯚﺗﯜﺵ ﻫﺎﺟﻪﺗﻜﻰ ، ﺳﻮﺩﺍ ﻗﯩﻠﯩﺸﻘﺎﻥ ﻫﻪﺭ ﺋﯩﻜﻜﻰ ﺗﻪﺭﻩﭖ ﻟﻪﯞﺯﯨﺪﻩ ﺗﯘﺭﯨﺪﯗ . ﻧﻪﭼﭽﻪ ﺋﺎﻳﺪﯨﻦ ﻛﯧﻴﯩﻦ ﻗﻮﺯﺍ ﺗﯧﺨﯩﻤﯘ ﻛﯚﺭﻛﻪﻣﻠﯩﺸﯩﭗ ، ﺑﺎﺯﺍﺭﺩﯨﻜﻰ ﺋﻪﻣﻪﻟﯩﻲ ﺑﺎﻫﺎﺳﻰ ﺋﯧﺸﯩﭗ ﻛﻪﺗﻜﻪﻥ ﻫﺎﻟﻪﺗﺘﯩﻤﯘ ، ﻫﻪﺗﺘﺎ ﺑﺎﺷﻘﺎ ﺧﯧﺮﯨﺪﺍﺭﻻﺭ ﻛﯧﻠﯩﭗ ﻳﻪﻧﻪ ﻧﻪﭼﭽﻪ ﻣﯩﯔ ﻳﯜﻩﻥ ﺋﺎﺭﺗﯘﻕ ﺋﺎﻟﻤﺎﻗﭽﻰ ﺑﻮﻟﻐﺎﻥ ﺗﻪﻗﺪﯨﺮﺩﯨﻤﯘ ، ﻳﺎﻛﻰ ﺑﯘﻧﯩﯔ ﺋﻪﻛﺴﯩﭽﻪ ﺑﺎﺯﺍﺭ ﺑﺎﻫﺎﺳﻰ ﻛﯚﺭﯛﻧﻪﺭﻟﯩﻚ ﺗﯚﯞﻩﻧﻠﻪﭖ ، ﻗﻮﺯﯨﻨﻰ ﺳﯧﺘﯩﯟﺍﻟﻐﯘﭼﻰ ﺯﯨﻴﺎﻥ ﺗﺎﺭﺗﻘﺎﻥ ﺋﻪﻫﯟﺍﻟﺪﯨﻤﯘ ، ﻫﻪﺭ ﺋﯩﻜﻜﻰ ﺗﻪﺭﻩﭖ ﺑﺎﺷﺘﺎ ﺳﻮﺩﯨﺪﯨﻦ ﻫﻪﺭﮔﯩﺰ ﻳﯧﻨﯩﯟﺍﻟﻤﺎﻳﺪﯗ . (3) "ﻫﯚﺳﯩﻦ ﺗﯜﺯﻩﺵ" . ﺋﻪﺭﻣﻪﻙ ﻫﺎﻳﯟﺍﻥ ﺑﯩﻠﻪﻥ ﺋﺎﺩﻩﺗﺘﯩﻜﻰ ﻫﺎﻳﯟﺍﻧﻼﺭﻧﯩﯔ ﻳﻪﻧﻪ ﺑﯩﺮ ﻛﯚﺭﯛﻧﻪﺭﻟﯩﻚ ﭘﻪﺭﻗﯩﻨﯩﯔ "ﻫﯚﺳﯩﻦ ﺗﯜﺯﻩﺵ" ﺗﻪ ﺋﯩﭙﺎﺩﯨﻠﯩﺪﯨﻐﺎﻧﻠﯩﻘﯩﻨﻰ ﻫﻪﻣﻤﻪ ﺋﺎﺩﻩﻡ ﻫﯧﺲ ﻗﯩﻠﯩﭗ ﻳﻪﺗﻜﻪﻥ ﺑﻮﻟﺴﺎ ﻛﯧﺮﻩﻙ . ﮔﻪﺭﭼﻪ ﺩﻭﻻﻥ ﺩﯨﻴﺎﺭﯨﺪﺍ ﻗﻮﻱ ﺑﯧﻘﯩﭗ ﻛﯧﻠﯩﯟﺍﺗﻘﺎﻥ ﻛﯩﺸﯩﻠﻪﺭﻧﯩﯔ ﻫﻪﻣﻤﯩﺴﯩﺪﻩ ﻗﻮﻳﻼﺭﻧﯩﯔ "ﻫﯚﺳﻨﯩﻨﻰ ﺗﯜﺯﻩﺵ" ﺋﺎﺩﯨﺘﻰ ﺑﺎﺭ ﺩﯦﮕﯩﻠﻰ ﺑﻮﻟﺴﯩﻤﯘ ، ﻟﯧﻜﯩﻦ ﻣﻪﺧﺴﯘﺱ ﻣﻪﻛﯩﺖ ﻗﻮﻳﻠﯩﺮﻯ ﺗﯩﺠﺎﺭﯨﺘﻰ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯨﻐﺎﻧﻼﺭ ﯞﻩ ﺗﯩﺠﺎﺭﻩﺕ ﺋﯜﭼﯜﻥ ﺋﻪﻣﻪﺱ ، ﺑﻪﻟﻜﻰ ﻫﻮﺯﯗﺭﻟﯩﻨﯩﺶ ، ﺯﻭﻗﻠﯘﻧﯘﺵ ﺋﯩﺴﺘﯩﻜﻰ ﺑﯩﻠﻪﻥ ﻣﻪﻛﯩﺖ ﻗﻮﻳﻰ ﺑﺎﻗﻘﺎﻧﻼﺭﻧﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﻰ ﻗﻮﻳﻼﺭﻧﯩﯔ "ﻫﯚﺳﻨﯩﻨﻰ ﺗﯜﺯﻩﺵ" ﻛﻪ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﺪﯗ . ﺑﯘﻧﻰ ﺋﯚﺯ ﺗﻪﺭﺗﯩﭙﻰ ﺑﻮﻳﯩﭽﻪ ﺑﯩﺮ - ﺑﯩﺮﻟﻪﭖ ﺑﺎﻳﺎﻥ ﻗﯩﻠﺴﺎﻕ ، ﻗﻮﺯﺍ ﺗﯘﻏﯘﻟﯘﭖ ﺑﯩﺮﻧﻪﭼﭽﻪ ﻛﯜﻧﻠﯜﻙ ﺑﻮﻟﻐﺎﻧﺪﺍ ﺑﻮﻳﻨﯩﻐﺎ ﺗﯩﻞ ﺗﯘﻣﺎﺭ ﻳﺎﻛﻰ ﻛﯚﺯﻣﯘﻧﭽﺎﻕ ﺋﺎﺳﯩﺪﯗ . ﺑﯘ ، ﻳﺎﻣﺎﻥ ﻛﯚﺯﻟﻪﺭﺩﯨﻦ ﺳﺎﻗﻼﭖ ، ﺷﯘ ﻗﻮﺯﯨﻨﯩﯔ ﺋﺎﻣﺎﻥ - ﺋﯧﺴﻪﻥ ﭼﻮﯓ ﺑﻮﻟﯘﺷﯩﻨﻰ ﺗﯩﻠﻪﺵ ﺋﯩﺴﺘﯩﻜﯩﻨﻰ ﺑﯩﻠﺪﯛﺭﯨﺪﯗ . ﻗﻮﺯﺍ ﭘﺎﻗﻼﻥ ﺑﻮﻟﯘﭖ ﺗﯘﻧﺠﻰ ﻗﯧﺘﯩﻢ ﻗﯩﺮﻗﯩﻠﻐﺎﻧﺪﺍ ﺳﯚﯕﮕﯩﭽﯩﮕﻪ ﻛﻮﻛﯘﻻ ﻗﻮﻳﯘﭖ ﻗﻮﻳﯘﻟﯩﺪﯗ . ﺑﯘ ﺷﯘ ﭘﺎﻗﻼﻧﻨﯩﯔ ﺗﯧﺨﻰ ﻳﯧﺸﯩﻐﺎ ﺗﻮﺷﻤﯩﻐﺎﻥ "ﻧﺎﺭﻩﺳﯩﺪﻩ" ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﯛﺵ ﺑﯩﻠﻪﻥ ﺑﯩﺮﮔﻪ ، ﻗﻮﻱ ﺋﯩﮕﯩﺴﯩﻨﯩﯔ ﺋﯘﻧﯩﯖﻐﺎ ﺑﻮﻟﻐﺎﻥ ﺋﺎﻣﺮﺍﻗﻠﯩﻐﯩﻨﻰ ﺋﯩﭙﺎﺩﯨﻠﻪﻳﺪﯗ . ﭘﺎﻗﻼﻥ ﻳﯧﺸﯩﻐﺎ ﺗﻮﺷﯘﭖ ﺭﻩﺳﻤﯩﻲ ﻗﻮﻱ ﻗﺎﺗﺎﺭﯨﻐﺎ ﻗﻮﺷﯘﻟﻐﺎﻧﺪﯨﻦ ﻛﯧﻴﯩﻦ ﺑﻮﻳﻨﯩﻐﺎ ﺑﻮﻳﯘﻧﭽﯘﻕ ﺳﯧﻠﯩﻨﯩﺪﯗ . ﺑﻮﻳﯘﻧﭽﯘﻕ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺋﯚﺯﯨﮕﻪ ﺧﺎﺱ ﺯﯨﻨﻨﻪﺕ ﺑﻮﻳﯘﻣﻰ ﺑﻮﻟﯘﭖ ، ﺋﺎﺩﻩﺗﺘﻪ ﺋﯘ ﺗﯧﺮﻩ ﺗﺎﺳﻤﯩﻼﺭﻧﻰ ﻫﻪﺭ ﺧﯩﻞ ﭼﻮﯓ - ﻛﭽﯩﻜﻠﯩﻜﺘﻪ ﺗﯩﻠﯩﭗ ، ﭼﯩﺮﺍﻳﻠﯩﻖ ﺗﻮﻗﯘﺵ ﺋﺎﺭﻗﯩﻠﯩﻖ ﯞﻩ ﺋﯜﺳﺘﯩﮕﻪ ﻛﯚﺯﻣﯘﻧﭽﺎﻕ ، ﺭﻩﯕﻠﯩﻚ ﻣﺎﺭﺟﺎﻥ ، ﻛﯩﭽﯩﻚ ﻗﻮﯕﻐﯘﺭﺍﻕ ﻗﺎﺗﺎﺭﻟﯩﻘﻼﺭﻧﻰ ﺋﻮﺭﻧﯩﺘﯩﺶ ﺋﺎﺭﻗﯩﻠﯩﻖ ﻳﺎﺳﯩﻠﯩﺪﯗ . ﺋﺎﺩﻩﺗﺘﯩﻜﯩﻠﯩﺮﻯ 7 - 8 ﻳﯜﻩﻧﺪﯨﻦ ، ﺋﺎﻻﻫﯩﺪﯨﺮﻩﻛﻠﯩﺮﻯ 70 - 80 ﻳﯜﻩﻧﺪﯨﻦ ﺳﯧﺘﯩﻠﯩﺪﯗ . ﺑﻮﻳﯘﻧﭽﯘﻗﻨﯩﯔ ﺭﻭﻟﻰ ﮔﻪﺭﭼﻪ ﻗﻮﻳﻼﺭﻧﻰ ﺑﺎﻏﻼﺵ ﯞﻩ ﻛﯚﺭﻛﻪﻣﻠﻪﺷﺮﯛﺷﺘﯩﻦ ﺋﯩﺒﺎﺭﻩﺕ ﺋﯩﻜﻜﻰ ﺧﯩﻞ ﺭﻭﻟﻰ ﺑﻮﻟﺴﯩﻤﯘ ، ﻟﯧﻜﯩﻦ ﻫﺎﺯﯨﺮ ﺑﺎﻏﻼﺵ ﺭﻭﻟﻰ ﺑﺎﺭﻏﺎﻧﭽﻪ ﺋﺎﺟﯩﺰﻻﭖ ، ﻛﯚﺭﻛﻪﻣﻠﻪﺷﺘﯜﺭﯛﺵ ﺭﻭﻟﻰ ﻛﯜﭼﯩﻴﯩﭗ ﺑﺎﺭﻣﺎﻗﺘﺎ . ﻗﻮﻳﻼﺭﻧﯩﯔ ﺑﺎﺵ - ﻛﯚﺯﯨﻨﻰ ﺋﺎﻻﻫﯩﺪﻩ ﻳﺎﺳﺎﺵ ﯞﻩ ﻳﯘﻳﯘﭖ ﺗﺎﺭﺍﺵ ﻗﻮﻳﭽﯩﻼﺭﻧﯩﯔ "ﻫﯚﺳﯩﻦ ﺗﯜﺯﻩﺵ" ﺗﯩﻜﻰ ﻳﻪﻧﻪ ﺑﯩﺮ ﺧﯩﻞ ﺋﯘﺳﯘﻟﻰ ﺑﻮﻟﯘﭖ ، ﺋﺎﺩﻩﺗﺘﻪ ﺑﻮﻳﯘﻧﭽﯘﻕ ﺋﯧﺴﯩﻠﻐﺎﻥ ﻣﻪﻛﯩﺖ ﻗﻮﻳﻠﯩﺮﻯ ﺋﻪﺗﯩﻴﺎﺯﺩﺍ ﻫﺎﯞﺍ ﺋﯩﺴﯩﺴﻐﺎﻧﺪﯨﻦ ﺑﺎﺷﻼﭖ ، ﻛﯜﻧﺪﻩ ﺑﻮﻟﻤﯩﺴﯩﻤﯘ ﻫﻪﭘﺘﯩﺪﻩ ﺑﯩﺮ ﻗﯧﺘﯩﻢ ﺋﯘﻥ ﺳﻮﭘﯘﻥ ﺑﯩﻠﻪﻥ ﻳﯘﻳﯘﻟﯘﭖ ﺗﺎﺭﯨﻠﯩﺪﯗ . ﺑﯘﻧﯩﯔ ﺑﯩﻠﻪﻥ ﻗﻮﻳﻼﺭ ﺗﻮﯕﺮﺍ - ﻗﺎﺳﻤﺎﻗﻼﺭﺩﯨﻦ ﺋﺎﺩﺍﻟﯩﻨﯩﭗ ، ﻳﯘﯕﻠﯩﺮﻯ ﭘﺎﺭﻗﯩﺮﺍﭖ ﺗﯧﺨﯩﻤﯘ ﻛﯚﺭﻛﻪﻣﻠﯩﺸﯩﭗ ﻛﯧﺘﯩﺪﯗ . ﻳﻪﻧﯩﻤﯘ ﺋﺎﻻﻫﯩﺪﻩ ﺑﻮﻟﻐﯩﻨﻰ ﺷﯘﻛﻰ ، ﻣﻪﺧﺴﯘﺱ ﻣﻪﻛﯩﺖ ﻗﻮﻳﻰ ﺗﯩﺠﺎﺭﯨﺘﻰ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯨﻐﺎﻥ ﺑﻪﺯﻯ ﻗﻮﻳﭽﯩﻼﺭ ﻗﻮﻳﻼﺭﻧﻰ ﺑﺎﺯﺍﺭﻏﺎ ﺋﻪﻛﯩﺮﯨﺸﺘﯩﻦ ﺑﯘﺭﯗﻥ ﺑﺎﺵ - ﻛﯚﺯﯨﻨﻰ ﻛﯚﯕﯜﻝ ﻗﻮﻳﯘﭖ ﻳﺎﺳﺎﻳﺪﯗ . ﺑﻮﻟﯘﭘﻤﯘ ﻗﯘﻻﻗﻨﯩﯔ ﺋﺎﻟﺪﻯ - ﻛﻪﻳﻨﯩﺪﯨﻜﻰ ﯞﻩ ﺋﺎﺳﺘﻰ - ﺋﯜﺳﺘﯩﺪﯨﻜﻰ ﻳﯘﯕﻼﺭﻧﻰ ﺷﯘ ﺩﻩﺭﯨﺠﯩﺪﻩ ﭘﺎﻛﯩﺮ ﻗﯩﺮﻗﯩﻴﺪﯗﻛﻰ ، ﺋﯘﻗﻤﯩﻐﺎﺏ ﺋﺎﺩﻩﻡ "ﺋﯘﺳﺘﯩﺮﺍ ﺑﯩﻠﻪﻥ ﭼﯜﺷﯜﺭﮔﻪﻥ ﺋﻮﺧﺸﺎﻳﺪﯗ" ﺩﻩﭖ ﺋﻮﻳﻼﭖ ﻗﺎﻟﯩﺪﯗ . ﻗﯘﻻﻕ ﺋﻪﺗﺮﺍﭘﯩﺪﯨﻜﻰ ﻳﯘﯕﻼﺭﻧﻰ ﺷﯘ ﺩﻩﺭﯨﺠﯩﺪﻩ ﭘﺎﻛﯩﺰ ﻗﯩﺮﻗﯩﺸﺘﯩﻜﻰ ﺑﯩﺮﯨﻨﭽﻰ ﺳﻪﯞﻩﺏ ، ﻗﯘﻟﯩﻘﻰ ﭘﻪﯞﻗﯘﻻﺩﺩﻩ ﺋﯘﺯﯗﻥ ﯞﻩ ﻛﻪﯓ ﻛﻪﻟﮕﻪﻥ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺋﯚﺯﯨﮕﻪ ﺧﺎﺱ ﺑﻮﻟﻐﺎﻥ ﺑﯘ ﺭﻭﺷﻪﻥ ﺋﺎﻻﻫﯩﺪﯨﻠﯩﻜﯩﻨﻰ ﺗﯧﺨﯩﻤﯘ ﮔﻪﯞﺩﯨﻠﻪﻧﺪﯛﺭﯛﺵ ﺋﯜﭼﯜﻥ ﺑﻮﻟﺴﺎ ، ﺋﯩﻜﻜﯩﻨﭽﻰ ﺳﻪﯞﻩﺏ ﻳﻪﻧﯩﻼ "ﻫﯚﺳﯩﻦ ﺗﯜﺯﻩﺵ" ﺋﯜﭼﯜﻧﺪﯗﺭ . (4) ﻫﻪﻗﯩﻘﯩﻲ ﺗﯜﺭﺩﻩ ﻛﯚﻳﯜﻧﯜﭖ ﺑﯧﻘﯩﺶ . ﻗﻮﻱ ﺑﯧﻘﯩﺶ ﺩﯦﮕﻪﻥ ﺑﯘ ﺋﯘﻗﯘﻣﺪﯨﻦ ﻛﯩﺸﯩﻠﻪﺭﻧﯩﯔ ﻛﯚﺯ ﺋﺎﻟﺪﯨﻐﺎ ﻛﯧﻠﯩﺪﯨﻐﯩﻨﻰ ﻳﺎﻳﻼﻗﻼﺭﺩﺍ ﻳﺎﻳﻠﯩﺘﯩﭗ ﺑﯧﻘﯩﻠﯩﯟﺍﺗﻘﺎﻥ ﻗﻮﻱ ﭘﺎﺩﯨﻠﯩﺮﻯ ﻳﺎﻛﻰ ﺋﯧﻐﯩﻞ - ﻗﻮﺗﺎﻧﻼﺭﺩﺍ ﻳﻪﻡ - ﺑﻮﻏﯘﺯ ﺑﯩﻠﻪﻥ ﺑﻮﺭﺩﯨﻠﯩﯟﺍﺗﻘﺎﻥ ﺗﻮﭖ - ﺗﻮﭖ ﻗﻮﻳﻼﺭ ﺑﻮﻟﯘﺷﻰ ﻣﯜﻣﻜﯩﻦ . ﺑﯘ ﺧﯩﻠﺪﯨﻜﻰ ﻗﻮﻳﻼﺭﻧﻰ ﺑﯧﻘﯩﺸﺘﺎ ﭘﻪﻗﻪﺗﻼ ﺋﯩﻘﺘﯩﺴﺎﺩﯨﻲ ﺋﺎﻣﯩﻞ ﻛﯚﺯﺩﻩ ﺗﯘﺗﯘﻟﻐﺎﭼﻘﺎ ، ﺋﯘﻧﻰ ﭘﯩﺴﺨﯩﻚ ﺋﺎﻣﯩﻠﻼﺭﻧﯩﯔ ﺗﻪﺳﯩﺮﯨﺪﻩ ﺑﯧﻘﯩﻠﯩﺪﯨﻐﺎﻥ ﻣﻪﻛﯩﺖ ﻗﻮﻳﻠﯩﺮﯨﻨﻰ ﺑﯧﻘﯩﺶ ﺑﯩﻠﻪﻥ ﺳﯧﻠﯩﺸﺘﯘﺭﻏﯩﻠﻰ ﺑﻮﻟﻤﺎﻳﺪﯗ . ﺑﺎﺷﻘﯩﭽﯩﺮﻩﻙ ﻗﯩﻠﯩﭗ ﺋﯧﻴﺘﻘﺎﻧﺪﺍ ، ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺑﯧﻘﯩﻠﯩﺸﻰ ﺋﺎﺩﻩﺗﺘﯩﻜﻰ "ﻗﻮﻱ ﺑﯧﻘﯩﺶ" ﺩﯦﮕﻪﻥ ﺳﯚﺯ ﺑﯩﻠﻪﻥ ﺗﻮﻟﯘﻕ ﺋﯩﭙﺎﺩﯨﻠﻪﺵ ﺗﻪﺱ . ﭼﯜﻧﻜﻰ ﺋﺎﺩﻩﺗﺘﯩﻜﻰ ﻗﻮﻳﻼﺭ ﺋﻮﺕ - ﭼﯚﭘﻨﻰ ﺋﺎﺳﺎﺱ ﻗﯩﻠﻐﺎﻥ ﻫﺎﻟﺪﺍ ﺑﯧﻘﯩﻠﺴﺎ ، ﻣﻪﻛﯩﺖ ﻗﻮﻳﻠﯩﺮﻯ ﻳﻪﻡ - ﺑﻮﻏﯘﺯﻧﻰ ﺋﺎﺳﺎﺱ ﻗﯩﻠﻐﺎﻥ ﻫﺎﻟﺪﺍ ﺑﯧﻘﯩﻠﯩﺪﯗ . ﺑﯘ ﻳﻪﺭﺩﻩ ﻛﯚﺯﺩﻩ ﺗﯘﺗﯘﻟﻐﺎﻥ ﻳﻪﻡ - ﺑﻮﻏﯘﺯ ﻗﻮﻧﺎﻕ ﻳﺎﻛﻰ ﻗﻮﻧﺎﻕ ﻳﺎﺭﻣﯩﺴﻰ ، ﺯﯨﻐﯩﺮ ﻛﯜﻧﺠﯩﺮﯨﺴﻰ ،ﻛﯧﭙﻪﻙ ، ﺯﺍﻏﺮﺍ ﻧﺎﻥ ﻗﺎﺗﺎﺭﻟﯩﻘﻼﺭﻧﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺑﻮﻟﯘﭖ ،ﭼﯩﮕﯩﺖ ﻛﯜﻧﺠﯜﺭﯨﺴﻰ ، ﭼﯩﮕﯩﺖ ﺷﺎﻛﯩﻠﻰ ﻗﺎﺗﺎﺭﻟﯩﻖ ﺯﻩﻫﻪﺭﻟﯩﻚ ﺗﻪﺭﻛﯩﺒﻠﻪﺭ ﺑﯧﺮﯨﻠﻤﻪﻳﺪﯗ . ﺑﯘﻧﯩﯔ ﺳﻪﯞﻩﺑﻰ ﻧﺎﻫﺎﻳﯩﺘﻰ ﺋﺎﺩﺩﯨﻲ ﺑﻮﻟﯘﭖ ، ﭼﯩﮕﯩﺖ ﻛﯜﻧﺠﯜﺭﯨﺴﻰ ﯞﻩ ﺷﺎﻛﯩﻠﻰ ﺑﯩﻠﻪﻥ ﺑﯧﻘﯩﻠﻐﺎﻥ ﻗﻮﻳﻼﺭﻧﯩﯔ ﺳﯜﺗﻰ ﻛﯧﺴﯩﻠﯩﭗ ﻛﯧﺘﯩﺪﯨﻐﺎﻥ ﺑﻮﻟﻐﺎﭼﻘﺎ ، ﻗﻮﺯﯨﻼﺭﻧﯩﯔ ﭼﻮﯓ ﺑﻮﻟﯘﺷﯩﻐﺎ ﺗﻪﺳﯩﺮ ﻳﯧﺘﯩﭙﻼ ﻗﺎﻟﻤﺎﺳﺘﯩﻦ ، ﭼﻮﯓ ﻗﻮﻳﻼﺭﺩﯨﻤﯘ 3 - 4 ﺋﺎﻳﺪﯨﻦ ﻛﯧﻴﯩﻦ ﺋﯩﺰﯨﺪﺍ ﭼﯚﺭﮔﯩﻠﻪﻳﺪﯨﻐﺎﻥ ، ﺳﯩﻴﻪﻟﻤﻪﻳﺪﯨﻐﺎﻥ ﻛﯧﺴﻪﻟﻠﯩﻚ ﺋﺎﻻﻣﻪﺗﻠﯩﺮﻯ ﻛﯚﺭﯛﻟﯩﺪﯗ . ﻣﻪﻛﯩﺖ ﻗﻮﻳﻠﯩﺮﯨﻨﻰ ﻧﯘﻗﯘﻝ ﻫﺎﻟﺪﺍ ﭘﯘﻝ ﺗﯧﭙﯩﺸﻨﻰ ﻛﯚﺯﻟﻪﭘﻼ ﺋﻪﻣﻪﺱ ، ﺑﻪﻟﻜﻰ ﺑﯘ ﻗﻮﻳﻼﺭﻧﯩﯔ ﻛﯚﺭﻛﻪﻣﻠﯩﻜﯩﺪﯨﻦ ﯞﻩ ﺋﺎﺩﻩﻣﻨﯩﯔ ﺋﺎﻣﺮﺍﻗﻠﯩﻘﯩﻨﻰ ﻛﻪﻟﺘﯜﺭﯨﺪﯨﻐﺎﻥ ﺋﯩﺠﯩﻠﻠﯩﻘﯩﺪﯨﻦ ﻫﻮﺯﯗﺭﻟﯩﻨﯩﺶ ، ﺯﻭﻗﻠﯩﻨﯩﺸﻨﻰ ﻛﯚﺯﻟﻪﭖ ﺑﯧﻘﯩﭗ ﻛﯧﻠﯩﯟﺍﺗﻘﺎﻥ ﺩﻭﻻﻧﻠﯩﻘﻼﺭ ﻗﺎﺭﺍﭖ ﺗﯘﺭﯗﭖ ﺋﯘﻧﯩﯔ ﺯﻩﻫﻪﺭﻟﯩﻨﯩﭗ ﻗﯧﻠﯩﺸﯩﻨﻰ ﺧﺎﻟﯩﻤﺎﻳﺪﯗ . ﺷﯘﯕﺎ ﺷﯘ ﺩﻩﺭﯨﺠﯩﺪﻩ ﻛﯚﻳﯜﻧﯜﭖ ﺑﺎﻗﯩﺪﯗﻛﻰ ، ﺑﻪﺭﮔﻪﻥ ﻳﻪﻡ - ﺑﻮﻏﯘﺯﻟﯩﺮﯨﻨﯩﯔ ﺯﻩﻫﻪﺭﺳﯩﺰ ﺑﻮﻟﯩﺸﯩﻐﺎ ﻛﯧﭙﯩﻠﻠﯩﻚ ﻗﯩﻠﯩﺸﺘﯩﻦ ﺗﺎﺷﻘﯩﺮﻯ ، ﺑﻪﺯﻯ ﻛﻠﯩﺸﯩﻠﻪﺭ ﻫﻪﺗﺘﺎ ﺋﯧﻐﯩﻞ - ﻗﻮﺗﺎﻧﻼﺭﻏﺎ ﻗﯩﺸﺘﺎ ﻣﻪﺵ ﻗﻮﻳﯘﭖ ، ﻳﺎﺯﺩﺍ ﺷﺎﻣﺎﻟﺪﯗﺭﻏﯘﭺ ﺋﻮﺭﻧﯩﺘﯩﺪﯗ ؛ ﺋﯩﻜﻜﯩﻨﻰ ﻗﻮﺯﯨﻠﯩﻐﺎﻥ ﺳﺎﻏﻠﯩﻘﻼﺭﻧﯩﯔ ﺋﻮﺭﯗﻗﻼﭖ ﻛﯚﺭﯛﻣﺴﯩﺰﻟﯩﺸﯩﭗ ﻛﯧﺘﯩﺸﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺋﯜﭼﯜﻥ ، ﺳﯜﺕ ﺋﯚﭼﻜﯩﻠﯩﺮﯨﻨﻰ ﺳﯧﺘﯩﯟﯦﻠﯩﭗ ﻗﻮﺯﯨﻼﺭﻧﻰ ﺷﯘﻧﯩﯖﻐﺎ ﺋﯧﻤﯩﺘﯩﭗ ﭼﻮﯓ ﻗﯩﻠﯩﺪﯗ . ﻗﻮﺯﯨﻼﺭﻏﺎ "ﺋﯩﻨﯩﻚ ﺋﺎﻧﺎ" ﺗﯧﭙﯩﭗ ﺑﯧﺮﯨﭗ ، ﺳﺎﻏﻠﯩﻘﻨﯩﯔ ﻛﯚﺭﻛﻪﻣﻠﯩﻜﯩﻨﻰ ﺳﺎﻗﻼﺗﺪﯨﻐﺎﻥ ﻣﯘﻧﺪﺍﻕ ﻗﻮﻱ ﻧﻪﺳﯩﻠﻠﯩﺮﯨﮕﻪ ﺗﯧﺨﻰ ﻧﯩﺴﯩﭗ ﺑﻮﻟﻤﯩﻐﺎﻥ ﺑﻮﻟﺴﺎ ﻛﯧﺮﻩﻙ . ﻗﻮﻳﻼﺭﻏﺎ ﻫﻪﻗﯩﻘﯩﻲ ﺗﯜﺭﺩﻩ ﻛﯚﻳﯜﻧﯜﺷﻨﯩﯔ ﻳﻪﻧﻪ ﺑﯩﺮ ﺋﺎﻻﻫﯩﺪﻩ ﭘﺎﻛﯩﺘﻰ ﺷﯘﻛﻰ ، ﺑﯘ ﻳﻪﺭﺩﻩ ﺋﯩﺴﻤﯩﻨﻰ ﺋﺎﺷﻜﺎﺭﻻﺷﻨﻰ ﺧﺎﻟﯩﻤﯩﻐﺎﻥ ﺑﯩﺮ ﺋﺎﺩﻩﻡ ﺑﯘﻧﺪﯨﻦ ﺑﻪﺵ ﻳﯩﻞ ﺑﯘﺭﯗﻥ ﺋﻪﺗﯩﯟﺍﺭﻟﯩﻖ ﺑﯩﺮ ﺗﯘﻳﺎﻕ ﻗﻮﻳﻰ ﺟﺎﻥ ﺗﺎﻟﯩﺸﯩﯟﺍﺗﻘﺎﻧﺪﺍ ، ﮔﯚﺷﯩﻨﻰ ﻳﯩﻴﯩﺶ ﻳﺎﻛﻰ ﺳﯧﺘﯩﺸﻨﻰ ﺋﻮﻳﻼﺷﻤﺎﺳﺘﯩﻦ ، ﺋﻪﻛﺴﯩﭽﻪ ﺋﯚﻟﮕﻪﻧﺪﯨﻦ ﻛﯧﻴﯩﻦ ﺋﯘ ﺋﯧﻐﯩﻠﻐﺎ ﺩﻩﭘﯩﻦ ﻗﯩﻠﯩﻨﻐﺎﻥ . ﺋﯘﻧﯩﯔ ﺳﯚﺯﻟﻪﭖ ﺑﯧﺮﯨﺸﯩﭽﻪ ، ﺑﯘ ﺋﯩﺸﻨﯩﯔ ﺳﻪﯞﻩﺑﻰ ﺋﯩﻜﻜﻰ ﺑﻮﻟﯘﭖ ، ﺑﯩﺮﯨﻨﭽﯩﺪﯨﻦ ، ﺋﯘ ﺳﺎﻏﻠﯩﻖ ﺑﻪﺵ ﻳﯩﻞ ﺋﯩﭽﯩﺪﻩ ﺗﻮﻗﻘﯘﺯ ﺗﯚﻝ ﺑﯧﺮﯨﭗ ، ﺋﯩﮕﯩﺴﯩﻨﻰ 100 ﻣﯩﯔ ﻳﯜﻩﻧﺪﯨﻦ ﺋﺎﺭﺗﯘﻕ ﭘﯘﻟﻐﺎ ﺋﯧﺮﯨﺸﺘﯜﺭﮔﻪﻥ ؛ ﺋﯩﻜﻜﯩﻨﭽﯩﺪﯨﻦ ، ﺋﯩﮕﯩﺴﯩﮕﻪ ﺷﯘ ﺩﻩﺭﯨﺠﯩﺪﻩ ﺋﯩﺠﯩﻞ ﺑﻮﻟﯘﭖ ﻛﻪﺗﻜﻪﻧﻜﻰ ، ﻧﺎﯞﺍﺩﺍ ﺑﺎﺯﺍﺭﻏﺎ ﺋﺎﭘﯩﺮﯨﺸﻘﺎ ﺗﻮﻏﺮﺍ ﻛﻪﻟﺴﻪ ، ﺑﺎﺷﻘﺎ ﻗﻮﻳﻼﺭﻏﺎ ﺋﻮﺧﺸﺎﺵ ﺑﺎﻏﻼﭖ ﻣﺎﯕﻤﯩﺴﯩﻤﯘ ، ﺧﯘﺩﺩﯨﻲ ﺋﯚﮔﯩﺘﯩﻠﮕﻪﻥ ﺋﺎﭘﺸﺎﺭﻛﯩﻼﺭﺩﻩﻙ ﺋﯩﮕﯩﺴﯩﻨﯩﯔ ﺋﯩﺰﯨﻨﻰ ﺑﯧﺴﯩﭗ ﻣﺎﯕﻐﺎﻥ . ﺷﯘﯕﺎ ﺋﯩﮕﯩﺴﻰ ﺋﯘﻧﻰ ﺳﯧﺘﯩﯟﯦﺘﯩﺸﻜﻪ ﻛﯚﺯﻯ ﻗﯩﻴﻤﺎﻱ ، ﺗﺎﻛﻰ ﺋﯚﺯﻯ ﻗﯧﺮﯨﭗ ﺋﯚﻟﮕﯩﭽﻪ ﺑﺎﻗﻘﺎﻥ . ﺋﯚﻟﮕﻪﻧﺪﯨﻦ ﻛﯧﻴﯩﻨﻤﯘ ﺋﯧﻐﯩﻠﻐﺎ ﺋﺎﻻﻫﯩﺪﻩ ﺩﻩﭘﯩﻦ ﻗﯩﻠﻐﺎﻥ . (5) ﺋﯧﻠﯩﻢ - ﺳﯧﺘﯩﻤﺪﯨﻜﻰ ﺋﯚﺯﮔﯩﭽﯩﻠﯩﻚ . ﺋﺎﺩﻩﺗﺘﯩﻜﻰ ﻗﻮﻱ ﺳﻮﺩﯨﺴﯩﺪﺍ ﺋﺎﺳﺎﺳﻠﯩﻘﻰ ﺷﯘ ﻗﻮﻳﻨﯩﯔ ﮔﯚﺵ ﺑﯧﺮﯨﺶ ﻧﯩﺴﺒﯩﺘﯩﮕﻪ ، ﻳﻪﻧﻰ ﺋﯩﻘﺘﯩﺴﺎﺩﯨﻲ ﺋﺎﻣﯩﻠﻼﺭﻏﺎ ﻗﺎﺭﺍﻟﺴﯩﻤﯘ ، ﻟﯧﻜﯩﻦ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺳﻮﺩﯨﺴﯩﺪﺍ ﺑﺎﺷﺘﺎ ﺗﯩﻠﻐﺎ ﺋﯧﻠﯩﭗ ﺋﯚﺗﻜﻪﻧﺪﻩﻙ ﭘﯩﺴﺨﯩﻚ ﺋﺎﻣﯩﻠﻼﺭ ﻫﻪﻝ ﻗﯩﻠﻐﯘﭺ ﺭﻭﻝ ﺋﻮﻳﻨﺎﻳﺪﯗ . ﺗﺎﺷﻘﻰ ﻛﯚﺭﯛﻧﯩﺶ ﺟﻪﻫﻪﺗﺘﻪ ﻗﺎﯕﺸﺎﺭ ، ﻗﯘﻻﻕ ، ﻗﯘﻳﺮﯗﻗﺘﯩﻦ ﺋﯩﺒﺎﺭﻩﺕ "ﺋﯜﭺ ﺋﯚﻟﭽﻪﻡ" ﺋﺎﺳﺎﺱ ﻗﯩﻠﯩﻨﻐﺎﻥ ﻫﺎﻟﺪﺍ ، ﺑﻮﻱ - ﺗﯘﺭﻗﻰ ، ﻳﯧﺸﻰ ، ﺭﻩﯕﮕﻰ ﻗﺎﺗﺎﺭﻟﯩﻘﻼﺭﻏﺎ ﻗﺎﺭﯨﻠﯩﺪﯗ ، ﺋﺎﻧﺪﯨﻦ ﺋﻪﺟﺪﺍﺩﻯ ﺳﯜﺭﯛﺷﺘﯜﺭﯨﻠﯩﺪﯗ . ﺋﻪﺟﺪﺍﺩ ﺳﯜﺭﯛﺷﺘﯜﺭﯛﺵ --- ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺋﯧﻠﯩﻢ - ﺳﯧﺘﯩﻢ ﺋﯩﺸﻠﯩﺮﯨﺪﯨﻜﻰ ﺋﯚﺯﮔﯩﭽﯩﻠﯩﻜﻨﯩﯔ ﺗﯘﻧﺠﯩﺴﻰ ﺑﻮﻟﯘﭖ ، ﺋﯘ ﺑﺎﻫﺎﻏﺎ ﺑﯩﯟﺍﺳﺘﻪ ﺗﻪﺳﯩﺮ ﻛﯚﺭﺳﯩﺘﯩﺪﯗ . ﮔﻪﺭﭼﻪ ﺑﺎﺯﺍﺭﻏﺎ ﺋﯧﻠﯩﭗ ﻛﯩﺮﯨﻠﮕﻪﻥ ﻗﻮﻳﻼﺭﻧﯩﯔ ﻫﻪﻣﻤﯩﺴﯩﻨﯩﯔ ﺋﻪﺟﺪﺍﺩﻯ ﺑﯩﺮ - ﺑﯩﺮﻟﻪﭖ ﺳﯜﺭﯛﺷﺘﯜﺭﯛﻟﯜﭖ ﺳﻮﺩﺍ ﻗﯩﻠﯩﻨﯩﺪﯨﻐﺎﻥ ﺋﯩﺶ ﺑﻮﻟﻤﯩﺴﯩﻤﯘ ، ﻟﯧﻜﯩﻦ ﺗﻪﺟﺮﯨﺒﯩﻠﯩﻚ ﻗﻮﻳﭽﯩﻼﺭ ﺑﯘ ﻧﯘﻗﺘﯩﻐﺎ ﻫﻪﺭﮔﯩﺰ ﺳﻪﻝ ﻗﺎﺭﯨﻤﺎﻳﺪﯗ . ﺑﻮﻟﯘﭘﻤﯘ ﻧﻪﺳﯩﻞ ﺋﯧﻬﺘﯩﻴﺎﺟﻰ ﺋﯜﭼﯜﻥ ﺑﯧﻘﯩﻠﯩﺪﯨﻐﺎﻥ ﻗﻮﭼﻘﺎﺭﻻﺭﻧﻰ ﻳﺎﻛﻰ ﺗﯧﺨﻰ ﭼﯩﺶ ﻳﯩﻤﯩﮕﻪﻥ ﭘﺎﻗﻼﻥ - ﻗﻮﺯﯨﻼﺭﻧﻰ ﺳﯧﺘﯩﯟﯦﻠﯩﺸﺘﺎ ، ﺋﻪﺟﺪﺍﺩ ﺳﯜﺭﯛﺷﺘﯜﺭﯛﺵ ﺋﯚﺗﻜﯩﻠﻰ ﺗﻮﻟﯩﻤﯘ ﭼﯩﯔ ﺋﯩﮕﯩﻠﯩﻨﯩﺪﯗ ، ﭼﯜﻧﻜﻰ ﻳﯧﺸﻰ ، ﺑﻮﻱ - ﺗﯘﺭﻗﻰ ، ﺭﻩﯕﮕﻰ ﻗﺎﺗﺎﺭﻟﯩﻖ ﺗﺎﺷﻘﻰ ﺋﺎﻣﯩﻠﻼﺭ ﺋﻮﭘﻤﯘ - ﺋﻮﺧﺸﺎﺵ ﺑﻮﻟﻐﺎﻥ ﺷﺎﺭﺍﺋﯩﺘﺘﯩﻤﯘ، ﺧﺎﺱ ﺋﯩﺴﯩﻤﻼﺭ ﺑﯩﻠﻪﻥ ﺋﺎﺗﯩﻠﯩﺪﯨﻐﺎﻥ ﺩﺍﯕﻠﯩﻖ ﻗﻮﻳﻼﺭﺩﯨﻦ ﭼﯜﺷﻜﻪﻥ ﻗﻮﺯﺍ - ﭘﺎﻗﻼﻧﻼﺭ ﺑﺎﺭﻏﺎﻧﺴﯧﺮﻯ ﻛﯚﺭﻛﻪﻣﻠﯩﺸﯩﭗ ﺑﺎﺭﺳﺎ ، ﺋﺎﺩﻩﺗﺘﯩﻜﻰ ﻗﻮﻳﻼﺭﺩﯨﻦ ﺗﺎﺳﺎﺩﯨﭙﯩﻲ ﭼﯩﺮﺍﻳﻠﯩﻖ ﭼﯜﺷﻜﻪﻥ ﻗﻮﺯﺍ - ﭘﺎﻗﻼﻧﻼﺭ ﭼﻮﯓ ﺑﻮﻟﻐﺎﻧﺪﺍ ﺧﯧﻤﯩﻐﺎ ﻳﯧﻨﯩﭗ ﻳﻪﻧﻪ ﺋﺎﺩﻩﺗﺘﯩﻜﻰ ﻗﻮﻳﻐﺎ ﺋﺎﻳﻠﯩﻨﯩﭗ ﻗﺎﻟﯩﺪﯨﻐﺎﻥ ﺋﯩﺸﻼﺭ ﺑﻮﻟﯘﭖ ﻗﺎﻟﯩﺪﯗ . ﺷﯘﯕﺎ ﺋﻮﺧﺸﺎﺵ ﺷﺎﺭﺍﺋﯩﺘﺘﯩﻤﯘ ، ﺋﻪﺟﺪﺍﺩﻯ ﺩﺍﯕﻠﯩﻖ ﻗﻮﺯﺍ - ﭘﺎﻗﻼﻧﻼﺭ ﻧﻪﭼﭽﻪ ﻣﯩﯔ ﻳﯜﻩﻥ ﻗﯩﻤﻤﻪﺕ ﺳﻮﺩﺍ ﻗﯩﻠﯩﻨﺴﺎ ، ﺋﻪﺟﺪﺍﺩﻯ ﺋﯧﻨﯩﻖ ﺑﻮﻟﻤﯩﻐﺎﻧﻠﯩﺮﯨﻨﯩﯔ ﺑﺎﻫﺎﺳﻰ ﻧﯩﺴﺒﻪﺗﻪﻥ ﺗﯚﯞﻩﻥ ﺑﻮﻟﯩﺪﯗ . ﺑﺎﺷﺘﺎ ﺗﯩﻠﻐﺎ ﺋﯧﻠﯩﭗ ﺋﯚﺗﯜﻟﮕﻪﻥ ﺩﺍﯕﻠﯩﻖ ﻗﻮﻳﻼﺭﺩﯨﻦ ﭼﯜﺷﻜﻪﻥ ﻗﻮﺯﯨﻼﺭﻏﺎ ﺋﺎﻟﺪﯨﻦ ﭘﯘﻝ ﺑﯧﺮﯨﭗ ﺳﻮﺩﯨﻠﯩﺸﯩﭗ ، ﻛﯧﻴﯩﻦ ﻗﻮﺯﺍ ﭼﻮﯓ ﺑﻮﻟﻐﺎﻧﺪﺍ ﺋﯧﻠﯩﭗ ﻛﯧﺘﯩﺶ ﻫﺎﺩﯨﺴﯩﺴﯩﻤﯘ ﻣﺎﻫﯩﻴﻪﺗﺘﻪ ﺋﻪﺟﺪﺍﺩ ﺳﯜﺭﯛﺷﺘﯜﺭﯛﺷﺘﯩﻦ ﺋﯩﺒﺎﺭﻩﺕ ﺑﻮﻟﯘﭖ ، ﺑﯘ ﺧﯩﻞ ﺋﯚﺯﮔﯩﭽﻪ ﺋﺎﺩﻩﺗﻨﻰ ﺑﺎﺷﻘﺎ ﻗﻮﻱ ﺗﯜﺭﻟﯩﺮﯨﻨﯩﯔ ﺳﻮﺩﯨﺴﯩﺪﺍ ﺋﯘﭼﺮﺍﺗﻘﯩﻠﻰ ﺑﻮﻟﻤﺎﻳﺪﯗ . ﺑﯘﻻﺭﺩﯨﻦ ﺑﺎﺷﻘﺎ ، ﺳﺎﺗﻘﺎﻥ ﻗﻮﻳﻨﯩﯔ ﺑﺎﺵ ﺑﯧﻐﯩﻨﻰ ﺑﻪﺭﻣﻪﺳﻠﯩﻚ -- ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺋﯧﻠﯩﻢ - ﺳﯧﺘﯩﻢ ﻗﯩﻠﯩﻨﯩﺸﯩﺪﯨﻜﻰ ﻳﻪﻧﻪ ﺑﯩﺮ ﺋﯚﺯﮔﯩﭽﯩﻠﯩﻚ ﺑﻮﻟﯘﭖ ، ﻗﻮﻱ ﺋﺎﻟﻐﯘﭼﯩﻨﯩﯔ ﺋﺎﺭﻏﺎﻣﭽﺎ ﺳﯧﺘﯩﯟﯦﻠﯩﺸﻰ ﺋﯜﭼﯜﻥ ﻧﯩﺮﻧﻪﭼﭽﻪ ﻳﯜﻩﻥ ﺑﻪﺭﺳﻪ ﺑﯧﺮﯨﺪﯗﻛﻰ ، ﺳﺎﺗﻘﺎﻥ ﻗﻮﻳﻨﯩﯔ ﺑﺎﺵ ﺑﯧﻐﯩﻨﻰ ﻫﻪﺭﮔﯩﺰ ﺑﻪﺭﻣﻪﻳﺪﯗ . ﺑﯘ ﺧﯩﻞ ﺋﺎﺩﻩﺕ ﮔﻪﺭﭼﻪ ﺷﯘ ﻗﻮﻱ ﺳﯧﺘﯩﯟﯦﺘﯩﻠﮕﻪﻥ ﺑﻮﻟﺴﯩﻤﯘ ، ﻟﯧﻜﯩﻦ ﻗﻮﻱ ﺋﯩﮕﯩﺴﯩﻨﯩﯔ ﻗﻮﻱ ﺑﯧﻘﯩﺸﺘﯩﻦ ﺋﻪﺳﻼ ﯞﺍﺯ ﻛﻪﭼﻤﯩﮕﻪﻧﻠﯩﻜﯩﻨﻰ ، ﺑﻪﻟﻜﻰ ﺑﺎﻗﻘﺎﻥ ﻗﻮﻳﻠﯩﺮﯨﻨﯩﯔ ﺋﯩﺰﯨﻨﻰ ﺋﯚﭼﯜﺭﻣﻪﻱ، ﺗﯧﺨﯩﻤﯘ ﺗﯩﺮﯨﺸﯩﺶ ﺋﯩﺴﺘﯩﻜﻰ ﺑﺎﺭﻟﯩﻘﯩﻨﻰ ﺋﯩﭙﺎﺩﯨﻠﻪﻳﺪﯗ . ﻳﯘﻗﯘﺭﯨﺪﺍ ﺗﯩﻠﻐﺎ ﺋﯧﻠﯩﭗ ﺋﯚﺗﯜﻟﮕﻪﻥ ﻧﯘﻗﺘﯩﻼﺭﺩﯨﻦ ﺑﺎﺷﻘﺎ ، ﺩﻭﻻﻧﻠﯩﻘﻼﺭ ﺋﺎﺭﯨﺴﯩﺪﺍ ﺗﻪﺑﯩﺌﯩﻲ ﺋﺎﺩﻩﺗﻜﻪ ﺋﺎﻳﻠﯩﻨﯩﭗ ﻛﻪﺗﻜﻪﻥ ﺗﯚﯞﻩﻧﺪﯨﻜﻰ ﺋﯩﻜﻜﻰ ﻫﺎﺩﯨﺴﯩﻤﯘ ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺩﻭﻻﻥ ﺩﯨﻴﺎﺭﯨﺪﺍ ﻫﻪﻗﯩﻘﻪﺗﻪﻥ ﺋﻪﺭﻣﻪﻙ ﻫﺎﻳﯟﺍﻥ ﻗﺎﺗﺎﺭﯨﻐﺎ ﻗﻮﺷﯘﻟﯘﭖ ﻛﻪﺗﻜﻪﻧﻠﯩﻜﯩﻨﻰ ﻛﯚﺭﯛﯞﯦﻠﯩﺶ ﻣﯜﻣﻜﯩﻦ . ﺑﯩﺮﻯ ، ﺩﻭﻻﻥ ﺩﯨﻴﺎﺭﯨﺪﺍ ﻫﯧﭽﻨﯧﻤﯩﺴﻰ ﻳﻮﻕ ﻧﺎﻣﺮﺍﺕ ﻫﯧﺴﺎﺑﻠﯩﻨﯩﺪﯨﻐﺎﻥ ﺋﺎﺋﯩﻠﯩﻠﻪﺭﻧﯩﯖﻤﯘ ﺋﺎﺩﻩﺗﺘﻪ ﺑﯩﺮﻩﺭ ﭘﺎﻗﻠﯩﻨﻰ ﺑﻮﻟﯩﺪﯗ . ﺑﯘ ﺋﻪﻫﯟﺍﻝ ﻗﻮﻱ ﺑﯧﻘﯩﺸﺘﺎ ﺋﻪﯞﺯﻩﻝ ﺷﺎﺭﺍﺋﯩﺘﻘﺎ ﺋﯩﮕﻪ ﺑﻮﻟﻐﺎﻥ ﻳﯧﺰﯨﻼﺭﺩﯨﻼ ﺷﯘﻧﺪﺍﻕ ﺑﻮﻟﯘﭖ ﻗﺎﻟﻤﺎﺳﺘﯩﻦ ، ﺑﻪﻟﻜﻰ ﺋﻮﺕ - ﭼﯚﭖ ﯞﻩ ﺋﯧﻐﯩﻞ - ﻗﻮﺗﺎﻥ ﺋﯩﺸﯩﺪﺍ ﺯﻭﺭ ﻗﯩﻴﯩﻨﭽﯩﻠﯩﻘﻘﺎ ﺩﯗﭺ ﻛﯧﻠﯩﺪﯨﻐﺎﻥ ﺷﻪﻫﻪﺭ ﺋﺎﺋﯩﻠﯩﺴﻰ ﺋﯜﭼﯜﻧﻤﯘ ﺋﻮﺭﺗﺎﻕ ﺑﻮﻟﯘﭖ ، ﻫﻪﺗﺘﺎ ﺗﯘﻝ ﺧﻮﺗﯘﻥ ، ﺑﻮﻳﺘﺎﻕ ﺑﻮﯞﺍﻳﻼﺭ ﺋﺎﺭﯨﺴﯩﺪﯨﻤﯘ ﺑﯩﺮﻩﺭ ﭘﺎﻗﻼﻥ ﺑﯧﻘﯩﭗ ﺋﯚﺯﯨﮕﻪ ﻫﻪﻣﺮﺍﻫ ﻗﯩﻠﯩﯟﺍﻟﯩﺪﯨﻐﺎﻧﻼﺭ ﺩﺍﺋﯩﻢ ﺋﯘﭼﺮﺍﭖ ﺗﯘﺭﯨﺪﯗ . ﻳﯩﻐﯩﻨﭽﺎﻗﻠﯩﻐﺎﻧﺪﺍ ، ﺩﻭﻻﻧﻠﯩﻘﻼﺭﻧﯩﯔ ﻗﻮﻱ ﻣﻪﺩﻩﻧﯩﻴﯩﺘﯩﺪﯨﻜﻰ ﺋﻪﯓ ﺋﯚﺯﮔﯩﭽﻪ ﺑﻮﻟﻐﺎﻥ ﺧﺎﺳﻠﯩﻖ --- ﺋﯘﻻﺭﻧﯩﯔ ﺋﻪﯞﻻﺩﻣﯘ - ﺋﻪﯞﻻﺩ ﺋﯩﺰﭼﯩﻞ ﺋﯩﺰﺩﯨﻨﯩﺶ ﺋﺎﺭﻗﯩﻠﯩﻖ ، ﻣﻪﻛﯩﺖ ﻗﻮﻳﯩﺪﯨﻦ ﺋﯩﺒﺎﺭﻩﺕ ﺋﯩﻘﺘﯩﺴﺎﺩﯨﻲ ﻗﯩﻤﻤﻪﺗﻜﻪ ، ﻫﻪﻡ ﻫﻮﺯﯗﺭﻟﯩﻨﯩﺶ ﻗﯩﻤﻤﯩﺘﯩﮕﻪ ﺋﯩﮕﻪ ﺑﯘ ﺋﻪﻻ ﻧﻪﺳﯩﻠﻨﻰ ﻣﯘﯞﻩﭘﭙﯩﻘﯩﻴﻪﺗﻠﯩﻚ ﻫﺎﻟﺪﺍ ﻳﯧﺘﯩﺸﺘﯜﺭﯛﭖ ﭼﯩﻘﯩﭗ ، ﺋﯘﻧﻰ ﺩﻭﻻﻥ ﺭﺍﻳﻮﻧﯩﺪﺍ ﺋﻪﺭﻣﻪﻙ ﻫﺎﻳﯟﺍﻥ ﺩﻩﺭﯨﺠﯩﺴﯩﮕﻪ ﻛﯚﺗﯜﺭﮔﻪﻧﻠﯩﻜﯩﺪﻩ ، ﺩﯦﻴﯩﺶ ﻣﯜﻣﻜﯩﻦ . ﻣﻪﻛﯩﺖ ﻗﻮﻳﻠﯩﺮﯨﻨﯩﯔ ﺋﻪﺭﻣﻪﻙ ﻫﺎﻳﯟﺍﻥ ﻗﺎﺗﺎﺭﯨﻐﺎ ﻗﻮﺷﯘﻟﯩﺸﯩﺪﯨﻦ ﺋﯩﺒﺎﺭﻩﺕ ﺑﯘ ﺋﯚﺯﮔﯩﭽﻪ ﻫﺎﺩﯨﺴﯩﻨﯩﯔ ﺳﻪﯞﻩﺑﯩﻨﻰ ﻣﯧﻨﯩﯖﭽﻪ ﺩﻭﻻﻧﻠﯩﻘﻼﺭﻧﯩﯔ ﺋﻪﻧﺌﻪﻧﯩﺴﯩﺪﯨﻦ ، ﺷﯘﻧﺪﺍﻗﻼ ﺋﺎﺷﯘ ﺋﻪﻧﺌﻪﻧﻪ ﺋﺎﺳﺎﺳﯩﺪﺍ ﺩﺍﯞﺍﻣﻠﯩﺸﯩﭗ ﻛﯧﻠﯩﯟﺍﺗﻘﺎﻥ ﻗﻮﻳﺨﯘﻣﺎﺭﻟﯩﻖ ﭘﯩﺴﺨﯩﻜﯩﺴﯩﺪﯨﻦ ﺋﯩﺰﺩﻩﺷﻜﻪ ﺗﻮﻏﺮﺍ ﻛﯧﻠﯩﺪﯗ . ﺑﺎﺷﺘﺎ ﺗﯩﻠﻐﺎ ﺋﯧﻠﯩﭗ ﺋﯚﺗﯜﻟﮕﻪﻧﺪﻩﻙ ، ﺗﺎﺭﯨﺨﺘﯩﻦ ﺑﯘﻳﺎﻥ ﺗﻪﻛﻠﯩﻤﺎﻛﺎﻥ ﮔﯩﺮﯞﻩﻛﻠﯩﺮﯨﺪﯨﻜﻰ ﭘﯩﻨﻬﺎﻥ ﺟﺎﻳﻼﺭﻧﻰ ﻣﺎﻛﺎﻥ ﻗﯩﻠﯩﭗ ﻳﺎﺷﺎﭖ ﻛﻪﻟﮕﻪﻥ ﺩﻭﻻﻧﻠﯩﻘﻼﺭﻧﯩﯔ ﺋﻮﯞﭼﯩﻠﯩﻖ ، ﭼﺎﺭﯞﯨﭽﯩﻠﯩﻖ ﺑﺎﺳﻘﯘﭼﯩﺪﯨﻦ ﺩﯦﻬﻘﺎﻧﭽﯩﻠﯩﻖ ﺑﺎﺳﻘﯘﭼﯩﻐﺎ ﺋﯚﺗﯜﺷﻰ ﺑﺎﺷﻘﺎ ﻗﯧﺮﯨﻨﺪﺍﺵ ﻗﻪﺑﯩﻠﯩﮕﻪ ﻗﺎﺭﯨﻐﺎﻧﺪﺍ ﻧﯩﺴﺒﻪﺗﻪﻥ ﻛﯧﻴﯩﻨﺮﻩﻙ ﺑﻮﻟﻐﺎﻥ . ﺑﯘ ﻫﺎﻝ ﺩﻭﻻﻥ ﺋﯘﺳﯘﻟﯩﻨﯩﯔ ﺗﯚﺕ ﺋﯚﺯﮔﯩﺮﯨﺸﻠﯩﻚ ﺑﯩﺮ ﭘﯜﺗﯜﻥ ﮔﻪﯞﺩﯨﺴﯩﺪﯨﻤﯘ ﺋﯚﺯ ﺋﯩﭙﺎﺩﯨﺴﯩﻨﻰ ﺗﺎﭘﻘﺎﻥ ﺑﻮﻟﯘﭖ ، ﭼﺎﺗﻘﺎﻟﻼﺭﻧﻰ ﻗﺎﻳﺮﯨﭗ ﺋﻮﯞ ﺋﯩﺰﺩﻩﯞﻩﺗﻘﺎﻥ ؛ ﭘﯘﺕ - ﻗﻮﻟﻠﯩﺮﯨﻨﻰ ﺗﻪﯓ ﺋﯩﺸﻘﺎ ﺳﯧﻠﯩﭗ ﺟﺎﻥ ﺗﯩﻜﯩﭗ ﺋﯧﻠﯩﺸﯩﯟﺍﺗﻘﺎﻥ ؛ ﺋﻮﯞﻧﻰ ﻗﻮﺭﺷﯩﯟﯦﻠﯩﭗ ﻫﯘﺟﯘﻡ ﻗﯩﻠﯩﯟﺍﺗﻘﺎﻥ ﯞﻩ ﺋﺎﺧﯩﺮﯨﺪﺍ ﻏﻪﻟﯩﺒﯩﮕﻪ ﺋﯧﺮﯨﺸﯩﭗ ﺗﻪﻧﺘﻪﻧﻪ ﻗﯩﻠﯩﯟﺍﺗﻘﺎﻥ ﻛﯚﺭﯛﻧﯜﺷﻠﻪﺭﺩﯨﻦ ﺑﯩﺮ ﭘﯜﺗﯜﻥ ﺋﻮﯞﭼﯩﻠﯩﻖ ﺟﻪﺭﻳﺎﻧﯩﻨﯩﯔ ﻛﺎﺭﺗﯩﻨﯩﺴﯩﻨﻰ ﻛﯩﺸﯩﻨﯩﯔ ﻛﯚﺯ ﺋﺎﻟﺪﯨﺪﯨﻦ ﺑﯩﺮ - ﺑﯩﺮﻟﻪﭖ ﺋﯚﺗﯩﺪﯗ . ﺩﯦﻤﻪﻛﭽﯩﻤﻪﻧﻜﻰ ، ﺋﻮﯞﭼﯩﻠﯩﻖ ، ﭼﺎﺭﯞﯨﭽﯩﻠﯩﻖ ﺑﺎﺳﻘﯘﭼﯩﺪﯨﻦ ﺩﯦﻬﻘﺎﻧﭽﯩﻠﯩﻖ ﺑﺎﺳﻘﯘﭼﯩﻐﺎ ﻛﯧﻴﯩﻨﺮﻩﻙ ﺋﯚﺗﻜﻪﻥ ﻣﯩﻠﻠﻪﺕ ﻳﺎﻛﻰ ﻗﻪﺑﯩﻠﯩﻠﻪﺭﻧﯩﯔ ﻛﯚﻧﺪﯛﺭﯛﻟﮕﻪﻥ ﻫﺎﻳﯟﺍﻧﻼﺭﻏﺎ ﻫﯧﺮﯨﺴﻤﻪﻥ ﻛﯧﻠﯩﺸﻰ ﺗﻪﺑﯩﺌﯩﻲ ﺋﻪﻫﯟﺍﻝ . ﺋﯘﻧﯩﯔ ﺋﯜﺳﺘﯩﮕﻪ ﺩﻭﻻﻧﻠﯩﻘﻼﺭﻣﯘ ﺑﺎﺷﻘﺎ ﻗﻪﺑﯩﻠﯩﻠﻪﺭﺩﯨﻜﻰ ﻗﯧﺮﯨﻨﺪﺍﺷﻠﯩﺮﯨﻐﺎ ﺋﻮﺧﺸﺎﺵ ﺋﯩﺴﻼﻡ ﺩﯨﻨﯩﻐﺎ ﺋﯧﺘﯩﻘﺎﺩ ﻗﯩﻠﻐﺎﭼﻘﺎ ، ﺩﯨﻨﯩﻲ ﺋﻪﻗﯩﺪﯨﻠﻪﺭﺩﯨﻜﻰ ﻗﻮﻳﻨﯩﯔ ﺟﻪﻧﻨﻪﺗﺘﯩﻦ ﭼﯩﻘﻘﺎﻧﻠﯩﻘﯩﻐﺎ ﺩﺍﺋﯩﺮ ﺭﯨﯟﺍﻳﻪﺗﻠﻪﺭ ﺩﻭﻻﻧﻠﯩﻘﻼﺭﻧﯩﯔ ﭘﯩﺴﺨﯩﻜﯩﺴﯩﺪﯨﻜﻰ ﻗﻮﻳﺨﯘﻣﺎﺭﻟﯩﻖ ﺑﯩﻠﻪﻥ ﻗﻮﺷﯘﻟﯘﭖ ، ﺭﯦﺌﺎﻝ ﺗﯘﺭﻣﯘﺷﺘﺎ ﻣﻪﻳﻠﻰ ﻗﺎﻧﭽﯩﻠﯩﻚ ﺟﺎﭘﺎ ﭼﯧﻜﯩﺶ ﯞﻩ ﻗﺎﻧﭽﯩﻠﯩﻚ ﺯﯨﻴﺎﻥ ﺗﺎﺭﺗﯩﺸﺘﯩﻦ ﻗﻪﺗﺌﯩﻴﻨﻪﺯﻩﺭ ، ﻗﻮﻳﻨﻰ ﻗﻪﺩﯨﺮﻟﻪﻳﺪﯨﻐﺎﻥ ﺋﯚﺯﮔﯩﭽﻪ ﺑﯩﺮ ﺋﻪﻣﻪﻟﯩﻲ ﺋﺎﺩﻩﺗﻨﻰ ﺷﻪﻛﯩﻠﻠﻪﻧﺪﯛﺭﮔﻪﻥ . ﺋﻪﻧﻪ ﺷﯘ ﺋﻪﻣﻪﻟﯩﻲ ﺋﺎﺩﻩﺕ ﻣﻪﻛﯩﺖ ﻗﻮﻳﯩﻨﯩﯔ ﺋﻪﺭﻣﻪﻙ ﻫﺎﻳﯟﺍﻥ ﻗﺎﺗﺎﺭﯨﻐﺎ ﻗﻮﺷﯘﻟﯩﺸﯩﻐﺎ ﺋﺎﺳﺎﺱ ﺑﻮﻟﻐﺎﻥ . ﺑﯘ ﻳﻪﺭﺩﻩ ﺷﯘﻧﯩﻤﯘ ﺋﺎﻻﻫﯩﺪﻩ ﺋﻪﺳﻜﻪﺭﺗﯩﭗ ﺋﯚﺗﯜﺷﻜﻪ ﺗﻮﻏﺮﺍ ﻛﯧﻠﯩﺪﯗﻛﻰ ، ﺩﻭﻻﻧﻠﯩﻘﻼﺭﻧﯩﯔ ﻗﻮﻱ ﻣﻪﺩﻩﻧﯩﻴﯩﺘﻰ ﻗﺎﻧﺪﺍﻗﺘﯘﺭ ﻧﯘﻗﯘﻝ ﻫﺎﻟﺪﯨﻜﻰ ﺩﯨﻨﯩﻲ ﺋﻪﻗﯩﺪﯨﻠﻪﺭﻧﯩﯔ ﻣﻪﻫﺴﯘﻟﻰ ﺑﻮﻟﯘﭖ ﻗﺎﻟﻤﺎﺳﺘﯩﻦ ﺑﻪﻟﻜﻰ ﺗﯧﮕﻰ - ﺗﻪﻛﺘﯩﺪﯨﻦ ﺋﯧﻴﺘﻘﺎﻧﺪﺍ ﺋﺎﻕ ﻛﯚﯕﯜﻝ ، ﺋﻪﻣﮕﻪﻛﭽﺎﻥ ﺩﻭﻻﻥ ﺧﻪﻟﻘﯩﻨﯩﯔ ﻗﺎﻥ - ﻗﯧﻨﯩﻐﺎ ﺳﯧﯖﯩﭗ ﻛﻪﺗﻜﻪﻥ ﺗﻪﺑﯩﺌﻪﺗﺘﯩﻜﻰ ﺑﺎﺭﻟﯩﻖ ﺟﺎﻧﻠﯩﻘﻼﺭ ﺑﯩﻠﻪﻥ ﺑﯩﺮﮔﻪ ﺋﻪﭖ - ﺋﯩﻨﺎﻕ ﻳﺎﺷﺎﺵ ﺋﯩﺴﺘﯩﻜﯩﻨﯩﯔ ﻣﻪﻫﺴﯘﻟﻰ . ﺩﻭﻻﻧﻠﯩﻘﻼﺭﻧﯩﯔ ﻧﻪﺯﻩﺭﯨﺪﻩ ﺋﺎﺩﻩﻡ ﺋﻮﻳﻼﺵ ، ﭘﯩﻜﯩﺮ ﻗﯩﻠﯩﺶ ، ﺳﯚﺯﻟﻪﺵ .... ﻗﺎﺗﺎﺭﻟﯩﻖ ﺋﯩﻘﺘﯩﺪﺍﺭﻟﯩﺮﻯ ﺑﯩﻠﻪﻥ ﺋﯩﺠﺘﯩﻤﺎﺋﯩﻲ ﺟﻪﻫﻪﺗﺘﯩﻦ ﻫﺎﻳﯟﺍﻧﻼﺭﺩﯨﻦ ﺋﯜﺳﺘﯜﻥ ﺗﯘﺭﺳﯩﻤﯘ ، ﻟﯧﻜﯩﻦ ﺗﻪﺑﯩﺌﻪﺗﻨﯩﯔ ﺑﯩﺮ ﭘﯜﺗﯜﻧﻠﯜﻛﻰ ﺟﻪﻫﻪﺗﺘﯩﻦ ﺋﯧﻠﯩﭗ ﺋﯧﻴﺘﻘﺎﻧﺪﺍ ، ﺋﺎﺩﻩﻣﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺑﺎﺭﻟﯩﻖ ﺟﺎﻧﻠﯩﻘﻼﺭ ﺋﻮﺧﺸﺎﺷﻼ ﺋﺎﻧﺎ ﺗﻪﺑﯩﺌﻪﺗﻨﯩﯔ ﺳﯚﻳﯜﻣﻠﯜﻙ ﭘﻪﺭﺯﻩﻧﺘﻠﯩﺮﻯ . ﺋﺎﻧﺎ ﺋﯜﭼﯜﻥ ﺋﯧﻴﺘﻘﺎﻧﺪﺍ ، ﭘﻪﺭﺯﻩﻧﺘﻠﻪﺭ ﭼﻮﯓ ﻳﺎﻛﻰ ﻛﯩﭽﯩﻚ ، ﭼﯩﺮﺍﻳﻠﯩﻖ ﻳﺎﻛﻰ ﺳﻪﺕ ﺑﻮﻟﯩﺸﯩﺪﯨﻦ ﻗﻪﺗﺌﯩﻴﻨﻪﺯﻩﺭ ﻫﻪﻣﻤﯩﺴﻰ ﺋﻮﭘﺌﻮﺧﺸﺎﺵ ، ﺑﺎﺭﺍﯞﻩﺭﺩﯗﺭ . ﺋﻪﻣﻤﺎ ﺗﻪﺑﯩﺌﻪﺕ ﺋﺎﻧﯩﻨﯩﯔ ﭘﻪﺭﺯﻩﻧﺘﻠﯩﺮﻯ ﺋﯩﭽﯩﺪﯨﻜﻰ ﺋﻪﯓ ﯞﺍﭘﺎﺳﯩﺰ ﺑﻮﻟﻐﺎﻥ ﺋﺎﺩﻩﻡ ﺋﯚﺯﯨﻨﯩﯔ ﺋﯩﻘﺘﯩﺪﺍﺭﯨﻐﺎ ﺗﻪﻣﻪﻧﻨﺎ ﻗﻮﻳﯘﭖ ، ﺑﺎﺷﻘﺎ ﺟﺎﻧﻠﯩﻘﻼﺭﻏﯩﻼ ﺋﻪﻣﻪﺱ ، ﻫﻪﺗﺘﺎ ﺋﯚﺯﯨﻨﯩﯔ ﻗﺎﻥ - ﻗﯧﺮﯨﻨﺪﺍﺷﻠﯩﺮﯨﻐﯩﻤﯘ ﺋﺎﺳﯩﻴﻠﯩﻖ ﻗﯩﻠﯩﺸﺘﯩﻦ ﻳﺎﻧﻤﺎﻳﺪﯗ . ﻣﯘﺷﯘ ﻣﻪﻧﯩﺪﯨﻦ ﺋﯧﻴﺘﻘﺎﻧﺪﺍ ، ﯞﺍﭘﺎﺳﯩﺰ ، ﺋﯩﻤﺎﻥ - ﺋﯧﺘﯩﻘﺎﺩﺳﯩﺰ ، ﺗﯘﺯﻛﻮﺭ ، ﻧﻪﭘﺴﻰ ﺑﺎﻻ ﺑﻪﺯﻯ ﺋﺎﯕﺴﯩﺰ ﺋﺎﺩﻩﻣﻠﻪﺭﺩﯨﻦ ، ﺑﺎﺷﻘﯩﻼﺭﻧﯩﯔ ﻣﻪﻧﭙﻪﺋﻪﺗﯩﮕﻪ ﻫﯧﭽﻘﺎﻧﺪﺍﻕ ﺯﯨﻴﺎﻥ - ﺯﻩﺧﻤﻪﺕ ﻳﻪﺗﻜﯜﺯﻣﻪﻳﺪﯨﻐﺎﻥ ﻫﺎﻳﯟﺍﻧﻼﺭ ﻳﺎﺧﺸﯩﺮﺍﻕ . ﺑﯘﻧﻰ "ﻫﺎﻳﯟﺍﻥ ﺑﺎﻟﯩﺴﻰ ﺑﺎﻗﺴﺎﯓ ﺋﺎﻏﺰﻯ -ﺑﯘﺭﻧﯘﯕﻨﻰ ﻳﺎﻍ ﺋﯧﺘﻪﺭ ، ﺋﺎﺩﻩﻡ ﺑﺎﻟﯩﺴﻰ ﺑﺎﻗﺴﺎﯓ ﺋﺎﻏﺰﻯ - ﺑﯘﺭﻧﯘﯕﻨﻰ ﻗﺎﻥ ﺋﯧﺘﻪﺭ" ﺩﯦﮕﻪﻥ ﺗﻪﻣﺴﯩﻠﺪﯨﻦ ، ﺷﯘﻧﺪﺍﻗﻼ ، ﺗﻮﻣﯘﺭﯨﺪﺍ ﺩﻭﻻﻥ ﻗﯧﻨﻰ ﺋﺎﻗﯩﺪﯨﻐﺎﻥ ﺷﺎﺋﯩﺮﻻﺭﻧﯩﯔ ﻗﻮﻱ ﻫﻪﻗﻘﯩﺪﯨﻜﻰ ﻳﺎﺯﻏﺎﻥ ﺭﯗﺑﺎﺋﯩﻴﺴﯩﺪﯨﻜﻰ : ﻗﻮﻱ ﺑﺎﻗﺴﺎﯓ ﺋﻮﺕ - ﭼﯚﭖ ﻳﻪﭖ ﺳﺎﯕﺎ ﮔﯚﺵ ﺑﯧﺮﻩﺭ ، ﻳﯧﺴﻪﯓ ﮔﯚﺵ ، ﺳﺎﺗﺴﺎﯓ ﭘﯘﻝ ، ﻧﻪﭘﻨﻰ ﻗﻮﺵ ﺑﯧﺮﻩﺭ . ﯞﻩ ﻟﯧﻜﯩﻦ ﺋﯩﺸﯩﻨﯩﭗ ﻧﺎﺋﻪﻫﻠﯩﻠﻪﺭﮔﻪ ، ﻧﯧﻤﻪ ﺑﻪﺭﺳﻪﯓ ﺋﺎﺧﯩﺮﻯ ﺳﺎﯕﺎ ﻣﯘﺷﺖ ﺑﯧﺮﻩﺭ . ﺩﯦﮕﻪﻥ ﻛﯘﺑﻠﯧﺘﻠﯩﺮﯨﺪﯨﻦ ﺋﯧﻨﯩﻖ ﻛﯚﺭﯛﯞﯦﻠﯩﺶ ﻣﯜﻣﻜﯩﻦ . ﻣﻪﻧﺒﻪ: << ﻣﯘﻧﺒﻪﺭ>> ﮊﻭﺭﻧﯩﻠﯩﻨﯩﯔ 2005 - ﻳﯩﻠﻠﯩﻖ 5 - ﺳﺎﻧﯩﺪﯨﻦ ، ﺋﺎﭘﺘﻮﺭﻯ -- ﺗﯘﺭﺳﯘﻧﺒﻪﮒ ﺋﯩﺒﺮﺍﻫﯩﻢ ﺗﺎﻳﻤﺎﺱ .