ﺑﻪﺭﻗﻰ: ﺗﺎﺭﯨﺨﻨﯩﯔ ﭘﯩﻠﺴﯩﺮﺍﺗﯩﺪﺍ ﺗﯘﻏﯘﻟﻐﺎﻥ ﺋﻮﻳﻼﺭ

ﺑﻪﺭﻗﻰ: ﺗﺎﺭﯨﺨﻨﯩﯔ ﭘﯩﻠﺴﯩﺮﺍﺗﯩﺪﺍ ﺗﯘﻏﯘﻟﻐﺎﻥ ﺋﻮﻳﻼﺭ

Berqi

 يوللىغان ۋاقتى 2006-6-22

سۇئال سورىغۇچى : ئوسمانجان مۇھەممەت پاسانى

جاۋاپ بەرگۈچى:ئابدۇلئەھەد ئابدۇرەشىد بەرقى

ﺑﯜﮔﯜﻧﻜﻰ ﺷﯧﺌﯩﺮﯨﻴﯩﺘﯩﻤﯩﺰﻧﯩﯔ ﺩﺍﺷﻘﺎﺯﯨﻨﻰ ﭼﯧﻘﯩﻠﻐﺎﻧﺪﻩﻙ ﺗﯘﺭﯨﺪﯗ.ﺑﯘ ﺩﺍﺷﻘﺎﺯﺍﻧﻨﻰ ﺑﯩﺮ ﺗﯜﺭﻛﯜﻡ ﺷﯚﻫﺮﻩﺗﭙﻪﺭﻩﺱ ﺋﻪﺩﻩﺑﯩﻴﺎﺕ ‹‹ﺋﺎﺷﯩﻖ››ﻟﯩﺮﻯ ﺯﻭﺭﻣﯘ ﺯﻭﺭ ﺋﺎﺳﻘﺎﻥ ﺋﯩﺪﻯ.ﭼﯧﻘﯩﻠﻐﯩﻨﯩﻤﯘ ﻳﺎﺧﺸﻰ ﺑﻮﻟﺪﻯ!ﺑﯘ ﻧﻮﻗﺘﯩﺪﺍ ﺑﺎﺯﺍﺭ ﺋﯩﮕﯩﻠﯩﻜﯩﻨﯩﯔ ﺗﺎﻟﻼﺵ-ﺷﺎﻟﻼﺵ ﻣﯩﺨﺎﻧﯩﺰﯨﻤﯩﻨﯩﯔ ﺭﻭﻟﯩﻨﻰ ﺳﻪﻝ ﭼﺎﻏﻼﺷﻘﺎ ﺑﻮﻟﻤﺎﻳﺪﯗ ﺋﻪﻟﺒﻪﺗﺘﻪ.

ﻣﺎﻧﺎ ﺋﻪﻣﺪﯨﻠﯩﻜﺘﻪ ﺋﻪﺩﻩﺑﯩﻲ ﮊﻭﺭﻧﺎﻟﻼﺭﻏﺎ ﻗﺎﺭﺍﻳﺪﯨﻐﺎﻥ ﺑﻮﻟﺴﺎﻕ ،ﺋﯘﻻﺭ ﺭﻩﻫﯩﻤﺴﯩﺰ ﺑﺎﺯﺍﺭ ﺭﯨﻘﺎﺑﯩﺘﯩﺪﻩ ﭘﯘﺕ ﺗﯩﺮﻩﭖ ﺗﯘﺭﯗﺵ ﯞﻩ ﺋﻪﺩﻩﺑﯩﻴﺎﺗﯩﻤﯩﺰﻧﻰ ﺩﯗﻧﻴﺎ ﺋﻪﺩﻩﺑﯩﻴﺎﺕ ﺳﻪﻫﻨﯩﺴﯩﮕﻪ ﺋﯧﻠﯩﭗ ﭼﯩﻘﯩﺸﺘﯩﻦ ﺋﯩﺒﺎﺭﻩﺕ ﺋﯩﻜﻜﻰ ﻗﻮﺯﻏﺎﺗﻘﯘﭼﻰ ﻛﯜﭼﻨﯩﯔ ﺗﻪﺳﯩﺮﯨﺪﻩ ﺑﻪﺱ-ﺑﻪﺳﺘﻪ ﺋﯚﺯﯨﮕﻪ ﺧﺎﺱ ﺑﯩﺮ ﻗﺎﺗﺎﺭ ﺋﯩﺴﻼﻫﺎﺗﻼﺭﻧﻰ ﺋﯧﻠﯩﭗ ﺑﯧﺮﯨﭗ ﺋﻮﻗﯘﺭﻣﻪﻧﻠﻪﺭﮔﻪ ﻛﻪﯕﺮﻯ ﺗﺎﻟﻼﺵ ﭘﯘﺭﺳﯩﺘﻰ ﻳﺎﺭﯨﺘﯩﭗ ﺑﯧﺮﯨﯟﺍﺗﯩﺪﯗ...ﺑﯘ ﻳﯜﺯﻟﯜﻧﯜﺷﻜﻪ ﻣﺎﺱ ﻫﺎﻟﺪﺍ ﺋﯘﻻﺭﻧﯩﯔ ﺷﯧﺌﯩﺮﯨﻴﻪﺗﻜﻪ ﺗﯘﺗﻘﺎﻥ ﻣﯘﺋﺎﻣﯩﻠﯩﺴﯩﺪﻩ ﺳﻪﻝ ﺟﯩﺪﺩﯨﻴﻠﯩﻚ ﻛﻪﻳﭙﯩﻴﺎﺗﻰ ﺷﻪﻛﯩﻠﻠﻪﻧﻤﻪﻛﺘﻪ...ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺑﯩﺰ ﻳﺎﺵ ﺷﺎﺋﯩﺮ،ﻳﺎﺯﻏﯘﭼﻰ ،ﺷﯘﻧﺪﺍﻗﻼ ﺋﯩﺠﺘﯩﻬﺎﺕ ﺑﯩﻠﻪﻥ ﺋﯩﺰﺩﯨﻨﯩﯟﺍﺗﻘﺎﻥ ﺗﻪﺗﻘﯩﻘﺎﺗﭽﯩﻤﯩﺰ ﺋﺎﺑﺪﯗﻟﺌﻪﻫﻪﺩ ﺋﺎﺑﺪﯗﺭﻩﺷﯩﺪ ﺑﻪﺭﻗﻰ ﺑﯩﻠﻪﻥ ﺋﯧﻠﯩﭗ ﺑﺎﺭﻏﺎﻥ ﺗﻪﻟﻘﯩﻨﯩﻤﯩﺰﻧﻰ ﻫﻮﺯﯗﺭﯗﯕﻼﺭﻏﺎ ﺳﯘﻧﺪﯗﻕ.

ﺋﻮﺳﻤﺎﻧﺠﺎﻥ:ﺋﺎﺳﺎﯨﻲ ﻣﻪﻗﺴﻪﺗﻜﻪ ﺋﯚﺗﯜﺷﺘﯩﻦ ﺋﺎﯞﺍﻝ ﺋﻮﻗﯘﺭﻣﻪﻧﻠﻪﺭﮔﻪ ﻗﯩﺴﻘﯩﭽﻪ ﻫﺎﻳﺎﺗﻰ ﭘﺎﺋﺎﻟﯩﺘﯩﯖﯩﺰ ﻫﻪﻗﻘﯩﺪﻩ ﺳﯚﺯﻟﻪﭖ ﺑﯧﺮﯨﺸﻨﻰ ﺧﺎﻻﻣﺴﯩﺰ؟

ﺑﻪﺭﻗﻰ:ﻣﻪﻥ 1971-ﻳﯩﻠﻰ ﻟﻮﭖ ﻧﺎﻫﯩﻴﻪ ﺳﺎﻣﭙﯘﻝ ﻳﯧﺰﯨﺴﯩﺪﺍ ﺗﯘﻏﯘﻟﺪﯗﻡ. ﺋﻪﻗﻠﯩﻤﮕﻪ ﻛﻪﻟﺴﻪﻡ ﺑﯩﺰﻧﯩﯔ ﺋﺎﺋﯩﻠﻪ ﻗﯘﺭﺑﺎﻍ ﺩﯨﮕﻪﻥ ﻛﻪﻧﺘﺘﻪ ﻳﺎ ﺩﯦﻬﻘﺎﻥ ﺋﻪﻣﻪﺱ ،ﻳﺎ ﺭﻩﺳﻤﯩﻲ ﻛﺎﺩﯨﺮ ﺋﻪﻣﻪﺱ ﻗﯩﺴﻘﯩﺴﻰ ﻫﯚﻣﻪﺗﺘﯩﻦ ﻟﻪﯓ ﻳﻪﻳﺪﯨﻐﺎﻧﻼﺭ ﺑﯩﻠﻪﻥ ﻳﻪﺭﺩﯨﻦ ﺭﯨﺴﻘﯩﻨﻰ ﺋﯩﺰﺩﻩﻳﺪﯨﻐﺎﻧﻼﺭﻧﯩﯔ ﻫﻪﺭ ﺋﯩﻜﻜﯩﻠﯩﺴﯩﮕﻪ ﺗﻪﯞﻩ ﻟﯧﻜﯩﻦ ﻳﺎ ﻫﯚﻛﯜﻣﻪﺗﻜﻪ ﺭﻩﺳﻤﯩﻲ ﻛﺎﺩﯨﺮ ﺋﻪﻣﻪﺱ،ﻳﺎ ﺭﻩﺳﻤﯩﻲ ﺩﯦﻬﻘﺎﻥ ﺋﻪﻣﻪﺱ ﺑﯩﺮ ﻗﯩﻴﺎﭘﻪﺗﺘﻪ ﻳﺎﺷﺎﻳﺪﯨﻜﻪﻧﺪﯗﻕ.ﺋﺎﻧﺎﻡ ﺧﻪﻟﻖ ﺋﻮﻗﯘﺗﻘﯘﭼﯩﺴﻰ،ﺩﺍﺩﺍﻡ ﻳﯧﺰﯨﻠﯩﻖ ﺋﺎﺷﻠﯩﻖ ﭘﻮﻧﻜﯩﺘﯩﻨﯩﯔ ﺋﯩﺸﭽﯩﺴﻰ ﺋﯩﻜﻪﻥ.ﺋﯘﻻﺭﻧﯩﯔ ﺷﯘ ﺩﻩﯞﺭﺩﯨﻜﻰ ﺟﻪﻣﯩﻴﻪﺗﻨﯩﯔ ﺑﯩﺮ ﻗﻪﺩﻩﺭ ﻳﺎﺷﯩﻤﺎﻕ ﺋﻮﯕﺎﻱ ﺑﯩﺮ ﻗﺎﺗﻠﯩﻤﯩﻐﺎ ﻗﺎﺭﺍﭖ ﺋﯩﻨﺘﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﯘﻻﺭﻧﯩﯔ ﺋﯩﺠﺘﯩﻤﺎﺋﯩﻲ ﺋﻮﺭﻧﯩﺪﯨﻦ ﻛﯚﺭﯛﯞﺍﻟﻤﺎﻕ ﺗﻪﺱ ﺋﻪﻣﻪﺱ.ﭼﯜﻧﻜﻰ ﺷﯘ ﻳﯩﻠﻼﺭﺩﺍ ﺩﯦﻬﻘﺎﻧﻼﺭ ﻛﺎﭘﯩﺮﺍﺗﺴﯩﻴﻪ ﺗﯜﺯﯛﻣﯩﻨﯩﯔ ‹‹ﻏﺎﻳﻪﺕ ﺯﻭﺭ ﺋﻪﯞﺯﻩﻟﻠﯩﻜﻰ›› ﺑﯩﻠﻪﻥ ﻗﯘﺭﺳﯩﻘﯩﻨﻰ ﺗﻮﻳﻐﯘﺯﯗﺷﺘﯩﻦ ﺑﺎﺷﻘﺎ ﺋﯩﺸﻘﺎ ﺋﯩﻤﻜﺎﻧﯩﻴﯩﺘﻰ ﻳﻮﻕ ﺑﯩﺮ ﻫﺎﻟﺪﺍ ﻳﺎﺷﺎﯞﺍﺗﺎﺗﺘﻰ.ﻫﯚﻛﯜﻣﻪﺗﻨﯩﯔ ﺗﯚﻣﯜﺭ ﺩﻩﭘﺘﯩﺮﯨﮕﻪ ﺋﯧﻠﯩﻨﯩﺶ ﻗﯘﺭﺳﺎﻕ ﺟﯧﯖﻰ ﻗﯩﻠﯩﯟﺍﺗﻘﺎﻧﻼﺭﻧﯩﯔ ﺋﻪﯓ ﺑﯜﻳﯜﻙ ﺋﻮﺗﯘﭘﯩﻴﻪﺳﻰ ﺩﯨﻴﯩﺸﻜﻪ ﺑﻮﻻﺗﺘﻰ.ﺋﯩﻨﺴﺎﻥ ﻫﻮﻗﯘﻗﯩﻨﯩﯔ ﺗﯜﺯﯛﻟﻤﻪ ﺗﻪﺭﯨﭙﯩﺪﯨﻦ ﺋﺎﻳﺎﻕ-ﺋﺎﺳﺘﻰ ﻗﯩﻠﯩﻨﯩﺸﻰ ﺋﻪﯓ ﻳﯘﻗﯘﺭﻯ ﭘﻪﻟﻠﯩﮕﻪ ﻳﻪﺗﻜﻪﻥ،ﻳﯘﻗﯘﺭﻯ ﺑﯧﺴﯩﻤﻠﯩﻖ ﺳﯩﻴﺎﺳﻪﺕ ﺋﺎﺩﻩﻣﻠﻪﺭﻧﻰ ﺯﺍﻣﺎﻧﯩﯟﯨﻲ ﻣﺎﯕﻘﯘﺭﯗﺗﻼﺭﻏﺎ ﺋﺎﻳﻼﻧﺪﯗﺭﯨﯟﻩﺗﻜﻪﻥ ﺋﯩﺪﻯ. ﺷﯘﯕﺎ ﺋﺎﺗﺎ-ﺋﺎﻧﺎﻡ ﺋﺎﺭﺍﻥ ﻛﻪﻟﮕﻪﻥ ﺗﯚﻣﯜﺭ ﺩﻩﭘﺘﻪﺭﮔﻪ ﺋﯩﻠﯩﻨﯩﺶ ﭘﯘﺭﺳﯩﺘﯩﻨﻰ ﺟﯧﻨﯩﻨﯩﯔ ﺑﺎﺭﯨﭽﻪ ﻗﻪﺩﯨﺮﻟﻪﭖ ﻫﻪﺭ ﻛﯜﻧﻰ ﺋﻪﺗﯩﮕﻪﻧﺪﻩ ﺋﯩﺸﻘﺎ ﭼﯩﻘﯩﭗ ﻛﯩﺘﻪﺗﺘﻰ،ﺋﯩﻜﻜﻰ ﺋﺎﭼﺎﻣﻤﯘ ﻣﻪﻛﺘﻪﭘﻜﻪ ﻛﯩﺘﻪﺗﺘﻰ، ﺑﻪﺯﯨﺪﻩ ﻣﻪﻥ ﺋﺎﻧﺎﻣﻐﺎ ﺋﻪﮔﯩﺸﯩﭗ ﻣﻪﻛﺘﻪﭘﻜﻪ ﺑﯧﺮﯨﭗ ﻣﻪﻛﺘﻪﭖ ﻫﻮﻳﻠﯩﺴﺪﺍ ﺋﻮﻳﻨﯩﺴﺎﻡ ، ﺑﻪﺯﯨﺪﻩ ﻣﻪﻛﺘﻪﭖ ﻣﯘﺩﯨﺮﯨﻨﯩﯔ ﺑﺎﻻﯕﻨﻰ ﻣﻪﻛﺘﻪﭘﻜﻪ ﺋﻪﮔﻪﺷﺘﯜﺭﯛﭖ ﻛﻪﭘﺴﻪﻥ ﺩﻩﭖ ﺋﺎﻧﺎﻣﻐﺎ ﺩﻭﻕ ﻗﯩﻠﯩﺸﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﭗ ﺋﯚﻳﺪﻩ ﻳﺎﻟﻐﯘﺯ ﻗﺎﻻﺗﺘﯩﻢ ﻳﺎﻛﻰ ﺋﯚﻳﺪﻩ ﻳﺎﻟﻐﯘﺯ ﻗﯧﻠﯩﺸﻘﺎ ﻣﻪﺟﺒﯘﺭ ﺑﻮﻻﺗﺘﯩﻢ،ﻣﻪﻫﻪﻟﻠﯩﻨﻰ ﻳﺎﻟﻐﯘﺯ ﺋﺎﻳﻠﯩﻨﺎﺗﺘﯩﻢ،ﺋﯧﺘﯩﺰﻟﯩﻘﻼﺭﺩﺍ ،ﺋﯚﻳﯜﻣﯩﺰﻧﯩﯔ ﺋﻪﺗﺮﺍﭘﯩﺪﯨﻜﻰ ﺋﻮﺭﻣﺎﻧﻠﯩﻘﻼﺭﺩﺍ ﻛﯩﭙﯩﻨﻪﻙ ،ﻳﯩﯖﻨﺎﻏﯘﭺ ﻗﻮﻏﻼﻳﺘﺘﯩﻢ.ﻗﯩﺶ ﻛﯜﻧﻠﯩﺮﻯ ﻗﯩﺴﻤﺎﻕ ﻳﺎﺳﺎﭖ ﻗﯘﺷﻘﺎﭺ ﺗﯘﺗﺎﺗﺘﯩﻢ. ﺩﯦﻬﻘﺎﻧﻼﺭﻧﯩﯔ ﺋﯜﺯﯛﻧﺪﻩ ﻳﺎﺩﻻﭖ،ﭼﯜﻣﯩﻠﯩﻠﻪﺭﺩﻩﻙ ﺳﻪﭖ ﺗﺎﺭﺗﯩﭗ ﺋﻪﺗﺮﻩﺗﻨﯩﯔ ﺋﯧﻐﯩﻠﯩﺪﯨﻦ ﻗﯩﻎ ﺗﻮﺷﯘﺷﻰ ، ﺋﻪﺗﺮﻩﺗﻨﯩﯔ ﺋﺎﺷﺨﺎﻧﯩﺴﯩﺪﯨﻦ ﭼﯜﺷﻠﯜﻙ ﺗﺎﻣﺎﻕ ﺋﻮﺭﻧﯩﻐﺎ ﺑﯧﺮﯨﻠﯩﺪﯨﻐﺎﻥ ﻫﻪﺭ ﺑﯩﺮ ﻧﻮﭘﯘﺳﻘﺎ ﺑﯩﺮﺩﯨﻦ ﺗﯩﮕﯩﺪﯨﻐﺎﻥ ﺯﺍﻏﺮﯨﻨﻰ ﻛﯚﺯﻟﯩﺮﯨﻨﻰ ﻣﯚﻟﺪﯛﺭﻟﯩﺘﯩﭗ ﺗﯘﺭﯗﭖ ﺳﺎﻗﻠﯩﺸﻰ ،ﺗﺎﻣﺎﻕ ﺑﯧﺮﯨﺪﯨﻜﻪﻥ ﺩﯨﮕﻪﻥ ﺧﻪﯞﻩﺭﻧﻰ ﺋﺎﯕﻠﯩﻐﺎﻥ ﺩﻭﺳﺘﻠﯩﺮﯨﻤﻨﯩﯔ ﺋﻪﯓ ﻗﯩﺰﯨﻐﺎﻥ ﺋﻮﻳﯘﻧﻨﻰ ﺗﺎﺷﻼﭖ ﻳﯜﮔﯜﺭﻩﭖ ﺑﯧﺮﯨﭗ،ﻧﺎﻥ ﭘﯩﺸﯩﯟﺍﺗﻘﺎﻥ ﺗﻮﻧﯘﺭﻏﺎ ﺗﻪﻗﻪﺯﺯﺍﻟﯩﻖ ﺑﯩﻠﻪﻥ ﺗﻪﻟﻤﯜﺭﯛﭖ ﻗﺎﺭﺍﺷﻠﯩﺮﻯ ﺑﺎﻟﯩﻠﯩﻖ ﻗﻪﻟﺒﯩﻤﮕﻪ ﺑﻪﻛﻤﯘ ﺗﻪﺳﯩﺮ ﻗﯩﻠﻐﺎﻥ ﺋﯩﺪﻯ.

ﺑﯩﺮ ﻛﯜﻧﻰ ﻧﻪﭼﭽﻪ ﻛﯜﻧﺪﯨﻦ ﺑﯧﺮﻯ ﺗﯜﺯﯛﻛﺮﻩﻙ ﺑﯩﺮ ﻧﻪﺭﺳﻪ ﻳﯩﻤﯩﮕﻪﻥ ﺑﯩﺮ ﻧﺎﻣﺮﺍﺗﻨﯩﯔ ﺑﺎﻟﯩﺴﯩﻨﯩﯔ ﻛﺎﻟﯩﻨﯩﯔ ﺗﯩﺰﯨﻜﯩﻨﻰ ﻗﯘﻳﻤﺎﻕ ﺩﻩﭖ ﻗﺎﺭﺍﭖ ﻗﯧﻠﯩﭗ ﻗﻮﻟﯩﻐﺎ ﺋﯧﻠﯩﭗ ﻳﯩﻤﻪﻛﭽﻰ ﺑﻮﻟﯘﭖ ﺗﯘﺭﻏﺎﻧﺪﺍ ﭼﻮﯕﻼﺭﻧﯩﯔ ﻫﻪﺳﺮﻩﺕ ﺑﯩﻠﻪﻥ ﻗﺎﻗﺸﺎﭖ ﻛﯩﺘﯩﺸﻜﻪﻧﻠﯩﺮﻯ ﻫﯧﻠﯩﻤﯘ ﺋﯧﺴﯩﻤﺪﻩ.

ﻣﻪﻥ ﺷﯘ ﭼﺎﻏﻼﺭﺩﺍ ﻣﻪﻫﻪﻟﻠﯩﺪﯨﻜﻰ ﺑﺎﻟﯩﻼﺭ ﺑﯩﻠﻪﻥ ﺑﯩﻠﻠﻪ ﺋﻮﻳﻨﺎﻳﺘﺘﯩﻢ، ﻟﯧﻜﯩﻦ ﺩﻭﺳﺘﻠﯩﺮﯨﻤﻨﯩﯔ ﺋﺎﺗﺎ-ﺋﺎﻧﯩﻠﻠﯩﺮﻯ ﻧﯩﻤﯩﺸﻘﯩﺪﯗﺭ ﻣﺎﯕﺎ ﺋﯚﭼﻤﻪﻧﻠﯩﻚ ﺑﯩﻠﻪﻥ ﻣﯘﺋﺎﻣﯩﻠﻪ ﻗﯩﻼﺗﺘﻰ. ﻛﯧﻴﯩﻦ ﺑﯩﻠﺴﻪﻡ ﺩﺍﺩﺍﻣﻨﯩﯔ ﺋﺎﺷﻠﯩﻖ ﭘﻮﻧﻜﯩﺘﯩﺪﺍ ﺋﯩﺸﻠﯩﺸﻰ،ﺋﺎﻧﺎﻣﻨﯩﯔ ﺧﻪﻟﻖ ﺋﻮﻗﯘﺗﻘﯘﭼﯩﺴﻰ ﺑﻮﻟﯘﭖ ﺋﺎﺯ ﺑﻮﻟﺴﯩﻤﯘ ﻫﯚﻛﯜﻣﻪﺗﺘﯩﻦ ﻟﻪﯓ ﻳﻪﻳﺪﯨﻐﺎﻧﻠﯩﻘﻰ ،ﻗﯩﺴﻘﯩﺴﻰ ﻗﻮﺷﻨﺎ -ﻗﯘﻟﯘﻣﻼﺭﻏﺎ ﻗﺎﺭﯨﻐﺎﻧﺪﺍ ﺟﺎﭘﺎﻧﻰ ﺳﻪﻝ ﺋﺎﺯﺭﺍﻕ ﺗﺎﺭﺗﯩﭗ ،ﻧﺎﭼﺎﺭ ﻳﯩﺴﻪﻛﻤﯘ ﻗﯘﺭﺳﯩﻘﯩﻤﯩﺰﻧﯩﯔ ﺗﻮﻕ ﺋﯚﺗﯩﺪﯨﻐﺎﻧﻠﯩﻘﻰ ﺋﯘﻻﺭﻧﯩﯔ ﻫﻪﺳﻪﺗﺨﻮﺭﻟﯩﻘﯩﻨﻰ ﻗﻮﺯﻏﯩﻐﺎﻥ ﺋﯩﻜﻪﻥ،ﻟﯧﻜﯩﻦ ﻣﻪﻥ ﺋﯘﻻﺭﺩﯨﻦ ﺋﺎﻏﺮﯨﻨﻤﺎﻳﺘﺘﯩﯩﻢ.ﺋﺎﺩﻩﻣﻠﻪﺭ ﺟﺎﭘﺎ ﯞﻩ ﻣﯘﺷﺎﻗﻪﺕ ،ﻫﺎﻳﯟﺍﻧﻐﺎ ﺋﻮﺧﺸﺎﺵ ﻛﯜﻥ ﻛﻪﭼﯜﺭﯛﺵ ﻧﻪﺗﯩﺠﯩﺴﯩﺪﻩ ﺭﻩﻫﯩﻤﺴﯩﺰ، ﺗﺎﺵ ﻳﯜﺭﻩﻙ ، ﭘﯩﺘﻨﯩﭽﻰ ﺑﻮﻟﯘﭖ ﻛﻪﺗﻜﻪﻥ ﺋﯩﺪﻯ، ﻗﯘﺭﺳﺎﻗﺘﯩﻦ ﺑﺎﺷﻘﺎ ﺋﯩﺸﻼﺭﻏﺎ ﻛﯚﯕﯜﻝ ﺑﯚﻟﮕﯜﺩﻩﻙ ﺋﻪﻫﯟﺍﻟﻰ ﻳﻮﻕ ﺋﯩﺪﻯ.

ﺑﯩﺮ ﻛﯩﭽﯩﺴﻰ ﺋﯚﻳﯩﻤﯩﺰﻧﯩﯔ ﺋﯩﺸﯩﻜﻰ ﻗﯧﻘﯩﻠﺪﻯ، ﺩﺍﺩﺍﻡ ﺋﺎﺷﻠﯩﻖ ﭘﻮﻧﻜﯩﺘﯩﺪﺍ ﻛﯜﺯﻩﺗﭽﯩﻠﯩﻚ ﻗﯩﻠﯩﭗ ﻳﯧﺘﯩﭗ ﻗﺎﻟﻐﺎﭼﻘﺎ ﺋﺎﻧﺎﻡ ﺋﯩﺸﯩﻜﻨﻰ ﺋﺎﭼﻤﯩﺪﻯ، ﺋﯩﺸﯩﻚ ﻗﯧﻘﯩﻠﯩﯟﯞﻩﺭﺩﻯ،ﺑﯩﺮ ﭼﺎﻏﺪﺍ ﺋﯩﺸﯩﻚ ﻗﯧﻘﯩﻠﯩﺸﺘﯩﻦ ﺗﻮﺧﺘﺎﭖ ﺋﻪﺗﺮﻩﺕ ﺑﺎﺷﻠﯩﻘﯩﻨﯩﯔ ﮔﯜﻟﺪﯛﺭﻣﺎﻣﯩﺪﻩﻙ ﺋﺎﯞﺍﺯﻯ ﺋﺎﯕﻼﻧﺪﻯ. ﺋﻪﺗﺮﻩﺕ ﺑﺎﺷﻠﯩﻘﻰ ﺋﺎﻧﺎﻣﻨﯩﯔ ﺩﻭﻟﻘﯘﻧﻐﺎ ﭼﯩﻘﯩﺸﻰ ﻛﯩﺮﻩﻛﻠﯩﻜﻰ ،ﺑﻮﻟﻤﯩﺴﺎ ﺑﯘ ﺋﻪﺗﺮﻩﺗﺘﯩﻦ ﻛﯚﭼﯜﭖ ﻛﯩﺘﯩﺸﯩﻤﯩﺰ ﻻﺯﯨﻤﻠﯩﻘﻰ ﻫﻪﻗﻘﯩﺪﻩ ﻏﻪﺯﻩﭖ ﺑﯩﻠﻪﻥ ﯞﻩﺯ ﺋﯧﻴﺘﺘﻰ. ﺋﺎﻧﺎﻡ ﺋﯚﻳﺪﻩ ﺗﯘﺭﯗﭖ ﺋﯚﺯﯨﻨﯩﯔ ﺧﻪﻟﻖ ﺋﻮﻗﯘﺗﻘﯘﭼﯩﺴﻰ ﺋﯩﻜﻪﻧﻠﯩﻜﯩﻨﻰ ﭘﺎﻛﯩﺖ ﻗﯩﻠﯩﭗ ﺋﻪﺗﺮﻩﺕ ﺑﺎﺷﻠﯩﻘﻰ ﺑﯩﻠﻪﻥ ﺯﯗﻛﯘﻧﻼﺷﺘﻰ ،ﺋﺎﺧﯩﺮﻯ ﺋﻪﺗﺮﻩﺕ ﺑﺎﺷﻠﯩﻘﻰ ﻛﻪﺗﻤﻪﻥ ﭼﯘﻟﺪﯨﺴﻰ ﺑﯩﻠﻪﻥ ﺋﯩﺸﯩﻜﯩﻤﯩﺰﻧﻰ ﻧﻪﭼﭽﯩﻨﻰ ﺋﯘﺭﯨﯟﻩﺗﻜﻪﻧﺪﯨﻦ ﻛﯧﻴﯩﻦ ﻳﻮﻗﺎﻟﺪﻯ. ﻣﻪﻥ ﺋﻪﺗﯩﺴﻰ ﺋﺎﻧﺎﻡ ﻣﻪﻛﺘﻪﭘﻜﻪ ﻛﻪﺗﻜﻪﻧﺪﻩ ﺩﻩﺭﯞﺍﺯﺍ ﺋﺎﻟﺪﯨﻐﺎ ﭼﯩﻘﯩﭗ ﺩﻩﺭﯞﺍﺯﯨﻨﯩﯔ ﻗﺎﻧﯩﺘﯩﻐﺎ ﻗﺎﺭﯨﺪﯨﻢ. ﺋﺎﺧﺸﺎﻡ ﻛﻪﺗﻤﻪﻧﻨﯩﯔ ﭼﯘﻟﺪﯨﺴﻰ ﺗﻪﻛﻜﻪﻥ ﻳﻪﺭ ﺋﻮﻳﻤﺎﻥ ﺑﻮﻟﯘﭖ ﻗﺎﻟﻐﺎﻥ ﺋﯩﺪﻯ، ﭼﯩﺮﺍﻳﻠﯩﻖ ﺋﯩﺸﯩﻚ ﺯﯨﺪﯨﻠﻪﻧﮕﻪﻥ ﺋﯩﺪﻯ. ﻣﻪﻥ ﺑﯘ ﺯﯨﺪﯨﻨﻰ ﺋﯘﺯﺍﻕ ﻣﻪﺯﮔﯩﻠﻠﻪﺭﮔﯩﭽﻪ ﺋﯘﻧﺘﺎﻟﻤﯩﺪﯨﻢ.ﻣﻪﻥ ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﻜﻪ ﭼﯩﻘﻘﯘﭼﻪ ﺑﯘ ﺯﯨﺪﻩ ﺋﯩﺸﯩﻜﯩﻤﯩﺰﺩﻩ ﺳﺎﻗﻠﯩﻨﯩﭗ ﺗﯘﺭﺩﻯ.

ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﺘﯩﻦ ﺑﺎﺷﻼﭖ ﺑﯩﺮ ﻧﻪﺭﺳﯩﻠﻪﺭﻧﻰ ﻳﯧﺰﯨﺸﻘﺎ ﺑﺎﺷﻠﯩﺪﯨﻢ،ﻳﯧﺰﯨﺸﯩﻤﻐﯩﻤﯘ ﻳﯧﺰﯨﻘﭽﯩﻠﯩﻖ ﺗﺎﭘﺸﯘﺭﯗﻗﯩﻨﻰ ﺑﺎﺷﻘﺎ ﺳﺎﯞﺍﻗﺪﺍﺷﻠﯩﺮﯨﻤﻐﺎ ﻗﺎﺭﯨﻐﺎﻧﺪﺍ ﻳﺎﺧﺸﻰ ﺋﯩﺸﻠﯩﮕﻪﻧﻠﯩﻜﯩﻤﺪﯨﻦ ﺋﯧﺮﯨﺸﻜﻪﻥ ﻣﻪﺩﻩﺕ ﯞﻩ ﺋﺎﻟﻘﯩﺶ ﺳﻪﯞﻩﭖ ﺑﻮﻟﻐﺎﻥ ﺋﯩﺪﻯ.ﻟﯧﻜﯩﻦ ﻧﯘﺭﻏﯘﻥ ﺋﻮﻗﯘﺗﻘﯘﭼﯘﻡ ﻳﯧﺰﯨﻘﭽﯩﻠﯩﻖ ﺑﯩﻠﻪﻥ ﺷﯘﻏﯘﻟﻠﯩﻨﯩﺸﯩﻤﻨﻰ ﻳﺎﻗﺘﯘﺭﯗﭖ ﻛﻪﺗﻤﻪﻳﺘﺘﻰ.ﻣﻪﻥ ﺷﯘ ﭼﺎﻏﺪﺍ ﺋﯘﻻﺭﻧﯩﯔ ﻧﯩﻤﯩﺸﻘﺎ ﺷﯘﻧﺪﺍﻕ ﭘﻮﺯﯨﺘﺴﯩﻴﻪﺩﻩ ﺑﻮﻟﻐﺎﻧﻠﯩﻘﯩﻨﻰ ﭼﯜﺷﯩﻨﻪﻟﻤﯩﮕﻪﻧﻜﻪﻧﻤﻪﻥ،ﻛﯧﻴﯩﻦ ﺋﯘﻻﺭﻧﯩﯔ ﺋﻪﺩﻩﺑﯩﻴﺎﺗﺘﯩﻦ ﺑﺎﺷﻘﺎ ﺑﯩﺮﻩﺭ ﻛﻪﺳﯩﭙﺘﻪ ﺗﺎﻻﻧﺘﯩﻤﻨﻰ ﺟﺎﺭﻯ ﻗﯩﻠﺪﯗﺭﯗﺷﯘﻣﻨﻰ ﺋﺎﺭﺯﯗ ﻗﯩﻠﻐﺎﻧﻠﯩﻘﯩﻨﻰ ﻫﯩﺲ ﻗﯩﻠﺪﯨﻢ.ﭼﯜﻧﻜﻰ ﻣﻪﻥ ﺋﻪﺩﻩﺑﯩﻴﺎﺕ ﺩﻩﺭﯨﺴﯩﺪﯨﻼ ﺋﻪﻣﻪﺱ ﺑﺎﺷﻘﺎ ﺗﻪﺑﯩﺌﯩﻲ ﭘﻪﻥ ﺩﻩﺭﺳﻠﯩﺮﯨﺪﯨﻤﯘ ﻧﺎﻫﺎﻳﯩﺘﻰ ﻳﺎﺧﺸﻰ ﺋﻮﻗﯘﻏﺎﻥ ﺋﯩﺪﯨﻢ.ﺗﻪﺑﯩﺌﯩﻲ ﭘﻪﻥ ﺩﻩﺭﺳﻠﯩﺮﯨﮕﻪ-ﺑﻮﻟﯘﭘﻤﯘ ﺧﯩﻤﯩﻴﻪ ،ﭘﯩﺰﯨﻜﺎ،ﺟﯘﻏﺮﺍﭘﯩﻴﻪ ﺩﻩﺭﺳﻠﯩﺮﯨﮕﻪ ﺋﺎﻻﻫﯩﺪﻩ ﺋﯩﺸﺘﯩﻴﺎﻗﯩﻢ ﺑﺎﺭ ﺋﯩﺪﻯ. ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﻨﯩﯔ ﺋﯩﻜﻜﯩﻨﺠﻰ ﻳﯩﻠﻠﯩﻘﯩﺪﺍ ﺗﯘﻧﺠﻰ ﺋﻪﺳﯩﺮﯨﻢ ﺋﯧﻼﻥ ﻗﯩﻠﯩﻨﺪﻯ، ﺷﯘ ﻳﺎﺯﻏﺎﻧﭽﻪ ﻳﯧﺰﯨﺶ ﻣﯧﻨﯩﯔ ﺳﺎﻗﺎﻳﻤﺎﺱ ﻛﯩﺴﯩﻠﯩﻤﮕﻪ ﺋﺎﻳﻼﻧﺪﻯ.ﻫﺎﺯﯨﺮﻣﯘ ﺷﯘ ﻛﯩﺴﻪﻟﮕﻪ ﮔﯩﺮﯨﭙﺘﺎﺭﻣﻪﻥ، ﻫﻪﺭ ﻗﯧﺘﯩﻢ ﺑﯩﺮ ﻧﻪﺭﺳﻪ ﻳﺎﺯﻏﺎﻧﺪﺍ ﺑﺎﻟﯩﻠﯩﻖ ﯞﺍﻗﺘﯩﻤﺪﯨﻜﻰ ﺋﻪﺷﯘ ﺩﻩﯞﺭ ،ﺋﺎﺩﻩﻣﻠﻪﺭﻧﯩﯔ ﺑﯩﺮ-ﺑﯩﺮﯨﮕﻪ ﺯﻩﻫﻪﺭﺧﻪﻧﺪﯨﻠﯩﻚ ﺑﯩﻠﻪﻥ ﻣﯘﺋﺎﻣﯩﻠﻪ ﻗﯩﻠﯩﺸﻠﯩﺮﻯ ﻛﺎﻟﻼﻣﻐﺎ ﻛﯧﻠﯩﯟﺍﻟﯩﺪﯗ.ﻛﯩﭽﯩﻚ ﯞﺍﻗﺘﯩﻤﺪﺍ ﺑﯘ ﺋﯩﺸﻼﺭﻏﺎ ﻧﯩﻤﯩﺸﻘﺎ ﺩﻩﭖ ﺳﯘﺋﺎﻝ ﻗﻮﻳﻐﺎﻥ ﺑﻮﻟﺴﺎﻣﻤﯘ ﺟﺎﯞﺍﭖ ﺗﺎﭘﺎﻟﻤﯩﻐﺎﻥ ﻳﺎﻛﻰ ﺋﯧﺮﯨﺸﻜﻪﻥ ﺟﺎﯞﺍﭘﻼﺭﺩﯨﻦ ﻗﺎﻧﺎﺋﻪﺕ ﻗﯩﻠﻤﯩﻐﺎﻥ ﺋﯩﺪﯨﻢ.ﻫﺎﺯﯨﺮ ﻗﺎﻧﺎﺋﻪﺕ ﻗﯩﻠﻐﯘﺩﻩﻙ ﺟﺎﯞﺍﭖ ﺗﺎﭘﺘﯩﻢ.